YEREMIA 36 - Susula Malalaok Hehelu Palak Ma Hehelu Beuk

Barukh les susula nanalunuk nai Manetualain Uman

¹ Neu teuk kahaan-na Yosia anan Yoyakim da'di basa manek nai Yehuda boema, Manetualain nafa'da neu au nae,

² “Ho'im-ma susulak nanalunuk esa, fo sulak-kana nai ndia basa hata fo Au afa'da basan neu o la'eneu Israel ma Yehuda, ma la'eneu basa leoina lala'en-na. Sulak ma laiesak Au hala-kokolang ndek lelek Au kokolak makasososang neu o-a nai manek Yosia paletan-na tepo-lelen-na losa faik ia.

³ Fafa'kama hataholi Yehuda-la neukose ala tao hahae mangalauk, metema ala lamanene la'eneu basa susa-soe fo neukose Au tuni-ndeni neu sila. Soona neukose Au fe do'o do ampong neu sila salan-nala, ma mangalaun-nala.”

⁴ Hundia, de au alo Neria anan Barukh fo ana nafa'da sulak fe basa hata fo Manetualain nafa'dan neu au ndia. Boema Barukh sulak na basa-basas neu susulak nanalunuk ndia.

⁵ Makabuin-na boema au fen paleta nde ia neun ae, “Au ta fe loak mu lo Manetualain Uman dale neu fa.

⁶ Hundia de hataholi-la fai oka aon-na losa soona, o muse mu lo naa mu fo lees-sana no hala matuaina basa hata fo au afa'dan neu o ndia, fo ela ala lamanene basa hata fo Manetualain nafa'dan neu au-a. Tao no'i ndia nai mamanak fo hapu nananamanenek neme basa hataholi fo manai Manetualain Uman dale-a, fo nde hataholi Yehuda fo manamaik neme sila kotan-nala mai.

⁷ Fafa'kama no enok ndia, fo ala hule-haladoi neu Manetualain, ma ala tuka tei-sale dale neme sila tatao-nono'i mangalaun-nala mai. Manetualain namanasa nanseli nos, de ana fepa-li'us.”

⁸ Boema Barukh lees Manetualain dede'a-kokolan ndia nai Manetualain Uman, sama leo au paletak-ka neun nana.

⁹ Yoyakim fo manek Yehuda ana paleta, boema neu teuk kaliman-na bulak kasio-a, laun-nala oka aon-nala soaneu ala hapu susue-lalaik neme Manetualain mai. Yerusalem laun-nala ma hataholi-hataholi fo manamaik neme Yehuda kotan-nala mai-a basa-basas oka aon-nala.

¹⁰ Boema Barukh lees basa hata fo Au afa'dan nai susulak nanalunuk ndia dalek-ka boema lamanenen. Lelees ndia, nanalees nai Manetualain Uman, fo nai Safan anan Gemarya kantor-a. Kantor ndia mamanan-na pasan manai lain-na, deka enok masok lo lelesu ina beuk manai Manetualain Uman-na.

Susulak nanalunuk nanalees neu basa anaho'u paleta lala'en-na

¹¹ Mikhaya, fo Gemarya anan fo Safan upun-na namanene Barukh lees Manetualain hala-kokolan neme susulak nanalunuk ndia mai-a.

¹² Boema ana neu lo uma manek-ka manasulan-na kantor-a neu. Basa malangan nala lakabubua de bekola lai ndia. Semaya anan Delaya, Akhbor anan Elnatan, Safan anan Gemarya, Hananya anan Zedekia, Elisama fo hataholi manasulak ndia, ma malanga fe'ek-kala lai ndia.

¹³ Mikhaya nafa'da neus la'eneu basa hata fo Barukh lees-sana nai Manetualain Uman-na.

¹⁴ Boema basa malanga sila-la ladenu Yehudi (fo nde Netanya anan-na, fo Selemya upun-na, fo Kusyi melun-na) neu lo Barukh neu fo paletan soaneu ana mai ma neni fes susulak nanalunuk fo ana lees basa ndia.

¹⁵ Boema sila lafa'dan lae, “Bole mangatuuk,” “Lees fe susulak nanalunuk ndia neu ami.” Barukh tunga boe.

¹⁶ Ana lees basa boema sila esa nasale esa no dale tapandoes, boema lafa'da Barukh lae, “Ami muse mafa'da dede'ak ia neu manek-ka.”

¹⁷ Basa boema ala latane lae, “So'ba mafa'da su'dik-kana neu ami enon-na leo beek de o sulak ma basa iala. Ade Yeremia nde nafa'da o-a do?”

¹⁸ “Tete'ek-ka, basa dede'ak fo nanasulak nai iala Yeremia nde nafa'dan neu au-a, boema au sulak-kana nenik tinta neu susulak nanalunuk ia,” Barukh nataa nae leondia.

¹⁹ “O mo Yeremia muse mafuni. Boso fe hataholi bubuluk emi mamana nafunim ndia,” ala lafa'da lae leondia.

Manek-ka hotuheni susulak nanalunuk ndia

²⁰ Basa malanga sila-la pe'da susulak nanalunuk ndia nai Elisama fo manasulak sulak ndia kaman dale, de basa boema, neu lo manek de nafa'da basa sila-la.

²¹ Boema manek-ka nadenu Yehudi soaneu ho'in-na susulak nanalunuk ndia. Ana ho'i nan neme Elisama kaman dale mai boema, Yehudi lees-sana neu manek-ka, ma neu basa mauli-malanga fo bei manamapadeik okofefeo manek-ka.

²² Ndia te bulak kasio-a, ma manek-ka nangatuk nai ha'i-a matan, fo nai uma manek-ka, lae fai makalinik.

²³ Yehudi bei lees basa dalak telu do haa te manek-ka kena nanalees basak ndia, nenik dope anak esa de ana tapan leo ha'i dale neu. Ana tao leondiak nakando losa susulak nanalunuk ndia nanahuto-heni la'iesak.

^24-25 Leomae Elnatan, Delaya, ma Gemarya dokodoe no namahenak nanseli, fo ela manek-ka boso hotuheni susulak nanalunuk ndia, tehu ana ta nau namanene fas. Leomae manek-ka do basa mauli-malangan fo manamamanene susulak ndia isin-na boeo, ala ta bii do lasasale dale fa.

²⁶ Nakalenak seluk bai, manek-ka nadenu ana manen-na, fo nde Yerahmeel, no Asriel anan-na, ma Abdeel anan Selemya, fo ela ala ho'u-la au ma Barukh fo au manasula sulang-nga. Tehu Manetualain nafuni ami.

²⁷ Manek Yoyakim hotuheni basa susulak nanalunuk fo au afa'dak neu Barukh ndia boema, Manetualain nadenu au

²⁸ ho'i susulak nanalunuk fe'ek, fo ela au sulak basa hata fo nanasulak nai susulak fo nanalunuk makasososak ndia.

²⁹ Manetualain nadenu au afa'da ae leo ia neu manek-ka, “O hotuheni susulak nanalunuk ndia so, ma o matane neu Yeremia mae, tao le'e de ana sulak nae, neukose manek Babel-la mai fo ana tao nakalulutuk nusak ia, ana tao nisa laun-nala no basa bana-manu lala'en-na.

³⁰ Ndia, de Au, Manetualain, afa'da neu o, hai manek Yoyakim, ae ta hapu hataholi esa boen neme o tititi-nonosim neukose ana paleta da'di manek neme Dauk tititi-nonosin mai. Neukose o popolam-ma nanapia henik lo deak neu, fo makato'bik-ka la'en nai lele'don-na ma dinis-sa la'en nai le'dodaen-na.

³¹ O, ma o tititi-nonosim, ma basa o mauli-malangam-mala neukose Au huku-doki nanahu sala-singok fo emi tao-no'ik-kala. Neukose Au uni fe emi basa usa-soe fo Au tuni-ndenin neu emi, nanahu leomae o mo Yerusalem ma Yehuda laun-nala ta tao afik neu Au tutuni-ndendening ndia fa.”

³² Boema au ho'i-a susulak nanalunuk beuk-ka de au fen neu Barukh fo au manasulang-nga. Boema ana sulak basa hata fo au afa'dak neun nana, fo nde susulak nanalunuk makasososak-ka isin-na, ma tama seluk hehelu-hoholo fe'ek de'ubee saman-na lediak boe.