YEREMIA 34 - Susula Malalaok Hehelu Palak Ma Hehelu Beuk

Hala haituak soaneu Zedekia

¹ Nai lelek Nebukadnezar fo manek Babel-la no basa ndia soloda'du matee-matatin-nala fo nanatao natea-nahelek neme basa leoina-la soloda'dun-nala mai, ma nusak fo manamakaluku-makatele neu au-a ala mai sapu-la Yerusalem ma kota-kota manai boboa-kaisun-na, Manetualain kokolak no au nae leondia.

² Ana nadenu au u lo Zedekia fo manek Yehuda, fo au afa'dan ae leo ia, “Au, Manetualain fo Israel Manetualain-na, neukose fe kota ia neu manek Babel-la fo neukose ana hotu henin.

³ Neukose o ta mala deak fa, te nanaho'u nak de nanafek leo ndia neu. Neukose o motongo mon de o kokolak matan mon, boema neukose leni o leu Babel.

⁴ Tehu mamanene Au hala-kokolang-nga nde ia de Zedekia! Neukose o ta mate nai natee-natatik-ka dale fa,

⁵ te ka'da o mate no ndo-le'dek. Ma sama leo laun-nala de'de boominik nai lelek latotoi-latotono o bei ba'i-kaim manamaten-nala fo ala paleta te o beita, leondiak boe neukose laun-nala tunu boominik soaneu o. Neukose ala kii-makaleleu ma lafa'da lae, ‘Ado! Ami manen ta so!’ Au, Manetualain, nde manakokolak-ka.”

⁶ Boema Manetualain hala-haituan ndia au anduku-alosak-kana neu manek Zedekia nai Yerusalem,

⁷ nai lelek manek Babel-la bei sapu-la kota ndia. Sila boeo sapu-la kota Lakhis-sa ma Aseka, fo kota kaduak sila-la matea-mahelek-kala, ma bei lakatatakak nai Yehuda.

Ha'da-tataok fo maneni tutu'dak-ka ba'eneu ata-la

⁸ Manek Zedekia ma Yerusalem laun-nala tao nakeketuk soaneu soi po'i

⁹ sila ata Ibrani-nala, leomae touk do inak boe fo ela ta hapu hataholi esa neme leoina Israel-la mai-a tao ndia hataholin-nala da'di ata seluk fa.

¹⁰ Basa laun-nala ma basa manaho'u paleta-la, fo ala tao basa nakeketuk soaneu soi po'i sila atan-nala ma ala ta tao da'dik ata seluk so'on, te ala po'i sila ata-nala te'e-te'e ndia so.

¹¹ Tehu neu makabuin-na lasafali sila dudu'an-nala, boema ala ho'i falik ata sila-la, de ala laka-lakasetis da'di ata seluk.

^12-13 Boema Manetualain, fo Israel Manetualain-na, nadenu au afa'da ae leo ia neu hataholi sila-la, “Nai lelek Au o falik emi bei ba'i-kaim manamaten-nala fali leme Masir mai-a, ma Au soi-po'is leme ata mai-a, boema Au tao nakeketuk os.

¹⁴ Au afa'da ae, basa ata Ibrani-la fo manamalalau-maoono teuk nee dodoon-na ndia, muse soi po'is neu teuk kahitun-na babasan-na. Tehu emi bei ba'i-kaim manamaten-nala ta nau tao afik do lamanene hata fo Au afa'dak ndia fa.

¹⁵ Faik de'u bee maneuk-ka emi tao mahii emi dudu'am-ma, de emi tao mamahoko Au daleng-nga. Emi basa-mala mala halak esa, de tao nakeketuk mo Au nai Au umang dale soaneu soi po'i ata-la fo emi leoina esa ndia.

^16-19 Manaho'u paleta Yehuda-la, ma Yerusalem no basa uma manek-ka manana'a ngga'din-nala, imam-mala ma basa manamanea o daem-mala, ala heisok nakeketuk ndia nenik ala do'do sapi, de ala seseli ba'en neu dua, de ala la'ok nai biak kaduak sila-la tala'da. Tehu neu makabuin-na boema emi po'de masafali emi dudu'am-ma de emi makadadaek Au. Ata-la fo emi soi po'i basak-ka fo nanda no sila hihiin-a ndia, emi ho'i falik-kasa de emi laka-makasetis soaneu da'di ata seluk. Hundia de Au, Manetualain afa'da ae, emi la'o lena Au paletang-nga, ma ta nau tunga eno dalan fa, nana emi ta soi po'i emi fo leoina Israel sama-sama fa. De besak ia malole lenak Au po'i lotak emi; manapo'i lotak soaneu mamate-momopok-ka nai natee-natatik-ka dalek, do neme he'di laus matuaina, do neme la'a ndoes-sa mai. Emi tao sapi-a tao leo beek fo emi sanga do'don ndia soona, neukose Au tao emi tao leondiak boe. Neukose Au tao-a basa leoina manai daebafak ia lala'en-na ala langgenggengo ao, metema ala lita hata fo Au taon soaneu emi-a.

²⁰ Neukose Au fe emi lo musu-a fo lahik tao lisa emi-a. Neukose manupui-la ma bana makisu-makak-kala la'a emi popolam-mala.

²¹ Zedekia fo manek Yehuda, no basa manaho'u paletan-nala neukose Au fes lo hataholi-hataholi fao lahiik tao lisa-la. Neukose Au fes lo soloda'du Babel-lala, fo besak ia ala la'o ela emi so ndia.

²² Neukose Au fes paleta fo ela ala fali ma'is lo kota ia mai, fo ala sapu-lan, ma latona-la, ma ala hotu heni Yehuda kotan-nala neukose Au ao an sama leo mook solokaek-ka fo ta hapu hataholi leo fan. Au, Manetualain, nde manakokolak-ka.”