YEREMIA 7 - Susula Malalaok Hehelu Palak Ma Hehelu Beuk

Yeremia tui-benga nai Manetualain Uman

^1-3 Manetualain nadenu au, u leo Uman-na, fo au apadeik u lelesuina fo metema hataholi Yehuda-la mai sene-do'ok soona, ala tunga ndia. Ana nadenu au, po'a-benga hala hehelun-na nde ia, neus nae, “Tuka emi ha'da-paliim, ma emi so'dam-ma eno-dalan, soona Au, Manetualain Fo Manakoasa, fo Israel Manetualain-na, neukose fe emi loak leo mahele meme ia

⁴ Boso mamahele manake'di-ndiuk fo lafa'da lae, ‘Ita nee-nee lino-linok, Manetualain Uman ia. Tete'ek-ka, Manetualain Uman ia!’

⁵ Tuka emi so'dam-ma, ma emi ha'da-tataom. Esa tao ndoos ma matetuk neu esa.

⁶ Boso boe tuni-ndeni hataholi nusa dea, ni'iana kisa-anamaak ma faluina-la. Boso taomisa hataholi sala taak-ka, nai nusak ia. Boso sene-do'ok neu lamatua daebafak fe'ek-kala, nana dede'ak ndia, neukose tao namopo-namate emi.

⁷ Metema emi tuka emi so'dam-ma eno-dalan, ma emi ha'da-tataom, boema hahae tao basa sila-la soona, neukose Au fe emi loak, leo mahele nai nusak ia, nusak fo Au fen neu emi bei-ba'i kaim-mala, da'di leo dae pusaka.

⁸ Tehu, te'e-te'e palsuma la'iesak-kana, emi mamahele dede'a masapepeko-masandandalik.

⁹ Emi mamanako, manisa, hohonge, fe sakasii pepekok, fe tutunu-hohotuk neu Baal, ma sene-do'ok neu lamatua daebafak fo, emi ta malelak-kana fa.

¹⁰ Emi tao basa sila-la boema, emi mai leo Au mai, nai ia, fo nai Au Umang mesang-nga, de emi mafa'da mae, ‘Ami nee-nee lino-linok!’ Basa boema, emi tao makandoo, emi tatao-nono'i manggenggeom ndia.

¹¹ Ade emi mete Au Umang ia, da'di leo nakodaa-la mamana leleon do? Au ita la'iesak emi tatao-nono'im so.

¹² Meu leo Silo, kota fo makahulun-na, Au helen da'di mamana makaluku-makatele neu Au. Mete su'dik, hata fo Au tao basan, soaneu mamanak ndia, nanahu Au anang Israel sala-singon.

¹³ Leomae Au kokolak o emi la'inono'ik boe, tehu emi ta nau mamanene Au fa. Emi tao basa sala-singok sila-la, de metema Au aloo soona, emi ta nau mataa fa.

¹⁴ Nah, Au Umang fo emi masalai emi deam-ma, ma mamanak fo Au fen neu emi bei-ba'i kaim, ma neu emi ia, neukose Au taon, sama leo makahulun-na Au tao Silo-a.

¹⁵ Neukose Au usiheni emi, neme Au matang-nga mai, sama leo Au usiheni emi teidale-bobongim, fo hataholi Israel-la.”

Hataholi malanga batuk

¹⁶ Manetualain nafa'da nae, “Yeremia, boso hule-haladoi fe hataholi ia-la. Boso moke tutulu-fafalik, do hule-haladoi soaneus; boso makaseti Au, nana Au ta nau amanene dokodoek ndia fa.

¹⁷ O mita matam, hata fo ala taon nai kota-kota Yehuda-la, ma nai eno-enok manai Yerusalem-mala so!

¹⁸ Ni'iana-la hila ai, ma touk-kala lakafu'dik ha'i, ma inak-kala kame ha'desopuk, fo ala tao kokis fe lamatua daebafa inak, fo ala foin na'de, Ina Manek Nusa so'dak. Sila boeo, tunu-hotu fe lamatua daebafak fe'ek-kala angol, fo taok-kande lakahehe'dik Au daleng-nga.

¹⁹ Tehu te'e-te'e, sila lakahehe'dik-ka, ta nde Au fa, tehu sila dei, nalosa ala mae.

²⁰ Au, Manetualain Fo Mademaina, neukose Au po'a Au nasa-melu matuainang-nga neu uma makaluku-makatele ia, neu hataholi daebafak-ka ma bana-manu, boeo neu ai-la, ma daebafak-ka buna-boan. Neukose Au nasa-melung, ana pila lo'a-lo'a, sama leo ha'i fo, ta hapu taonisa fan.”

²¹ Manetualain nafa'da nae, “Hai Au anang-ngala lemin, emi bubuluk, mae tunu-hotuk fo emi tunun nai mei tunu-hotuk lain-na, muse tunun losa, ha'i na'a henin, ma emi bole mi'a tunu-hotu fe'ek-kala. Tehu Au, fo Manetualain afa'da ae, mi'a heni la'iesak-kana!

²² Lelek Au o emi bei-ba'i kaim-mala, kalua leme Masir mai-a, Au ta fes nakanenetek la'eneu tutunu-hohotu nanatunuk, do tutunu-hohotu fe'e-fe'ek-kala fa.

²³ Ka'da Au paletas, fo ala tunga Au, fo ela Au da'di sila Manetualain, ma sila da'di Au anang. Au adenus, fo laso'da tunga Au paletang-ngala, fo ela laua-lanale.

²⁴ Tehu ala ta nau lamanene, ma ta nau taoafik fa. Nakalenak, ala tunga ka'da sila hihii-nanau mesan fo matea ma mangalauk ndia. Ala ta da'di malole fa, te mangalaun-nala, boetai nakadelek-ka.

²⁵ Mulai neme emi bei-ba'i kaim-mala, kalua leme Masir mai, losa faik ia, Au adenu Au atang-ngala, basa nabi-la le'i leo emi leu tataas esa.

²⁶ Tehu ta hapu hataholi namanene, do taoafik neu fas. Nakalenak, emi boetai malanga batu, ma mangalauk lena heni emi bei-ba'i kaim-mala.”

²⁷ Basa boema Manetualain nafa'da nae, “Hu ndia de, hei Yeremia, leomae o mafa'da basa sila-la neu Au anang-ngala boeo, neukose ala ta taoafik neu o dede'a-kokolam fa. Leomae o maloos boeo, neukose ala ta lataa fa.

²⁸ Da'di mafa'das, mae sila nde been-na, leoina esa fo, ta nau tunga Au, fo sila Aman Manetualain fa. Ala ta nau lanoli neme hoholo-lalanek fo, lame'da litan so. Sila lilinekan neu Au-a, mopok-kana so, lena-lenak ala ta nau kokolak lilinekak ndia so'on.”

Tatao-nono'i mangalauk-ka nai Bafak Hinom-ma

²⁹ Manetualain nafa'da nae, “Wahai, laun Yerusalem-mala lemin, susa leona! Nggute-ma, emi langadoom-ma, fo tu'u henin leona! Makamee nakamee kii-makaleleuk nai letelepak-kala poin-na, nana Au, fo Manetualain, amanasa de Au tipa basa emi basa-basam-mala so.

³⁰ Hataholi Yehuda-la, tao basa tatao-nono'i mangalauk so. Sila sosongo-tatangon fo, Au ta ahiik sila-la, ala pe'das lai Au Umang dale, nalosa Au Umang-nga nanggenggeo.

³¹ Ala lapadedeik mei tunu-hotuk esa, nai Bafak Hinom-ma, soaneu ala tunu-hotu anan-nala, da'di leo tutunu-hohotu nanatunuk. Te se'kona, Au beita adenus tao dede'ak ndia fa, nakalenak, au beita dudu'a-dodoo la'e dede'a matak leondiak-ka fa.

³² Hu ndia de, neukose fain-na losa, ta loke mamanak ndia lae, Tofet, do Bafak Hinom so'on, te Bafak Nado'do-napauk. Neukose dae ndia da'di mamana natoi mamates, nanahu ta hapu mamana fe'ek fa.

³³ Sila popolan-nala, neukose ala da'di manupui-la, ma bana makaak-kala nana'an, fo ta hapu hataholi usi heni fas.

³⁴ Neukose nusak ia, ana da'di moo tokotiik. Neukose Au tao amopo hala namahoko-seteleek, ma halak manai feta ka'bing-nga, nai kota-kota Yehuda, ma nai eno-enok manai Yerusalem-mala.