YEREMIA 44 - Susula Malalaok Hehelu Palak Ma Hehelu Beuk

Manetualain hala-haituan soaneu hataholi Israel-la nai Masir

¹ Manetualain kokolak neu au la'eneu basa hataholi Israel fo manale'ok manai Masir-ra, fo nde manai kota Migdol, Tahpanhes, Memfis, ma nggolo-ta'duk manai kona-la.

² Manetualain Fo Manakoasa, fo Israel Manetualain-na hala-haituan-na nde ia neu sila, “Emi sakasii matam susa-soe fo Au tuni-ndeni neu Yerusalem ma basa kota fe'ek manai Yehuda. De losa besak ia boe kota-kota sila bei nai nakalulutuk-ka dalek de ta hapu hataholi leo fan.

³ Dede'ak ndia anan da'di nanahu laun-nala lasala-lasingo, de nalosa ala tao-la Au amanasa. Ala fe tutnu-hohotuk ma ala lakaluku-lakatele neu lamatua daebafak fo ala beita sene-do'ok lita fa, boema emi ma emi bei ba'i-kaim manamatem-mala.

⁴ Au haitua Au atang-ngala, basa nabi-la neu emi tatas esa, fo ala kena-ka'is boso tao-no'i mangalauk fo Au akamu-akadauk ndia.

⁵ Tehu emi ta nau namanene fas, ma ta nau tao afik neu fas. Emi ta nau hahae tao mangalauk fa, fo nde fe tutunu-hohotuk neu lamatuak daebafak-kala.

⁶ Hundia de, Au po'a Au nasa-melung neu Yehuda kotan-nala, ma eno-enok manai Yerusalem. Au hotuheni la'iesak-kasa de nalosa da'di ai-batu madodouk, ma tokotik sama leo hata fo mana mitak besak ia.

⁷ Ma besak ia Au, Manetualain Fo Manakoasa, fo Israel Manetualain-na, natane tao le'e de emi tao dede'ak fo neni susa-soe fo matua ina ndia neu emi aopam-ma. Ade emi nau tao namate-namopo la'iesak hataholi – inak, touk, ni'iana-la, ma ni'iana bongi beuk-kala de nalosa ta hapu ela hataholi esa boen nei emi leoinam-ma dalek fa?

⁸ Tao le'e de emi tao dede'ak fo ana taon-na Au amanasa? Emi mai de leo nai Masir, fo nusa dea ba'eneu emi ndia, boema emi songo-tango ma fe tutunu-hohotuk neu nusak ndia lamatua daebafan-nala. Ade emi nau tao makalutuk emi aopam-ma fo ela emi nananakaumulu-nakamamaek neme basa leoina manai daebafak ia lala'ena-na, ma emi na'dem-ma nanapakek da'di leo supa-sook do?

⁹ Ade emi masanggango heni basa mangalauk lala'en-na fo nanataok neme emi bei ba'ikai manamatem-mala, neme manek-manek Yehuda-la ma sila saoinan-nala, ma emi, ma emi saoinam-mala nai dae Yehuda ma nai kota Yerusalem enon-nala do?

¹⁰ Tehu losa faik ia emi tanau makaloloe-makadadae emi aopam-mala fa. Emi ta nau fe ha'da-holomata neu Au ma maso'da tunga hoholo-lalanek fo Au fen neu emi ma neu emi bei ba'ikai manamatem-malafa.

¹¹ Hundia de, Au, Manetualain Fo Manakoasa, fo Israel Manetualain-na neukose la'ban emi ma tao akalulutuk basa la'iesak Yehuda lala'en-na.

¹² Ma metema neme hataholi Yehuda fo bei elak-kala hapu lakisak dalen-nala fo leu lo Masir soaneu ala leo lai na soona, neukose mate-mopo la'iesak-kasa. Sila basa-basas ana matua, neukose mates nai Masir, nai natee-natatik-ka dalek do hukande la'a-ndoes-sa. Neukose hataholi litas soona, lame'da langgenggengo ao, ma neukose lakamumulu-lakamamaek-kasa. Sila na'den-nala neukose nanapakek da'di leo soo-supak.

¹³ Sama leo Au huku-doki Yerusalem, leondiak boe neukose Au huku-doki sila fo manaleok manai Masir. Neukose sila mates nai natee-natatik-ka dalek, hukande la'a-ndoes-sa do he'di-laus matuaina.

¹⁴ Neme hataholi Yehuda fo bei elak-kala, fo manaleu lo Masir leu-a soaneu ala leo lai naa, neukose hataholi esa boen ta nala deak do naso'da fa. Leomae hataholi sila-la lahik lanseli ala fali lo Yehuda neu, tehu dede'ak ndia ta da'di fa. Te'e-te'e neukose ta hapu ala fali fa, ta'da fe'ek ka'da hataholi manamai de'ubee.”

¹⁵ Boema hataholi mafandik nanseli mai lo au-a mai, fo nde basa touk lala'en-na fo lalelak lae, sila saoinan-nala fe tutunu-hohotuk neu lamatua daebafak-ka, ma basa inak lala'en-na fo manamapadeik manai ndia, fo nde hataholi Israel fo manaleok manai Patros, fo Israel boboan kona. Ala lafa'da neu au lae,

¹⁶ “Ami ta nau mamanene hata fo o mafa'dan neu ami pake Manetualain na'den-na fa.

¹⁷ Basa hata fo ami heluk-kala lala'en-na, neukose ami tao la'iesak-kasa boe. Neukose ami fe mahele tutunu-hohotuk neu Ina Manek nusa so'dak-ka, ma di'a angol oek da'di leo tunu-hotuk neun sama leo biasan-na nanataok neme ami bei ba'ikai manamatem-mala, neme manek-kala, neme ami mauli-malanga manapaletam-mala ma ami ia boe nai kota-kota Yehuda ma enok-enok manai Yerusalem-ma. Nai lelek ndia ami ta to'a-taa hata esa boen, te am manuu nana'a-nininu manadaik ma ami so'dam-ma natetu.

¹⁸ Tehu ami fe mate'e tutunu-hohotuk neu Ina Manek nusa so'dak-ka, ma ta di'a angol oek so'on da'di leo fefek neu fan, boema ami to'a-taa basa hata l'en-na; ami hataholim-mala mates nai natee-natatik-ka dalek do hukande la'a-ndoes-sa.”

¹⁹ Basa boema inak sila-la lafa'da lae, “Ami saotoum-mala lakaheik lae, ami tao loti fo lupa-ta'dun sama leo Ina Manek nusa so'dak-ka, ma tunu tutunu-hohotuk boema fe angol soaneu ami lamatua daebafan ndia.”

²⁰ Neu inak ma touk manamataak manae leondia, au afa'das ae,

²¹ “Ade emi maedaeng-nga Manetualain ta bubuluk do nasanggango heni tutunu-hohotuk fo nanatunu-hotuk neme mei bei ba'ikai manamatem-mala, neme manek-manek-kala ma emi mauli-malangam-mala ma nusak ia laun-nala ma neme emi ia mai boe, nai kota-kota Yehuda ma nai enok-enok Yerusalem fa do?

^22-23 Manetualainta nakatataak so'on Ana mete emi tunu-hotu tutunu-hohotukneu lamatua daebafak fe'ek-kala. Emi tatao-nono'im ndia mangalauk-ka ma sosoa-ndandaan ta. Emi masala-masingo basa neu Manetualain so, ma ta nau tunga neu paletan-nala fa. Hundia de besak ia emi nusa namom nakalulutuk so, de nalosa tapu leon fa, ma na'den-na nanapakek da'di leo soo-supak. Hataholi fo litan lame'da langgenggengo ao.”

^24-25 Boema au afa'da neu basa hataholi sila-la, makasososan-na neu basa ina-la ae, Manetualain Fo Manakoasa nafa'da nae leo ia neu hataholi Yehuda-la fo manaleok manai Masir-ra nae, “Emi ma emi saoinam-mala ala soo-supa basa neu Ina Manek nusa so'dak-ka mae, neukose emi tunu-hotu tutunu-hohotuk ma tunu-hotu angol oek neun so. Emi hehelum ndia emi tao natetun so. De malole! Tao-no'i hata fo emi heluk ndia!

²⁶ Tehu besak ia mamanene hata fo Au afa'dan neu emi, hai hataholi Israel manai Masir lemin; Au, Manetualain, soo-supa unik Au na'deng-nga fo matua-madema de Au ta po'i emi pake Au na'deng-nga soaneu tao naheluk esa so'on. Emita bole mafa'da mae, ‘Au soo-supa unik Manetualain fo maso'dak-ka!’

²⁷ Nekose Au ulepo'de fo ela emi tu'da-monu ma so'dam-mala ta neulauk fa, losa mate la'iesak emi nai natee-natatik-ka dalek do nau hukande hedi-laus matua ina.

²⁸ Kada hataholi de'ubee neukose laso'da, de ala fali leme Masir lo Yehuda leu. Boema basa hataholi Yehuda fo bei manai Masir-ra lita ade sila kokolan-na do Au kokolang-nga nde da'di mata nitak-ka.

²⁹ Neukose Au uni susa-soe neu emi nai mamanak ia, soaneu ana da'di ta'du neu emi nae, huhukuk fo A dudu'a-dodoak soaneu emi-a te'e-te'e neukose ana da'di.

³⁰ Hofra fo manek Masir-ra neukose Au fenneu musu-la fo lahiik ala tao lisan, sama leo Au fe Zedekia fo manek Yehuda neu Nebukadnezar fo manek Babel-la, fo ndia musun-na fo nau taonisan ndia.”