YEREMIA 8 - Susula Malalaok Hehelu Palak Ma Hehelu Beuk

¹ Nai tepo lelek ndia, mane-manek-kala, ma manapaleta manai Yehuda-la duin-nala, ma basa imam-mala, nabi-la ma laun Yerusalem fe'ek-kala duin-nala, nanakalua henik neme laten-nala dalek mai,

² ta soaneu latoi-latono seluk-kasa fa, te nanapo'ilotak nai dae lain, fo da'di kadafuk. Hataholi sila-la duin-nala, besenggela-besenggali lai le'do bulak, ma bana-manu fo ala taos da'di lamatua daebafak, fo ala sue-lais, lalalau-laoonos, ala sene-do'ok neus ma loke natutu'duk-ka, matan-na.

³ Boema hataholi bei maso'dak neme leoina mangalauk ia, fo nanatao tapasasalak leo basa mamanak lala'en-na, neukose ala lahiik mate neme laso'da mai. Au, fo Manetualain nde manakokolak-ka.”

Sala-singok ma huhukuk

⁴ Manetualain nadenu au afa'da anan-nala, ae leo ia, “Metema hataholi-a, ana tu'u neu soona, tao leo bee-o, neukose ana fo'a seluk, ma metema hataholi-a sala nai enok soona, tao leo bee-o, neukose ana fali ma'in.

⁵ Tehu tao le'e de emi, fo Au anang-ngala, la'ok sala makandondoo henin, ma la'oela Au? Emi ho'u mahehele neu emi sosongo-tatangom, de emi ta nau fali ma'im-ma leo Au mai fa!

⁶ Au amanene matalolole so, tehu emi ta nau kokolak tunga ndoo-na fa. Ta hapu hataholi esa boen, nai emi dalek, nasasale dale neu tatao-nono'i mangalaun-na fa. Ta hapu esa boen, fo nafa'da nae, ‘Au sala beek?’ Emi basa-basam-mala, tunga emi eno mesam-ma, sama leo ndala, ana sapu leo natee-natatik dale neu.

⁷ Manupui danoe-a boeo, ana bubuluk fai fafalin-na; manupui kateu-a, manupui lalao-a, ma koa boeo, ala bubuluk fai, fo ana lali mamanak. Tehu emi, fo Au anang-ngala, ta malelak hoholo-lalanek fo Au fen neu emi-a fa.

⁸ Emi mapalani la'iesak-kana mafa'da mae emi manatee-tenok, ma bubuluk Au hoholo-lalaneng! So'ba mete su'dik, tao leo beek, fo emi hataholi malelainam-mala nai agama dalek, tehu manatao peko-pakik-kala, ala nggati heni Au hoholo-lalaneng sila-la!

⁹ Basa hataholi manatee-tenok, fo manai emi tala'da heom-mala, neukose nananakamamaek. Neukose mopo manatee-tenon-nala, fo lala hihi'ik dale. Ala ta nau sipo Au nanoli-nafa'dang fa; besak ia, sila bei lanuu manatee-tenok beek-ka bai?

¹⁰ Hu ndia de, neukose Au fe sila tinan-nala leo dae lamatua fe'ek neu, ma Au fe sila saoinan nala, leo hataholi fe'ek neu. Sila basa-basas, ana-matua, sanga nanalak nenik eno peko-pakik. Lena-lenak nabi-la ma imam-imam-mala boeo, ke'di-ndiu hataholi.

¹¹ Ala mete Au anang-ngala bisun-nala soona, lae ka'da bisu anak mesan. Lafa'da lae, ‘Ah, ta hata-hata fa, basa-basas malole, ma ta hata-hata fa.’ Te se'kona, ta makandondook.

¹² Hai Au anang-ngala lemin, tunga ndoon-na, emi muse mae, nanahu emi tao basa hata fo, nananakamumulu-nakamamaek ndia so! Tehu emi makapapalulou, ma bibii-mamae tak-kala. Hu ndia de, neukose emi tu'u meu, sama leo hataholi fe'ek fo, manatu'u basak-kala so; metema Au huku emi soona, mopo emi dipom-ma.

¹³ Au ahiik anseli, tao akabubua Au anang-ngala, sama leo hataholi-a, tao nakabubua dae-oen buna-boan. Tehu Au anang-ngala, sama leo ai angol ma ai kaak boa tak-ka, lena-lenak doon-na boeo, male henin so. Hu ndia de, Au fe basa, hataholi nusa dea-la loak, fo ala koasa sila nusan-na so. Au, fo Manetualain nde manakokolak-ka.”

¹⁴ Manetualain anan-nala bekola lae, “Tao le'e de, ita ta tao hata-hata fa? Mai fo, basa-basa tala, talai leo nusa fe'ek, fo kotan-nala makota musuk, nemen-na ata mate nai naa. Ita Amam Manetualain naketu basa, nae muse mopo-mate ita. Ana fe basa ita laso, fo ita tinu, nana ita tasala-tasingo neun.

¹⁵ Palsuma la'iesak-kana, ita tamahena mole-dame, ma le'do-fai lea-haik-ka, nana hapuk-ka nde, ka'da naseti-nalakak mesak-kana.

¹⁶ Musu-a, nai kota Dan-na so; ndalan-nala lakadii, de tamanenen so, de basa nusak-ka lala'en-na, bii-lamata'u. Musu-a ana mai, fo tao nakalulutuk la'iesak ita nusan-na, boeo ita kotan-na, no basa laun-na.”

¹⁷ Manetualain nafa'da nae, “Taoafik leona, te besak ia, Au adenu menge-la leu leo emi tala'da heom meu, fo ala kaa emi, ma metema menge malasok-ka, ana kaa soona, mo'do-akidoon ta.”

Yeremia dalen-na he'dis-sa no dudu'a-dodoo leoinan-na

¹⁸ Au daleng-nga nono'ka bai nanasasa'dak, de he'dis-sa, au dale he'ding-nga, mo'do-akidoon ta.

¹⁹ Mamanene! Te nai nusak-ka lala'en-na nadodolo, au leoinang kii ma lakadii-lakau no latane lae, “Ade Manetualain ta nai Sion so'on do? Manen-na, besak ia nai bee so?” Manetualain, fo sila manen-na nataa nae, “Tao le'e de, o sene-do'ok neu lamatua daebafak-kala, fo sosoa-ndandaan ta makandondook ndia fa? Tao le'e de, o tao makahehe'dik Au daleng-nga, nenik sene-do'ok neu sosongo-tatangok-kala?”

²⁰ Hataholi Israel-la, laloo bebou lae, “Fai keketu-kokoluk, ma fai hanas-sa, besak ia seli so, tehu ita beita taso'da boen.”

²¹ Au daleng-nga nakalulutuk, nanahu au nggileo bobonging namahe'di belak; au daleng-nga he'dik, ma au daleng-nga ta tesa-tama fa.

²² Beek-ka nde tataon, de nalosa, losa besak ia, au leoinang, beita lea-hai boen? Ade nai Gilead lala'en-na, ta hapu dote, do mo'do-akidook fa do?