YESAYA 16 - Susula Malalaok Hehelu Palak Ma Hehelu Beuk

Moab be'i-balakain ta

¹ Leoina Moab-pa, haitua bi'ilopoana neme kota Sela nai moo solokaek-ka, fo ala fe palsen neu manakoasa manai Yerusalem-mala.

² Hataholi Moab-pala, lahani lai Lee Arnon-na su'un-na, ma beela'o no lapangamak sama leo manupui fo, nanausihenik neme ndunun dale mai.

³ Ala lafa'da leoina Yehuda lae, “Mafa'da hata fo, ami muse taon. Da'di ami masulu-mahapam makasufuk nai le'do mahaak-ka, nai fai lele'don-na, ma nemen-na, fo ami leo nai o masulu-mahapam dale. Ami ia, hataholi manamalaik; mafuni ami, ma boso malelesi ami.

⁴ Fe ami loak leo lalai nai o nusam-ma. Masulu-mahapa ami, neme hataholi fo, ana nau tao namate-namopo ami.” (Tuni-ndenik-ka, ma mamate-momopok-ka, neukose nate'e, ma hataholi-hataholi fo manatao lakalulutuk ma manatuni-ndeni nusa Israel-la, neukose mopok-kasa.

⁵ Basa soona, hataholi esa neme Dauk tititi-nonosin mai, neukose ana da'di manek, ma neukose ana paleta leoinan no susue-lalaik ma lilinekak. Neukose napadedeik natetu ndoos ma matetuk-ka, ma no lai-laik, ana tao hata fo ndoos-sa.)

⁶ Leoina Yehuda nafa'da nae, “Ami mamanene basa, leoina Moab-pa, koao-ndaeaon so. Ami bubuluk lae sila lamatutua-lamadedema aoinan-nala ma koao-ndaeaok. Sila hala-kokolan-na ka'da bafa louk, fo isin ta.”

⁷ Hu ndia de, nemen-na fo, leoina Moab-pa, esa kii-makaleleu esa. Nemen-na fo ala kii, metema lafandele-la nana'a mala'da fo, ala biasa la'an nai kota Kir-Hareset-ta. Nemen-na fo ketu namahehenan-nala, ma lahoo.

⁸ Tina-osi manadeka loo Hesybon-na, ma osi angol Sibma, nanatao nakalulutuk so, osi-osi fo biasan-na, labuna-laboa angol maloleinan-nanseli, soaneu manakoasa leoina-ka, fo taon-nalas ala mafuk. Makahulun-na, osi angol sila-la, lamaloa losa kota Yaezer-ra; ma leo dulu neu, fo losa moo solokaek-ka, ma nai boboak muli losa Tasi Mates-sa selik.

⁹ Besak ia, au kii-makaleleu ai angol Sibma, sama leo au kii-makaleleu Yaezer. Au luu oeng-nga ti'ti boto-boto, soaneu Hesybon ma Eleale, nanahu musu na'aheni pela-ha'den-nala.

¹⁰ Ta hapu hataholi esa boen, namahoko-setelee nai tina maoe-maisik sila-la. Ta hapu eeki-natadalek, do manamakameek nai osi angol-la fa. Ta hapu manahe'e angol soaneu tao angol oek fa. Au tao ate'e sila eeki-natadalen so.

¹¹ Au daleng-nga he'dis-sa ma nakalulutuk, mete Moab ma Kir-Heres so'dan-na.

¹² Hataholi Moab-pala sota-mangu kae pupuku tunu-hotuk-ka, fo leo sila mamana makaluku-makatelen-na leu, soaneu hule-haladoi, tehu buna-boan ta.

¹³ Hala heheluk ndia nde makahulun-na, Manetualain fen la'eneu Moab.

¹⁴ Ma besak ia, Manetualain nafa'da nae, “Nandaa no teuk telu seluk soona, Moab dalen-na namatua neu basa su'i-beten lala'en-na, neukose mopok-kasa. Laun makadoton-nala, neukose ala da'di ka'da lumanak, ma manamalek-kala.”