YESAYA 14 - Susula Malalaok Hehelu Palak Ma Hehelu Beuk

Fali leme mamana ookak-ka mai

¹ Neukose Manetualain sue-lai anan Israel, de Ana hele seluk-kasa da'di Ndia nuun. Neukose Ana fe falik-kasa leo sila nusa mesan-na neu. Hataholi nusa dea-la, neukose ala mai fo lakabubua loos.

² Neukose leoina makadotok ala tulu-fali leoina Israel-la, fo ala fali leo nusak fo Manetualain fen neu sila, de neukose leoina ndia, ana da'di ata neu Israel. Neukose Israel foo hataholi fo ala foo hai Israel-so, ma ana paleta hataholi fo ala tuni-ndeni hain so.

Manek Babel-la nai hataholi manamatek-kala daebafan-na.

³ Neukose Manetualain soi-po'i hataholi Israel-la leme he'di-laus ma tuni-ndeni-na mai, ma ue-le'di mabelaina, fo lakasetis ala taon.

⁴ Metema Manetualain tao dede'ak ndia soona, neukose ala hakinonoli manek Babel-la lae leo ia, “Manek fo ha'da hataholi tak-ka, ana tu'da so! Ana ta hapu tuni-ndeni so'on.

⁵ Manetualain tao nate'e manakoasa mangalauk-kala paletan

⁶ fo ala tuni-ndeni leoina-la no nasa-meluk, ma ala fepa-li'us lakandondoo henin

⁷ Mate'en-na, daebafak-ka lala'en-na, neukose nee-nee lino-lino ma tetu-temak ma basa hataholi-la lakamee no namahoko-seteleek.

⁸ Ai eru ma ai kaiou Libanon-nala lamahoko-setelee, nanahu manek fo ha'da hataholi tak ndia, ana tu'da so. Ma ana la'o so boema, ta hapu manamadenu soaneu lo'o heni ai sila so'on!

⁹ Hataholi manamatek-kala daebafan-na lakalupu-lakasee, sipok mane Babel ndia. Boema hataholi fo makahulun-na ala koasa nai daebafak-ka samanen-nala nggenge, ma basa manek-kala samanen-nala, ala fo'a leme sila kandela manen lain mai.

¹⁰ Sila basa-basas laloo bee bou leun lae, ‘Hai! Besak ia, o sama leo ami so, fo tapandoes ma be'i-balakai tak.

¹¹ Makahulun-na o nanafe ha'da-holomata nenik sasanu kecapi, tehu besak ia, o nai mamana nee-nee lino-linok, fo nde hataholi manamatek-kala daebafan-na. Ulek-kala da'di o mamana pepe'um-ma, ma kalatik-kala da'di o lafa nalu'em-ma.’

¹² Hai manek Babel-la nei, makahulun-na o nduu lolebalahaak fo nasa'a, tehu besak ia, o tu'da meme lalai mai so! Makahulun-na o sengi leoina-la, tehu besak ia, nanatu'u henik leo dae lain neu.

¹³ O maketu basa nai o dalem dale, kae leo lalai muu, fo o pe'da o kandela manem-ma, neu nduuk mademaina lain! O maedaenga o hapu mangatuuk da'di leo manek nai letek kii lain, fo lamatua daebafak-kala mamana nakabubuan-na.

¹⁴ O mafa'da mae neukose o kae leo ko'as mademaina-la lai muu, fo o da'di sama leo Manetualain Fo Mademaina.

¹⁵ Te se'kona, o nananakonak leo mamanak fo mademainan-nanseli, neme hataholi manamatek-kala daebafan-na mai.

¹⁶ Hataholi manai ndia-la, neukose langanalo ma ala mete tee-tee o. Neukose latane lae, ‘Hataholi manatao-na daebafak-ka dele, ma nusak-kala langgengo-a nde ia do?

¹⁷ Ndia nde tao nakalulutuk kota-kota-la, ma ana tao nasafali daebafak-ka da'di moo solokaek-ka do? Ndia ia nde, ana ta po'i nita hataholi nanafoon-nala, do ana po'is ala fali le'us fa do?’

¹⁸ Basa leoina-a mane lasi-lasin-nala nananatoik no namahokok nai esa-esak laten-na,

¹⁹ tehu o loo-latem ta; o popolam-ma nanatapa henik, sama leo nupuk fo nanatipa henik, fo palani tati batu manamatek manai natee-natatik-ka dalek, popolan-nala lapaluni ketun, ma nanatapak sama-sama nos, leo bolo mamates batu dale neu, sama leo popolak fo nanaheheta-aa'ik.

²⁰ O tao makalulutuk o nusam-ma, ma o taomisa o leoina mesam-ma. Hu ndia de, neukose o ta nananatoi-natonok sama leo mane fe'ek-kala fa. Ta hapu hataholi esa boen neme o teidalem fo mangalauk ndia mai, neukose nanasoi-tefak fa.

²¹ Neukose dodo'do-papauk-ka, ana da'di no lai-laik! Neukose mate o anamanem-mala, nanahu sila bei-ba'i kain-nala sala-singon-nala. Ta hapu sila hataholin esa boen, neukose ana paleta nai daebafak-ka, do nafofo'a kota-kota-la fa.”

Neukose Manetualain tao nakalulutuk Babel

²² Manetualain Fo Manakoasa, nafa'da nae, “Neukose Au sapu-a Babel, fo Au tao amopon. Neukose Au ta soi-tefa, hataholi esa boen, nakalenak Au ta po'ilotak ni'iana-la laso'da fa. Au, fo Manetualain nde manakokolak-ka.

²³ Neukose Au tao Babel da'di puuk, fo ko'donaok-kala mamana leleon-na. Neukose Au sasapu balisi Babel. Au, fo Manetualain nde manakokolak-ka.”

Neukose Manetualain tao namate-namopo Asyur

²⁴ Manetualain Fo Manakoasa, soo nae, “Fo Au tutu'u basan ndia, neukose ana da'di.

²⁵ Neukose Au tao amopo-amate hataholi Asyur manai Au nusang Israel-la, ma neukose Au heheta-aa'i manai letek-kala. Neukose Au soi-po'i Au leoinang, neme tuni-ndenik-ka mai, ma neme lelepak fo hataholi Asyur-ra lakasetis ala lu'a-lepan.

²⁶ Au dale tutu'ung-nga nde ia, soaneu daebafak-ka; Au so'uk Au limang-nga, soaneu huku leoinak-kala.”

²⁷ Manetualain Fo Manakoasa, naketu basa, soaneu tao leondiak. Ana so'uk liman-na, soaneu Ana huku, de hataholi esa boen, ta hapu kena-ka'i fan.

Neukose Manetualain tao namate-namopo hataholi Filistin-nala

²⁸ Hala heheluk-ka nde ia, fo nanapo'a-bengak nai teuk fo, mate Manek Ahas-sa.

²⁹ Hai leoina Filistin-nala lemin, ai kalapu'ak fo nanapakek soaneu fepa o-a, la'din so. Tehu o boso mamahoko dei, nana metema mate menge esa soona, menge fo mangalaun-na lena seluk, ana mai nggatin, ma menge tolo-a, ana tutu buta mali'dak.

³⁰ Neukose la'a-ndoes matuaina, la'e emi, ma bei ela hataholi-la, neukose nanatao nisak. Nasafalin-na, Manetualain anan fo, nuu taa-hata taak nanseli, neukose ana hapu nana'a-nininuk, ma hataholi tapandoes-sa, neukose naso'da no nee-nee lino-linok, ma so'da-molek.

³¹ Kii-makaleleu leona, ma nggasi moke tutulu-fafalik, hai kota-kota Filistin-nala lemin! Ela leo been-na, emi basa-basam bii-mamata'u! Ko'de ndenuk-ka, namasu neme kii mai, de ana fe ta'du nae, musu solda'dun-na, ala mai; nai sila dalek, ta hapu hataholi nakadedeak fa.

³² Natataak beek kande, neukose ita fen neu leoina Filistin-na, hataholi nadedenun-nala? Neukose ita tafa'das, tae Manetualain nafofo'a basa Sion so, de anan fo manadoi-dosok-kala, neukose ala hapu nasulu-nahapak lai ndia.