YEREMIA 49 - Susula Malalaok Hehelu Palak Ma Hehelu Beuk

Huhukuk Ba'eneu Amon

¹ Manetualain nafa'da nae leo ia neu Amon, “Tao le'e de dae leo Gad ala loso lan ma hataholi manamamahele lamatua daebafak Milkom ala leo loon? Do ta hapu hataholi Israel fo nasala'e nggolok ndia?

² Tehu losa fain-na Au tao-a laun Raba, Amon kota inan ndia lamanene hala natee-natatik. Kota ndia da'di nakalulutuk ma nggolok-nggolok manai na-la nanahotu henik. Boema neukose Israel-la ho'i falik dae-na fo neme hataholi manaho'i na makahuluk-kala.

³ Hei hataholi Hesybon, kii leo nanahu nusa Ai-a nakalulutuk so! Hei anafe'o anak nusa Raba, kii leo! Pake si'di kalong da'di ta'du tana dale he'dik, malai kii-konak henuk no mapangamak. Neukose o lamatua Milkom-ma nanafoo nenik leo mamana ookak-ka sama-sama no basa manaho'u-paleta ma basa imam-mala!

⁴ Hei emi fo manalilineka tak! Tao le'e de emi madedema felak-kala fo leloaka? Hu beek nde emi koao neu emi su'i-beten! Neme bee mai emi hapu mafa'da mae ta hapu hataholi esa boen fo ana la'ban o?

⁵ Neukose Au fe mei makata'ak neme basa boboak lala'ena. Neukose emi malai, esa-esa sanga enok kalua fo so'dak, ma ta hapu falik esa nakabubua emi so.

⁶ Tehu nai fai makabuin-na neukose Au tao-a leoina Amon da'di neulauk. Au, Manetualain nde manakokolak-ka.”

Huhukuk ba'eneu Edom

⁷ Manetualain nafa'da nae leo ia neu Edom, “Ade hataholi Edom-mala ta hapu dudu'a-aafi neulauk fa? Hu beek nde emi manatee-tenom-mala ta fe seluk emi dudu'a-aafik! Basa sila eno dalan so!

⁸ Hei laun Dedan, lepos fo malai leon! Mu mafuni. Neukose Au tao akalulutuk Esau tititi-nonosin, hu ka nde sila fai huhukun-na losa so.

⁹ Hataholi manaseu boa angol-la soona neukose ana la'o ela nggelok, ma metema nako-a mai nai fai le'odaen-na soona neni ka'da hata fo nahiik-kana.

¹⁰ Tehu Au sapu balisi Esau tititi-nonosin hata-heton-nala ma Au afa'da sila mamana nafuni-nala; Sila ta hapu lafuni ao paan-na seluk. Hataholi Edom sama-sama loo tolanon-nala, ma titia-tatain-nala nanatao mate mopok ta ela esa boen fa.

¹¹ Hei Edom! La'o ela o ana kisa anamam-ma neu Au, neukose au akaboboi fo ela o ina falum-mala tu'u dalek neu Au.

¹² Hataholi fo ta nandaa huhukuk fa neukose ana hapu huhukuk boe, tao le'e de o ta? neukose o hapu huhukuk!

¹³ Au soo-supa emi nenik Au na'deng-nga mesak, neukose kota Bozra ana da'di mamana nakabibiik fo nana la'o elak. Neukose hataholi-la hika ma ala pake na'den-na da'di huhukuk. Basa nusa titia-tatain-nala da'di nakalulutuk losa dodoon-na. Au, Manetualain nde manakokolak-ka.”

¹⁴ Au Yeremia, afa'da, “Hei edom, Au sipo halak esa neme Manetualain mai, ana fe hataholi leo nggileo-bobongik fo ladenu lakakbubua soloda'du ma lena-la'ban o.

¹⁵ Neukose Manetualain tao-na o male, ma nananakadadaek neme hataholi-la mai.

¹⁶ O koam-ma tao-na namanggoa. Ta hapu esa boen fo ana bii o sama leo o dudu'a-aafim-ma. O leo nai batu maka'bik fo dook-ka nai lete poik. Tehu mae o tao uma nai mamana madema nanseli; deman-na sama leo manupui kaka-ka ndunun-na, Manetualain nakona o neme ndia. Manetualain fo nde nafa'da basa sila-la.”

¹⁷ Neukose Manetualain nafa'da nae, “Susa-soe fo manala'e Edom neukose belak-ka fo basa hataholi mana tunga ndia langgenge ma ala bii.

¹⁸ Sama leo Sodom ma Gamora nana tao nakalulutuk no nusa-nusak titia-tatain-nala. Edom boe leondiak, ta hapu esa boen fo ana leo nai na. Au, Manetualain, nde manakokolak.

¹⁹ Sama leo meoasu to'da neme lasi dale deka no Lee Yarden ma ana neu leo mook fo bi'i lopo-la mamana nana'an-nala, neukose au mai sama leondiak fo hataholi Edom-mala lalai la'o ela nusan no kaiboik anak. Boema neukose au hele hataholi malanga esa fo ana nalanga nusak ndia. Hapu see fo nakasasamak no au? See napalani tao dede'ak neu au? Ade hapu malangan esa fo ana bisa lena-la'ban au?

²⁰ Hu ndia de neme hata fo au sanga tao ba'eneu Edom, ma hata fo au tao ba'eneu laun kota Téman. Neukose anan-nala ala usi henis, ma neukose basa hataholi-la bii.

²¹ Edom tutu'dan-na, neukose lamanene makalupu matuaina fo basa daebafak-ka nanggengo; laun-nala ala lasa nggati fo halan-nala lamanene losa tasi Gelagah.

²² Sama leo manupui kaka'ka la'u nenik li'da lalapan-na, neukose musu mai sapu Bozra sama leondiak. Nai faik ndia soloda'du Edom-mala bii sama leo ina manabongik.”

Huhukuk ba'eneu Damsyik

²³ Manetualain nafa'da nae leo ia neu Damsyik. “Laun manai kota Hamat ma Arpad-tala bii lanseli hu ka nde lamanene hala mangalauk. Dalen-nala he'dis ma nalena langa pikok sama leo lii nai tasi lain.

²⁴ Laun Damsyik-kala da'di male, ma lalai leni bibii-momopon. Ala lame'da he'dis ma ala doi doso sama leo ina manabongik-ka.

²⁵ Kota nananitak ma makalupuk ndia besak ia sama leo nusa louk-kasa.

²⁶ Nai faik ndia ta'e anan-nala neukose mates lai eno-enok kotan-nala.

²⁷ Papala nanadamak manai Damsyik kala neukose au hotu henis ma uma-uma manek manai Benhadad Au tao a aputus. Au, Manetualain manaho'u koasa nde kokolak.”

Huhukuk ba'eneu laun Kedar ma kota Hazor

²⁸ Manetualain nafa'da nae leo ia neu laun Kedar ma Hazor dae koasan-na, fo nanaho'inak neme Nebukadnezar manek Babel, “Hei Nebukadnezar, la'ban laun Kedar ma tao momopo-mamate hataholi manai ndulu-la!

²⁹ Loso-ma bi'i lopon-nala, onta, boema lala teman-nala no oe isin, boema maloo mafa'das mae ‘Nako feo na emi so!’

³⁰ Hei emi hataholi Hazor, Au, Manetualain nafa'da nae: Malai lai-lai meu mafuni te Nebukadnezar manek Babel-la ala sanga tao musu no emi. Nafa'da nae,

³¹ ‘Teu leo! Mai teu tao musu neu hataholi fo manaleo no nenee lino-linok ndia. Sila kotan-nala nanananea tak hu ka nde lelesu inan ma ai betuban ta.’ ”

³² Manetualain nafa'da seluk Nebukadnezar, “Loso-ma onta-onta nala ma bana manun lala'en-na! Hataholi-hataholi langa doo nanangutek keke'uk sila neukose au fe henis leo mamana fe'ek neu. Neukose Au fe susa-soe ba'eneu emi neme basa mamanak lala'en-na.

³³ Neukose Hazor nada'bak losa dodoon-na ma ana da'di mamanak nafuni busa fuik. Ta hapu hataholi esa boe leo nai na. Au, Manetualain nde manakokolak.”

Huhukuk ba'eneu Elam

³⁴ Zedekia da'di manek Yehuda boema Manetualain fo manakoasa ana tui au nusa Elam.

³⁵ Manetualain nafa'da nae, “Neukose au tao isa hataholi manakou malelak-kala fo Elam namahehenak-kala.

³⁶ Neukose Au fuu anin-na leo Elam neme basa mamanak lala'en-na, ma Au fe laun-nala leu leo mamana fe'ek fo ta hapu nusak esa boen soaneu mamanak malaik neme Elam ndia.

³⁷ Neukose Au tao-a hataholi Elam-mala bii neu musu fo sanga tao nisa sila. Au amanasa nanseli, de neukose Au tao akalulutuk. Neukose Au fe soloda'du neulauk-kala fo leu latee-latatik loon losa basa la'iesak.

³⁸ Manek-kala ma manaho'u paleta-la neukose Au tao akalulutuk fo ela apadedeik Au kandela manek-ka nai sila nusan.

³⁹ Tehu fai makabuin-na Au tao atetu Elam. Au, Manetualain nde manakokolak-ka.”