YEREMIA 37 - Susula Malalaok Hehelu Palak Ma Hehelu Beuk

Zedekia dokodoe neu Yeremia

¹ Nai lelek Nebukadnezar fo manek Babel-la ana kalua heni Yoyakim anan Yoyakhin, boema ana so'u Zedekia fo Yosia anan-na da'di manek Yehuda.

² Tehu leomae Zedekia no basa mauli-malangan-nala, ma ndia laun-nala ta nau tunga Manetualain hala hehelun-na fo ana fen tunga Au ndia fa.

³ Manek Zedekia nadenu Yukhal fo Selemya anan-na, ma Imam Zefanya fo Maaseya anan-na soaneu noke au hule-haladoi neu Amak Manetualain soaneu leoina paluk-ka.

⁴ Nai lelek ndia te ala beita tao au lo bui daleneu fa, de au bei hapu loak la'ok su'di leo bee neu-a nai laun-nala tala'da.

⁵ Babel-la soloda'dun-nala bei sapu-la Yerusalem, tehu ala lamanene lae, Masir soloda'dun-nala ala mai leme Masir mai so, soaneu latee-latati boema, ala lakadedeak.

⁶ Manetualain, fo Israel Manetualain-na, nadenu au

⁷ afa'da ae leo ia neu manek Zedekia hataholin nadedenun-na: “Mafa'da neu Zedekia, mae, ‘Soloda'du Masir-rala fo ala bei bela'o mai lo ia mai fo soaneu tulu-fali o, te neukose ala fali fo le'us.

⁸ Boema neukose hataholi Babel-lala fali ma ala sapu-la kota ia, boema ala tao lakalan ma ala hotuhenin.

⁹ Au, Manetualain, fe emi nasanene'dak, fo ela emi boso ke'di-ndiu seluk emi ao paam-ma nenik dudu'a mae, hataholi Babel-lala e'us de neukose ala ta fali fa. Nana tao leo beo neukose ala fali ma'is.

¹⁰ Leounik-ka emi tao makala la'iesak soloda'du Babel-lala, de nalosa elak-kala ka'da hataholi fo hina-nala matuina-la nai lala teman-na dalek, tehu ala fo'a de ala hotuheni basa kota ia.’ ”

Ala ho'u-la Yeremia de ala taon lo bui dale

¹¹ Soloda'du Babel-lala lakadedeak neme Yerusalem mai, nanahu soloda'du Masir-rala lakababale ao leu lo kota ndia neu.

¹² Boema au la'o ela Yerusalem de au u lo Benyamin nggolo-ta'dun neu soaneu sipo au baba'e dae-oe neme au tolano-ka'a-fading mai.

¹³ Tehu nai lelek au losa Benyamin lelesu inan-na boema, malangan soloda'du fo manamanea manai ndia, ana ka'i-na auma nafa'da nae, “O sanga malai fo mu mok hataholi Babel-lala!” (Malanga soloda'du manamanea ndia na'de Yeria; ndia nde been-na Selemya anan fo Hananya upun.)

¹⁴ Au ataa ae, “Ta tete'ek fa! Au ta dudu'a ae alai fo ok musunok-ka fa.” Tehu Yeria ta nau namanene fa. Ana ho'u-na au de no au u ata mauli-malanga manapaletak-kala.

¹⁵ Lamanasa lanseli neu au, de ala paleta fo ela au nanafepa-li'uk ma nanakenak nai Yonatan Uman, fo manasula-sulan-na. Uman ndia ala taon da'di kaman-na bai.

¹⁶ Ala tao au lo lifu esa dalek nai dae dale, ma ala tahan au dook-ka nai ndia.

¹⁷ Makabuin-na boema manek Zedekia nadenu hataholi no au u ata nai uma manek-ka. Nai ndia no nafufunik ana natane neu au, ade hapu hala-haituak neme Manetualain mai. Au ata ae “Hapu.” Boema au tama seluk ae neukose “Ama Manek nanafek lo manek Babel-la.”

¹⁸ Basa ndia boema au atane, “Ade au mangalaung-nga leo beek neu lamatuak-ka, do neu Ama Manek-ka mauli-malangan lala'en-na do neu laun-nala, de nalosa Ama Manek-ka tapan lo bui ia dalekmai?

¹⁹ Ama Manek-ka nabin sila-la basa-basas laibee, fo lafa'da lae, neukose manek Babel-la ta sapun-na Ama Manek-ka ma nusak ia fa?

²⁰ Besak ia, Ama Manek fo mandela-masa'sak, sa'di leo been-na mamanen au dokodoeng ia. Ama Manek boso haitua falik au fali lo bui manai Yonatan uman ndia, te boso nalosak mate au nai na.”

²¹ Boema manek Zedekia paleta fo ela au nanahukuk nai uma manek-ka so'dan-na. Da'di au leo nai ndia, de su'di faik ala fe loti neme mamana tatao loti-a losa loti nanasadiak manai kota ndia basa la'isak-kasa.