YEREMIA 38 - Susula Malalaok Hehelu Palak Ma Hehelu Beuk

Yeremia nai oedolu-a dalek fo ma'dak

^1-3 Manetualain nadenu au afa'da hala haituak ia neu laun-nala. “Neukose kota ia au fen neu soloda'du Babel-lala, ma neukose sila tao lakalan. Se leo nai kota dalek soona neukose maten nai natee-natatik-ka dalek, ado hukande la'a-ndoes-sa do he'di-laus matuaina. Tehu se kalua fo ana fe ao inan-na neu hataholi Babel-lala soona, neukose nanatao nisa tak; samanen-na neukose naso'da.” Sefaca fo Matan anan-na, Gedalya fo Pasyhur anan-na, Yukhal fo Selemya anan-na, ma Pasyhur fo Malkia anan-na basa-basas lamanene basa hata fo au afa'dak ndia.

⁴ Boema asa mauli-malangan sila-la leu lo manek-ka de lafa'da lae, “Hataholi ia muse nanahuku nisak. Nana no hala-kokolan leondiak-ka de, ana taon-na basa soloda'duk-kala ma hataholi fe'ek fo ala bei leo nai kota ia aon-nala ma'a. Ana ta tulu-fa laun-nala fa te, ka'da ana tao nakatoto'a-nakatatak-kasa.”

⁵ Manek Zedekia nataa nae, “Hei! Taon sama leo emi dale hihiim-ma, te au ta kena-ka'i emi fa.”

⁶ Boema ala ho'i-la au de lakona au nenik tali lo manek-ka ana manen Malkia oedolu dalek neu fo nai uma manek-ka so'dan-na. Oedolu ndia oen ta, te ka'da tane-tane mesan, de au masok lo tane ndia dale neu.

⁷ Nai lelek ndia hapu hataholi Sudan esa na ito-ato nai manek-ka uma manen-na. Na'den-na Ebed-Melekh. Ana namanene nae ala tao au lo oedolu ndia dalekneu. Ndia te manek-ka bei mauli-malanga laun-nala nai Benyamin lelesu ina-na.

⁸ Ebed-Melekh neu lo na de nafa'da neu manek-ka nae,

⁹ “Ama Manek fo mandela-masa'ak, hataholi sila-la tatao-nono'in-nala ta malole fa. Ala tao nabi Yeremia lo oedolu dale neu; Tao leo bee neukose maten no la'as-sa nai ndia, nana nana'a-nininuk basan nai kota ia so.”

¹⁰ Boema manek paleta Ebed-Melekh nae, “Mo hataholi telu fo kaluheni Yeremia neme oedolu ndia mai bei dai ana beita mate fa.”

¹¹ Boema Ebed-Melekh no hataholi kateluk sila lo uma manek-ka mamana pepe'da bua-lo'an-na neu, de ala ho'i bua-lo'as palak neme ndia mai, boema ala lakonan pake tali lo au-a mai nai oedolu dale.

¹² Ebed-Melekh nadenu au tao bua-lo'as sila nu au lilibolong-nga da'di neu tata'dak, fo tao ka nde tali-a boso tao-na au he'dis. Boema au tunga Ebed-Melekh paletan-na.

¹³ Boema ala le'a au lo lain, kalua neme oedolu ndia mai. Basa ndia boema au nanatahan nai uma manek ndia so'dan-na.

Zedekia noke dudu'a-aafi malole neme Yeremia mai

¹⁴ La'e fai fe'ek esa boema manek Zedekia nadenu hataholi mai nala au, fo au u atan nai lelesu ina katelu-a nai Manetualain Uman. Ana nafa'da au nae, “Au nau atane neu o, de o muse matan no mangale'dok. Boso mafuni hata esa boen.”

¹⁵ Boema au ataa ae, “Metema au afa'da tunga ndoon-na soona, tao leo beo Ama Manek naketu huhuku nisak neu au; ma metema au fe hala-kokolak malole soona, Ama Manek ta nau tunga au hala-kokola malole ndia fa.”

¹⁶ Manek Zedekia ana helu au no nafufunik, nae, “Nenik Manetualain fo maso'dak-ka, Manetualain fo manafe so'dak neu ita, au supa-soo ae, au ta tao isa o, do au fe o neu hataholi fo mananau tao nisa o-a.”

¹⁷ Boema au afa'da neu Zedekia ae Manetualain Fo Manakoasa, Manetualain fo nanasene-do'ok neme hataholi Israel-lala nafa'da nae leo ia, “Metema o sene-do'ok neu manek Babel-la mauli-malangan-nala soona, neukose o nanatao nisa tak, ma neukose kota ia boeo nanahotu-heni tak. O mo o uma isim-mala boeo neukose maso'da.

¹⁸ Tehu metema o ta nau sene-do'ok neu fas soona, neukose kota ia ana tu'da lo hataholi Babel-lala liman dale neu. Neukose ala hotuhenis losa basa la'iesak-kana, ma neukose o ta maladeak fa.”

¹⁹ Boema manek-ka nataa nae, “Au bii neu hataholi-la fo ita leoina fo manamalaik de look hataholi Babel-lala. Boso nalosak neukose ala fe au lo sila neu fo lakatoto'a-lakatataak au.”

²⁰ Boema au ataa ae, “Ta, Neukose ala ta fe Ama Manek lo sila neu fa. Au dokodoe no namahehenak, fo ela Ama Manek tunga Manetualain hala haituan-na; meten te basa lala'en-na lamadai, ma neukose ala ta tao lisa Ama Manek fa.

²¹ Tehu metema Ama manek ta solokao inan-na neu fa soona, Manetualain fe basa ninitak neu au so, la'eneu hata fo neukose ana da'di.

²² Nai ninitak ndia dalek, au ita inak-inak fo bei manai Yehuda uma manen-na basa-basas nanafoo nenik lo deak neu fo leo manek Babel-la mauli-malangan-nala neu. Ala bei la'ok, te lafa'da lae, ‘Manek-ka nananakadadaek neme tia-lai dedenan-nala mai, ma ala koasa-nan. Besak ia, basa ein-na sapi lo'do lo lane dale neu soona, sila basa-basas lakano'dok.’ ”

²³ Au afa'da seluk ae, “Basa Ama Manek sao anan lala'en-na neukose nananenik lo deak neu, lo hataholi Babel-lala. Ama Manek boeo neukose ta mala deak neme sila mai fa. Ama Manek-ka neukose nanaho'u nak neme manek Babel-la mai, ma kota ia nanahotu-heni la'isak-kana.”

²⁴ Boema Zedekia nafa'da nae, “Boso mafa'da neu esa boen la'eneu ita dua nakokola aon ia, fo ela o aopam-ma boso nanafepa-li'uk.

²⁵ Nai lelek basa mauli-malangan-nala lamanene lae, au kokolak o o, soona neukose ala mai malatane neu o la'eneu ita nakokola aon-na. Neukose laketu soaneu ala ta tao lisa o fa, metema o tui la'iesak basa-basan neu sila.

²⁶ Ka'da mafa'da mae o fufu'di-oo'dok au fo ela au boso haitua falik o lo bui dale fo mate o nai naa.”

²⁷ Makabuin-na beita dook-ka boen te basa mauli-malangan sila mai de betane-betane neu au. Au afa'da neus sama leo manek-ka paletan neu au-a. No enok ndia, te ala ta hapu tao hata-hata esa boen, nana ta hapu hataholi esa boen fo ana bubuluk manek-ka kokolak no au ndia.

²⁸ Au nanatahan nahelek nai uma manek-ka so'dan-na, losa faik fo musu-a natona-na Yerusalem.