YEREMIA 4 - Susula Malalaok Hehelu Palak Ma Hehelu Beuk

Nalolook soaneu tuka tei-sale dale

¹ Manetualain nafa'da nae, “Au anang Israel, metema emi nau fali ma'im-ma soona, fali ma'im-ma, leo Au mai leona. Tu'u-tapa heni sosongo-tatangok fo, makahulun-na Au ta ahiik-kasa ndia, fo lilineka neu Au leona.

² Metema soo menik Au na'deng-nga, ma emi maso'da tunga ndoon-na, ndoos ma matetuk, soona basa leoina lala'en-na, neukose loke Au, fo ela Au fes baba'e-papalak, fo neukose ala koa-kio Au.”

³ Manetualain nafa'da laun Yehuda-la, ma laun Yerusalem-mala nae, “Foi-fala emi daem fo nanafoi-fala beitak-kala; boso sele-nggali bini-ngges nai mamanak fo, na'u-aiana nggauk-ka, ana moli nai ndia.

⁴ Hei laun Yehuda ma laun Yerusalem-mala lemin! Ho'u mahele emi hehelu-balataam moo Au, fo emi Manetualaim-ma, ma fe hehelik o aoinam-ma neu Au. Metema ta, soona neukose Au nasa-melung ana lua ponu-ponu fo nana'a, sama leo ha'i-a, fo su'di see boe, ana ta hapu taonisa fan. Neukose basa sila-la, tuni-la emi, nanahu emi tatao-nono'i mangalaum-mala.”

Yehuda hapu nasanene'da mahelek

⁵ Puu pupuuk-ka leona, nai basa nusak-ka lala'en-na! Maloo bou-bou no mangale'dok, ma mapane'e. Madenu laun Yehuda, ma laun Yerusalem-mala, fo lalai leo kota-kota fo, makota musuk-kala leu.

⁶ Matu'du enok leo Sion, fo Manetualain Pupukun-na neu, la-lai, malai la'oela nusak-ka, boso ka'da pe'daaom. Manetualain fe soe-a mai ma nakalulutuk matuaina neme kii mai.

⁷ Sama leo singa, ana kalua neme mamana keke'ken-na mai, leondiak boe, leoina fo manatao nakalulutuk-ka, ana la'o so ana mai, fo ana sanga tao namopo-namate Yehuda. Kota-kota manai Yehuda-la, neukose ala lakalulutuk da'di batu madodouk mamanak fo, hataholi ta leo fan.

⁸ Hu ndia de, kii ma makaleleu leona, pake lafa lapik, da'di leo ta'du-tana dale he'dik. Nanahu Manetualain nasa-melun manalua pono-ponun-na, ana beita tenak neme Yehuda mai fa.

⁹ Manetualain nafa'da nae, “Nai faik ndia, manek-kala, ma manaho'u paleta-la, neukose mopo manggaten-nala; imam-mala dele, ma nabi-la, nggenge-la.”

¹⁰ Boema au afa'da ae, “Manetualain Fo Mademaina, O ke'di-ndiu basa hataholi Yehuda-la, ma laun Yerusalem-mala so! O mafa'da, mae neukose hapu mole-dame, te se'kona besak ia, ami so'dam-ma, nai tafaina pe'dan-na.”

¹¹ Neukose fain-na losa, fo hataholi Yehuda-la, ma laun Yerusalem-mala hapu halak, nae ani mato'bik-ka ana mai neme moo solokaek-ka mai, fo nasale leo ita mai. Anin ndia, ta anin biasa, fo ana fuu neni ka'da ha'deuk-ka mesan-na fa,

¹² tehu anin mabe'i-balakaik, fo no Manetualain mesak-kana paletan-na, de ana mai, fo naketu anan-nala huhukun-na.

Musu-a nakahapin-na Yehuda

¹³ Mitak musu-a, ana to'da mai, sama leo ko'as-sa. Kaleta musun-nala, sama leo ani-sangu matuaina, ndalan-nala nggafan-na lena heni manupui kaka'ka. Wah, ita soe! Ita mopo-mate!

¹⁴ Yerusalem, tu'u-tapa heni dudu'a-aafi mangalauk-ka, neme o dalem dale mai, fo ela o hapu maso'da. O sanga pe'da dudu'a-aafi mangalauk sila-la nai o dalem dale, losa faihi'da?

¹⁵ Hataholi nadedenuk fo maneni halak mangalauk, ala mai leme kota Dan-na, ma leme letelepak Efraim-ma mai so.

¹⁶ Ala fe nasanene'dak neu leoinak-kala, ma lafa'da laun Yerusalem-mala, lae musu-a ana mai neme nusa dook mai. Neukose ala eki, eeki musu-a soaneu Yehuda kotan-nala,

¹⁷ ma lakahapi-la Yerusalem, sama leo hataholi-a nanea tina. Basa sila-la ala da'di, nanahu leoina Yehuda, ana ta tunga Manetualain paletan-na fa. Manetualain nde manakokolak-ka.

¹⁸ Yehuda, o nde tataom soe ndia la'e o-a. O so'dam-ma eno-dalan, ma o tatao-nono'im nde taon-na basa doidosok sila-la, ala papau o dalem-ma.

Yeremia dalen-na he'dis no dudu'a-dodoo Manetualain anan-nala

¹⁹ Au daleng-nga doi-doso nanseli, au ta akatatakak doidosok-ka so'on. Au ta ka'i abe'i au daleng-nga fa au teneng-nga hako, nai au fanang dale. Nana au amanene pupuuk-ka nalii, ma eeki musu-a, nadodolo

²⁰ Soe-a, ana mai la'inono'ik de ana tao nakalulutuk nusak-ka lala'en-na. No kaiboik, au lalaa temang-nga nanatao nalutuk, teman-nala nanasisii nakalulutuk.

²¹ Au muse sakasii hataholi-a natee-natati neni mamate-momopon, losa faihi'da? Au muse amanene pupuuk-ka lii matanen-na losa faihi'da?

²² Manetualain nafa'da nae, “Au anang sila-la, dudu'a-aafi taak-ka, ala ta lalelak Au fa. Sila sama leo ni'iana nggoa-panganaa mesan dudu'a-aafi manadain ta faaanak boen; malelainan-nai mangalauk-ka dalek, manada'di tak, nai tatao-nono'i malole dalek.”

Ninitak la'eneu susa-soe

²³ Au mete leo daebafak-ka neu, au itan louk, ma tokotiik, au anganalo leo lalai neu, ta hapu hata nasalaa fa.

²⁴ Au ita letek ma pupuku mademaina-la langgengo matuainan-nanseli

²⁵ Au ta ita hataholi daebafak fa, manupui-la boeo, basa-basas ala laa so

²⁶ Dae malolek-ka, ana da'di moo solokaek tuuk kota-kota-la lakalulutuk, de ala da'di ai batu mana tapasasalak, nanahu Manetualain namanasa anan-nala nanseli. (

²⁷ Manetualain nafa'da, nae neukose daebafak-ka lala'en-na, ana da'di moo solokaek, tehu neukose, Ana ta tao namopo-namaten makandondook fa.)

²⁸ Neukose daebafak-ka teisusa dale he'dik, lalai-a makahatu kiu-kiun-na. Manetualain kokolak basa de neukose, ta nasafali dale tutu'un-na fa. Ana ho'i basa nakeketuk so, de neukose, ta nakadedeak nggani eik esa boen.

²⁹ Solda'du manasa'e ndala-la, ma manakouk-kala nakoten-nala, nananamanenek, de taon-na, hataholi-a esa-esak nalai, de bafan ka'u-ka'u. Ala masok leo nula-la dalek leu, ma ala kae pupuku batu-la. Basa kota-la, ala da'di nee-nee lino-linok, hataholi ta nau leo nai ndia so'on.

³⁰ Hai Yerusalem, o nanalaoelak so, de o ta hapu tao hata-hata esa so boen! Sosoak hata, pake ba'du pilas ma balias aoinam-ma nenik lilopilas, lilofulak, boema lose badaak neu o mata lou laim-ma? Palsuma la'iesak-kana, o balias o aoinam-ma, nana basa o susue tou-ta'em ina-anafe'om-mala ta litu o so'on, nakalenak, ala nau taolisa o

³¹ Au amanene hala hoo-nggu'uk-ka sama leo inak fo, ana sanga bongi; sama leo anafe'oanak-ka, bongi ana makasososan-na, Yerusalem kii de hahaen-na nakase'e leondiak. Liman nggape-nggape, ma nahoo nae, “Soe ba'eneu au – musu-a, sanga taonisa au!”