YEREMIA 31 - Susula Malalaok Hehelu Palak Ma Hehelu Beuk

Israel fali ne'un lo sila nusa-namon-na neu

¹ Manetualain nafa'da nae, “Neukose losa fain-na te, Au da'di leon Israel-la Manetualain-na, ma sila da'di Au anang-ngala.

² Au atu'du Au susue-lalaing neu sila fo mananala deak neme mamates-sa mai nai mook-solokaek-ka. Lelek fo Israel sanga dale manatesa-tamak-ka.

³ Au atu'du Au aoinang-nga neus neme dook-ka mai. Hai hataholi Israel-la lemin, lelek makahulun-na Au sue-lai emi tatas esa, ma soaneu losa makandondoo henin Au atu'du ae, Au sue-lai emi tatas esa.

⁴ Neukose Au tao-a e leoinam-ma malole-nanapu sama leo makahulun-na. Neukose emi ho'i seluk rebana fo emi lolonge-dadape no namahoko-setelek.

⁵ Emi neukose tao osi angol nai lete lepak Samaria, manasele-tani nana neukose ana ketu boan-na boe.

⁶ Tete'ek-ka, neukose losa fain-na te, basa manamanea kota-la leloo-bebou nai lete-lepak Efraim-ma lae, ‘Mai fo ata kae lo Sion teu, lo ita Amam Manetualain teu.’ ”

⁷ Manetualain nafa'da nae, “Makamee no namahoko-setelek ba'eneu Israel, fo Au anang-ngala – leoina fo makasososak nai basa leoina lala'en-nan-na. Makame-makame kokoa-kikiok ma tui-benga mae: ‘Manetualain soi-po'i hataholin fo bei elak-kala neme anan-nala mai.’

⁸ Au o falik-kasa neme kii mai; Au tao akabubuas neme daebafak-ka pe'dak leo pe'dak neu. Hataholi pokek-kala ma hataholi lu'uk-kala neukose ala tunga los, boema inak fo manabongi beuk-kala, ma inak kaiulis fo deka bobongik-kala boe. Sila basa-basas neukose ala fali ma'is te dede'un-nala mafandiknan lo nusak ia mai.

⁹ Ala la'ok no luu oen-nala titi beboto, Au tao amahokos ma Au le'a-noles. Au os tunga mamanak-mamanak fo oen-na ba'uk-ka, tunga mamanak fo enon-na matetuk fo neukose ala ta lakatunu fa. Ba'eneu Israel, Au soona nonokabai Amak-ka; Efraim nde been-na Au ana tou ulung-nga.”

¹⁰ Manetualain nafa'da n, “Mamanene leona hai leoina-la lemin! Manduku-malosak Au hala-haituang-nga lo tasi selik neu: neu Au anang-ngala fo Au tao tapasalak-kala neukose Au tao akabubuas ma Au akaboboi matalololes sama leo manafoo-a nanea bi'ilopon.

¹¹ Au se'i po'i hataholi Israel, ma Au soi-po'is neme leoina mabe'i-balakaik-ka mai.

¹² Neukose ala mai neme pupukuk Sion-na mai no mata-pana malengak, nanahu Au fefeng neu sila-la, nde gandum, mina, angol, sapi ma bi'ilopo. Sila neukose sama leo osi bubu'u-palusa fo oa ai manadaik, ma ala ta to'a-ta hata esa boen.

¹³ Neu faik ndia te anafe'o anak-kala neukose ala lolonge-dadape no dale namahokok. Hataholi lasik-kala ma hataholi mulik-kala neukose laua-lanale beno'u, nana neukose Au tao amahokos. Sila dale he'din-nala Au tao asafalin da'di namahokok, ma pinu i'duk-ka Au tao asafalin da'di maua-manalek.

¹⁴ Basa imam-mala neukose Au taos ala doak nenik nana'a-nininuk manasasi-kao-kaok-ka; ma basa Au anang-ngala paluuk-kala neukose Au fes. Au, Manetualain, fo manamafa'dak-ka.”

Manetualain susue-lalain-na neu Israel

¹⁵ Manetualain nafa'da nae, “Hala kiki-makaleleuk-ka lamanenen nai Rama, ma pinu idu lumatak-ka nai tei susa-dale he'dik-ka dalek, Rahel kii-makaleleu anan-nala, ana ta nau kokoe-nanasi fan nana ndia anan ta so.

¹⁶ Kii-namatani mate'e leo ma hali mama'da o lu oem-ma leona! Ta mopo o sosota-mamangun neu o anam-mala fa. Ba'eneu o soona neukose hapu toto'bak, o anam-mala fali ma'is leme musu-a nusak.

¹⁷ Hapu namahehenak ba'eneu o nai fai manamaik-ka; neukose o anam-mala fali ma'is lo sila nusa-namon-nala mai.

¹⁸ Au amanene hataholi Israel-la lafa'da lae, henuk no dale he'dik-ka, ‘Ou Manetualain, ami sama leo bana-manu-a fo beita nakalilik na fan, tehu O manoli ami de ami mateme so, de besak ia ami mahele aon soaneu fali ma'im-ma lo O-a neu. Da'di mo falik ami ma'im-ma lo O-a neu, Ou Manetualain, fo ami Manetualaim-ma.

¹⁹ Ami masadea O, tehu ami masasale-dale tatao-nono'ik ndia. Nai lelek O huku-doki ami-a, ami matete'a langa nanahu dale he'dik-ka. Ami mae de ami da'di nananakamumulu-nakamamaek, nanahu ami masala-masingo basa nai lelek ami bei muli solu.’

²⁰ Israel, o nde been-na Au anang susueng, anan fo nanasue-laik nai Au dale bobongo anang-nga. Tunga faik Au dodoki-aali O, tehu Au hii ka'da afandele neu o tatas esa. Neukose Au tao-a O henuk no susue-lalaik.

²¹ Ta'du-tana enok-kala, fo tao ta'du-tana neu, sanga enok fo makahulun-na emi la'ok misik-ka. Hai, Israel, me'um-ma leona! Fali me'um-ma lo emi kota-kotam fo makasososak-ka.

²² O dodoo-doak-kana losa fai hi'da, fo leoina fo ta ili-nekak neu Au-a fa? Au akadada'dik hata fo beuk nai daebafak ia, hata fo fe'ek – fe'en-na sama leo inak-ka nafuni touk.”

Manetualain anan-nala tetu-tema nai le'do-fai manamaik-ka

²³ Manetualain Fo Manakoasa, fo Israel Manetualain-na nafa'da nae, “Metema Au tao-a Au anang-ngala lalole-lanapu sama leo makahulun-na soona, nai nusak Yehuda no nggolo-ta'dun-nala neukose hapu lamanene seluk hataholi-la kokolak lae, Sa'di leo Manetualain been-na ba'e-pala pupukuk malalaok-ka nai Yerusalem fo mamanak leleok fo malalaok ba'eneun.

²⁴ Neukose hataholi-a leo nai Yehuda ma nai nggolo-ta'dun-nala. Nai na hapu manamaue-male'dik ma manamakaboboi sapi ma bi'ilopo.

²⁵ Sila fo manasotak-kaneukose Au tao balakais, ma manamalek nanahu la'as-sa neukose Au to akabetes.

²⁶ Neu faik ndia ta, neukose hataholi nafa'da nae, ‘Au sungu amame boema au ame'da au aong-nga balakai.’

²⁷ A, Manetualain, afa'da ae, neukose losa fain-na te, Au tao ahenu nusak Israel no Yehuda nenik hataholi daebafak ma bana-manu.

²⁸ Sama leo makahulun-na Au aneas fo ela neu makabuin-na soona, Au fe'a henis Au tao atu'us ma Au tao akalulutuk-kasa, leoniak boe neukose Au aneas fo ela Au tao atetea-aheles ma au afofo'a falik-kasa.

²⁹ Neu faik ndia te, neukose hataholi-la ta lafa'da seluk so'on lae, ‘Hataholi lasik-ka la'a ai boa makeis, sila anan-nala lame'da nisin-na mangu.’

³⁰ Tehu metema see kande na'a ai boa makeis soona, ndia de nisin-na mangu. Hataholi esa-esak mate nanahu ndia sala-singon-na.”

³¹ Manetualain nafa'da nae, “Neukose losa fain-na te, Au tao nakeketuk beuk no Israel ma Yehuda anan-nala.

³² Tehu nakeketuk ndia ta sama leo Au tao nakeketuk neu sila bei ba'ikai manamaten-nala nai lelek Au lea-nole fali kasa kalua leme Masir mai-a. Leomae Au sama leo Sao touk ba'eneu sila, tehu ala lilii-babau Au hehelu-balatang neu sila.

³³ Hehelu-balatak beuk-ka nde ia fo neukose Au taon neu hataholi Israel-la: Neukose Au tao Au hoholo-lalaneng nai sila dale bobongoanan-nala dalek ma Au sulak-kana neu sila dalen-nala. Neukose Au da'di sila Manetualain-na, ma neukose sila da'di Au anang-ngala.

³⁴ Ta hapu sila esa nanoli esa soaneu lalelak Manetualain fa. Nana sila basas, ana do matua, neukose lalelak Au. Sila salan-na lala'en-na neukose Au asanggango henis, sila sala-singon-nala lala'en-na neukose Au fe do'o do ampong neus. Au, Manetualain, nde manakokolak-ka.”

³⁵ Manetualain sadia le'do-a soaneu tao nasala matalele'dok-ka; Bula ma nduk-ka nasala soaneu le'odaen-na. Ana ee'do-aadi tasi-a de nalosa lii-la laponu, Manetualain Fo Manakoasa, fo na'den-na na'de ndia.

³⁶ Manetualain helu nae, “Daebafak hoholo-lalanen ta tao nasafalin fa losa dodoon-na Israel boeo neukose ana tatak nahele da'di leo leoina.

³⁷ Leounik-ka la'i esa boema lalai-a hapu nanaukuk, ma daebafak-ka poin-na hapu nanapalisak mataloloek soona, neu faik ndia te neukose Au tipa-dede'a heni Israel nanahu basa sila tatao-nono'in fo mangalaun-nala. Au, Manetualain, nde manakokolak-ka.”

³⁸ Manetualain nafa'da nae, “Neukose losa fain-na te, basa Yerusalem lala'en-na nanafofo'a falik da'di leo Au kotang-nga, fo neme Dedeo Madema Hananeel losa lo Lelesu Ina Bu'uk-ka.

³⁹ Neme nda mai-a dae ton-na ndos lo Pupukuk Gareb, de besak-ka ana heok lo Goa.

⁴⁰ Basa bafak ndia lala'en-na fo nanapakek da'di leo mamana loo-latek ma mamanak tu'u-tapak kadafuk, ma basa tina osi manai lee Kidron su'un-na losa lo Lelesu Ina Ndala fo lo dulu neu-a, neukose ana da'di hehelik soaneu Au. Kota Yerusalem-ma neukose ta nanatao natu'uk fa, do nanatao nakalulutuk fa.”