YEREMIA 47 - Susula Malalaok Hehelu Palak Ma Hehelu Beuk

Manetualain hala haituan-na la'eneu nusak Filistin

¹ Manek Masir beita sapun-na Gaza boen te, Manetualain kokolak neu au la'eneu nusak Filistin-na.

² Manetualain nafa'da nae, “Mete mitak, oe-a faa neme kii mai ma ana lua ponu-ponu sama leo lee-a faan-na de ana lokan-na basa nusak-ka no basa oe isin lala'en-na, kotan-nala no basa laun-nala. Neukose hataholi-a nggasi loke tutulu-fafalik ma basa laun-nala kii-lamatani.

³ Neukose ala lamanene ndala-la bepaso, kaleta-la benggio-benggoto, ma ein-nala bendu'u. Neukose hataholi lasik-kala da'di tapandoes ma ala ta dudu'a-dodoo anan-nala so'on.

⁴ Losa fain-na ia so soaneu leoina Filistin nanatao namate-namopo la'i esak, de nalosa Tirus ma Sidon ta hapu tutulu-fafalik seluk fa. Au, Manetualain, neukose tao amate-amopo basa hataholi Filistin fo bei elak maneme Kreta mai-a.

⁵ Hataholi Gaza-la la'o la'di dale he'dik matuaina; Laun Askelon lamanggonggoak-kana. Hataholi Filistin fo bei elak-kala ala tei susa-dale he'di losa fai hi'da?

⁶ Emi nggasi mae, ‘O sapum-ma ami losa fai hi'da, hai Manetualain tafan-na? Fali mu'um-ma lo o mamanam dale mu fo mahele neme na no nene-lino-linok!’

⁷ Tehu ade hapu ana da'di mananenee-lino-linok, metema Au paleta basan so soaneu sapun-na Askelon ma laun manai tasi-a su'un do ta?”