YESAYA 11 - Susula Malalaok Hehelu Palak Ma Hehelu Beuk

Nusak Mole-dame-a

¹ Mane Dauk-ka, tititi-nonosin sama leo ai nanalo'o henik-ka so. Tehu sama leo ai nanalo'o henik ndia huun-na nape'du beu, leondiak boe, neukose manek esa ana to'da mai neme Dauk tititi-nonosin mai.

² Neukose Manetualain koasan-na hela-nolen, fo Ana taon da'di hataholi dale malole, ma manatee-tenok, malelaina nai ho'i nakeketuk-ka dalek, fo nakalala'ok-kana; nalelak Manetualain hihii-nanaun, ma namahele neun.

³ Dale hihi-nanaun-na nde ka'da tunga neu Manetualain. Ta naketu-nala'di no lai-laik fa, do naketu-nala'di tunga hataholi hala-kokolan fa.

⁴ Naketu-nala'di hataholi nuu-taa hata-taak-ka, tunga ndoos ma matetuk, nasala'e hataholi tapandoes-sa no dale ndoos; hataholi masalak-ka, nanahukuk tunga paletan-na, Ana tao namopo-namate hataholi mangalauk-ka.

⁵ Ana ho'i nakeketuk tunga ndoos ma matetuk, ma manalilinekak nai basa hata lala'en-na dalek.

⁶ Neukose, busa fuik-ka, leo nakabubua no bi'ilopo-a, meoasu ana nai bi'ihiik-ka boboan-na. Neukose sapi ana, na'a na'u sama-sama no singa ana, ma ni'iana-la foos.

⁷ Neukose sapi-a, na'a na'u sama-sama no beruang-nga, anan-nala lu'u lakabubua. Singa na'a ha'deaik sama leo sapi-a.

⁸ Nakalenak, ni'iana bongi beuk esa, ta nakahina, metema nakaminak deka no menge malasok-ka.

⁹ Ta hapu hata mangalauk ma nalutuk nai Sion, fo Manetualain Pupuku Malalao-malalafun-na fa. Neukose nusak-ka, henuk no malelak la'eneu Manetualain, sama leo oe henu tasi-a.

Leoina manai nusa dea-la neukose ala fali ma'is

¹⁰ Neukose fain-na losa, leoina-la tao matak neu manek esa, neme Dauk tititi-nonosin mai. Neukose ala mai neun, ma ala koa-kio mamana leleon-na.

¹¹ Nai faik ndia, neukose Manetualain pake la'i seluk koasan-na, fo no falik bei ela anan manai Asyur ma Masir-ra, nai nusa Patros, Sudan, ma Elam, nai Babel, Hamat, ma manai nusa dook-kala.

¹² Neukose Manetualain nasa'e dedeo esa, soaneu leoina-la. Ta'du-tanan nde ndia, foo nae Ana tao nakabubua falik leoina Israel ma Yehuda, fo manatapasasalak lai daebafak-ka bu'un lala'en-na, fo no falik-kasa.

¹³ Nusa Israel-la, ta nape'da dalek seluk no Yehuda, ma Yehuda ta musu seluk no Israel so'on.

¹⁴ Neukose lakabubua, fo ala sapu-la hataholi Filistin-nala nai muli, fo ala kalo leoina-la nai dulu. Neukose ala sengi Edom ma Moab, ma leoina Amon-na, neukose nakatele neus.

¹⁵ Neukose Manetualain tao nama'da Namo Suez-sa. Ana fe ani mato'bik-ka mai, nalosa Lee Efrat-ta ana da'di oe ba'e kaba'ok hitu, de hataholi manapake ta'bueis-sala, bisa lena tunga dalek.

¹⁶ Ba'eneu anan fo bei elak-kala, neukose hapu okofoo soaneu ala kalua leme Asyur mai, sama leo nai lelek Israel kalua neme Masir mai.