YEREMIA 6 - Susula Malalaok Hehelu Palak Ma Hehelu Beuk

Musu nakahapi-na Yerusalem

¹ Hai hataholi Benyamin-nala lemin! Meu leo mamana fe'ek meu. La'oela Yerusalem leona! Puu pupuuk-ka nai Tekoa, ma tao mapila ha'i ta'du-tana nai Bet-Kerem! Soe matuaina, ana mai neme kii mai.

² Kota Sion-na, nalole-nanapu nanseli, tehu neukose, Manetualain tao nakalulutuk-kana;

³ manakoasa-la loo solda'dun-nala, neukose ala ofu lai naa Neukose, ala lofa sila tema lalaan-na, okofefeok kota ndia, boema esa-esak nai mamanak fo nahiik-kana.

⁴ Neukose lafa'da lae, “Ayo, maheheleaom leona, fo ata sapu-ta, Yerusalem! Mai fo, ata sapu-tan, nai faik ia boe!” Tehu basa boema, neukose lafa'da lae, “Wah, ita ta tasi'a fa, de le'do-a sanga tenak so, salao le'donosok-ka mulai namanalu so.

⁵ Malole lenak, ata sapu-tan, nai fai le'odaek, fo ata tao takalulutuk kota ndia, kota musun-nala.”

⁶ Manetualain Fo Manakoasa, Ana paleta basa manakoasa sila-la, fo ela ala lo'oheni ai-la, ma po'a tadodou dae, fo da'di mamana nanabik, fo ata sapu-ta, Yerusalem. Manetualain nafa'da nae, “Neukose Au huku kota ia, nanahu tuni-ndenik makadotok nanseli, da'di nai dalek so.

⁷ Sama leo oemata faa nahele oe neuk, leondiak boe, kota ndia nabuna-naboa nahele mangalauk-ka. Au amanene ka'da hala naseti-nalakak, ma nakodaa mesan, neme kota ndia mai; Au ita bisu ma he'di-laus-sa, nai mamanak lala'en-na.

⁸ Hei laun Yerusalem-mala lemin, tunga ndoon-na, basa toto'a-tataak sila-la, ala da'di nasanene'dak esa neu o! Boso nalosak Au la'oela emi, ma Au tao asafali emi kotam-ma, da'di moo solokaek, fo hataholi ta leo fan.”

Hataholi Israel-la hii ka'da tao musu

⁹ Manetualain Fo Manakoasa, nafa'da au nae, “Neukose Israel-langan-na, nananggeupolik losa dilak, sama-na leo osi angol fo, seu basa angol-la boan-na so. Hu ndia de, lelek bei hapu fai loak soona, soi-tefa-mala bei elak-kala.”

¹⁰ Boema au ataa ae, “Manetualain, au muse kokolak o see, ma au muse fe nasanene'dak neu see? Hataholi sila, langabatu lanseli, de ala ta nau taoafik fa. Ala hika ma ala ta hii O hala hehelum, fo au anduku-alosak-kana neus fa.

¹¹ O nasa-melum neu sila, ana pila lo'a-lo'a nai au aoinang dale boe, Manetualain! Ta hapu nakatatakak nala fan.” Boema Manetualain nafa'da nae, “Kalua nasa-meluk ndia, neu ni'iana manai okofoo-la lain, ma neu hataholi muli-soluk fo manamakabubuak-kala. Neukose ina-touk nanaho'un-na k, ma hataholi lasik-kala boeo, ta hapu laladeak fa.

¹² Neukose, uman-nala nanafe henik, leo hataholi fe'ek neu, leondiak boe, tina-nala ma saoinan-nala boe. Laun nusak ndia, neukose Au hukus.

¹³ Sila basa-basas, matua ana, ala sanga nanalak nenik eno ke'di-ndiuk. Nakalenak nabi ma imam boe, tipu-dai hataholi.

¹⁴ Ala mete Au anang-ngala bisun-nala soona lae, ka'da bisu anak mesan. Lafa'da lae, ‘Ah, ta hata-hata fa,’ basa-basan malole ma ta hata-hata fa. Te se'kona, ‘ta leondiak makandondook fa.’

¹⁵ Tunga ndoon-na, ala mae, nanahu ala tao basa, dede'a nananakamumulu-nakamamaek ndia so. Tehu lakapapalu lou, ma bibii-mamae tak-kala. Hu ndia de, neukose ala tu'da, sama leo hataholi fe'ek-kala boe; metema Au hukus soona, mopo dipon-nala. Au, fo Manetualain nde manakokolak-ka.”

Israel ta sipok Manetualain hehela-nonolen fa

¹⁶ Manetualain nafa'da anan-nala nae, “Mapadeik meu eno kaba'ek-kala, fo taoafik matalolole! Matane eno-enok makahulun eli-la, fo enok sila-la, beek-ka nde malole. Soona tunga enok ndia leona, fo ela emi maso'da no nee-nee lino-linok.” Tehu lafa'da lae, “Ta, ami ta nau tunga enok ndia fa!”

¹⁷ Boema Manetualain so'u manamanea la'inono'ik, fo fes nasanene'dak, fo ela lamanene pupuuk ta'du-tana liin-na. Tehu lafa'da lae, “Ami ta nau mamanene fa.”

¹⁸ Hu ndia de Manetualain nafa'da nae, “Mamanene leon, hai leoinak-kala lemin! Emi muse bubuluk hata fo, neukose ana da'di la'e Au anang-ngala.

¹⁹ Taoafik leon, hai daebafak-konei! Au anang-ngala, ta nau sipok Au nanoling-nga, ma ala ta nau tunga Au fa. Au fe soe-a la'es, fo da'di leo sila dale tutu'un-na, buna-boan.

²⁰ Sosoak hata, sila leni fe Au boomenik neme Syeba mai, do bumbu-bumbu-la leme nusa dook mai? Au daleng-nga ta hii sipo sila tunu-hotun fa. Au ta hii sila tutunu-hohotu nanatunun-na fa.

²¹ Neukose, Au tao-a hataholi ia-la lakatunu, fo ala tu'u leu. Neukose amak-ka, ma anak-ka, tia-laik ma uma titia-tataik-kala, basa-basas mopo-mate.”

Musu sapu neme kii mai

²² Manetualain nafa'da nae, “Leoina esa, ana mai neme nusa dook, fo nai kii. Ala mai fo latee-latati.

²³ Tafa-sisilon-nala nde kokouk ma tee; hataholi sila manalaun-na seli, ma ta lalelak do'o do ampon fa. Sama leo lii mapoponuk-ka ngguun-na, leondia boe, sila ndalan-nala ei ndu'un-na, nai lelek fo leu sapu-la Yerusalem-ma.”

²⁴ Laun Yerusalem-mala lamanenehalak ndia boema, bendole-bendaku. Bibii-namata'uk-ka sa'e-nalas, de ala doi-doso, sama leo inak-ka ana sanga bongi.

²⁵ Ala ta lapalani leu leo enok lain do leu leo tina leu fa, nana nai mamanak lala'en-na, musu-a leleuk tafa-sisilon.

²⁶ Manetualain nafa'da anan-nala nae, “Pake lafa lapik, fo lololi meu afu dale. Kii makaleleu no dale he'dik, sama leo hataholi-a, ana kii-makaleleu ana kisan-na mamaten-na, nana manatao namopo-namate emi-a, neukose ana sapu-na emi no kaiboik.”

²⁷ Boema Manetualain nafa'da Yeremia nae, “Fola Au anang-ngala, sama leo o fola liti-a. Palisak matalolole heheo-hihilun-nala!

²⁸ Sila basa-basas ta tunga paleta, ma langabatuk-kala, de langan-nala tean-na, sama leo liti ma besi-a. Ha'da-paliin-nala kaboo-kabalik, ma ala la'ok su'di leo bee leu soona, ala kokolak langgenggeo hataholi fe'ek na'den-na.

²⁹ Mamana natanoe liti-a, pila lo'a-lo'a so, tehu liti-a lulutun-na, ta nau noe fo mopo fan. Palsuma la'iesak-kana, fola Au anang-ngala nakandondoo henin, soaneu hapu tean-na, nana hataholi mangalaun-nala, ta nanasoli heok fa.

³⁰ Neukose sila na'den-na, nanafoik na'de, lilofulak nanatu'u-tapa henik, nana Au, fo Manetualain, tu'u-tapa henis so.”