YEREMIA 29 - Susula Malalaok Hehelu Palak Ma Hehelu Beuk

Sulak Yeremia neu hataholi Yahudi nai Babel

¹ Au sulak susulak neu imam-mala, nabi-la, mauli-malanga leoina fo bei maso'dak-kala ma neu basa hataholi fe'ek fo Nebukadnezar foo nenis leme Yerusalem lo Babel neu-a.

² Manada'dik ndia basa ndek Manek Yoyakhin no ina bongin-na, uma manek-ka manana'a ngga'din-nala, lasik-lasik Yehuda-la ma Yerusalem, tuka-la ma tuka besi-la, fo manakaluak neme Yerusalem mai-a.

³ Au haitua susulak ndia neu Safan anan Elasa, ma Hilkia anan Gemarya fo Yehuda manen Zedekia nadenun leo Nebukadnezar fo manek Babel-la neu. Susulak ndia liin-na nae leo ia,

⁴ “Manetualain Fo Manakoasa, fo Israel Manetualain-na nafa'da nae leo ia neu basa hataholi fo nanatu'u-tapak neme Yerusalem lo Babel-la neu-a:

⁵ ‘Leo mahele meme ndia leon-na. Mafofo'a emi umam-mala leon-na. Tao tina-osi fo mi'a buna-boan-nala.

⁶ Saoana fo ela emi hapu tititi-nonosik, ma emi anam-mala boeo ala saoana fo ela ala hapu tititi-nonosik boe. Emi dede'um-ma muse boetai lamaba'uk-ka, te ala ta bole lamaluma fa.

⁷ Maue-maosa soaneu kota-kota fo Au tu'u-tapa emi lo mamanak-ka meu-a tetu-teman. Hule-haladoi neu Au, soaneu kota-kota sila-la palun-na, nana metema kota-kota sila hapu-dai soona, neukose emi boeo hapu-dai.

⁸ Au, Manetualain, Fo Manakoasa, fo Israel Manetualain-na, fe nasanene'dak neu emi, fo ela emi boso nanatipu-daik neme nabi-nabi fo ala leo nai emi tala'da, ado su'di see ndia boe fo nafa'da nae, sila bisa neuk-la le'do-fai manamaik-ka. Boso tao afik neu sila me'i-afen-nala.

⁹ Ala pake Au na'deng-nga soaneu tui-benga neu emi dede'a-dede'ak fo ta tete'ek-ka fa. Au ta adenu fas. Au, Manetualain, nde manakokolak-ka.’

¹⁰ Manetualain nafa'da nae, ‘Metema teuk hituhulu lamadai ba'eneu Babel soona, neukose Au tao afik neu emi seluk, ma Au tao atetu Au hala-hehelung-nga soaneu O falik emi lo mamanak ia mai.

¹¹ Nana Au ia bubuluk Au dudu'a beek-ka ba'eneu emi? Dudu'a-dudu'ak sila-la ta soaneu tao amopo-amate emi fa, te soaneu emi tetu-temam, ma soaneu fe emi so'da fai manamaim-ma henuk no namahehenak-ka.

¹² Boema neukose emi moke tutulu-fafalik neme Au-a mai. Neukose emi mai fo soaneu hule-haladoi neu Au, soona neukose Au ata emi huhule-haladoim.

¹³ Neukose emi sanga Au, de emi matongo mo Au, nana emi sanga no dale katematuak.

¹⁴ Tete'ek-ka, neukose emi matongo mo Au. Neukose Au tao akabubua emi neme basa leoina-la tala'da mai, ma neme basa nusak fo mamanak emi manatao tapasasalak, ma mamanatu'u-tapak. Neukose Au o falik emi lo emi nusa-namom ia mai, ma Au tao ahii emi heheo-hihilum-mala. Au, Manetualain nde manakokolak-ka.’

¹⁵ Tunga emi dudu'am-ma soona, Manetualain nde fe emi nabi-nabi nai Babel.

¹⁶ Mamanene hata fo Manetualain nafa'dan la'eneu manek fo ana paleta nai besak ia, fonde manek fo Dauk tititi-nonosin, ma la'eneu kota ia laun-nala, fonde o tolanoo-ka'a-fa'dim, fo a nanafoo nenik lo mamana tu'u-tapak-ka no emi fa.

¹⁷ Manetualain Fo Manakoasa nafa'da nae, ‘Neukose Au uni fe emi natee-natatik-ka, la'a-ndoes-sa ma he'di-laus matuaina neu emi.

¹⁸ Neukose Au usis tunga dea nenik natee-natatik, la'a-ndos-sa ma he'di-laus matuaina, de nalosa basa leoina manai daebafak ia, lame'da bibiik ala lita sila heheo-hihilun-nala. Metema Au tao tapasasalas su'di nai bea soona, neukose hataholi lame'da bibiik ma namata'uk lita hata fo manada'dik neu sila. Neukose sila nananakamuu-nakadauk ma ala pake sila na'den-na da'di leo soo-supak.

¹⁹ Basa sila-la da'di neus, nanahu ala ta nau tunga Au hala-haituang-nga, fo Au anduku-alosak-kana neu sila tatas esa tunga basa nabi-la ma basa Au atang-ngala. Tehu ala ta nau tao afik neu Au hala-haituang ndia fa.

²⁰ Ma emi basa-mala fo Au tu'u-tapak leo Babel neu-a, namanene hata fo Au, Manetualain, afa'dak-ka.’

²¹ Manetualain Fo Manakoasa, fo Israel Manetualain-na ana kokolak la'eneu Kolaya ana manen Ahab ma la'eneu Maaseya ana manen Zedekia fo ala pake Manetualain na'den-na soaneu anduku-alosak-kana neu emi la'eneu dede'a-dede'ak fo ta tete'ek-ka fa. Manetualain nafa'da nae, neukose ana fes leo Nebukadnezar fo Manek Babel-la koasan dale neu, fo neukose ana tao nisas nai o matam-ma.

²² Fo ela metema hataholi fo nanafoo nenik neme Yerusalem lo Babel neu-a, ala sanga soo-supa hataholi esa soona, neukose ala lafa'da lae, ‘Sa'di leo been-na Manetualain tao o sama o Zedekia ma Ahab fo nanahotuk kalaok neme manek Babel-la mai.’

²³ Sila ua-nalen-nala leondiak nanahu ala tao sala-singok matuaina nai Israel; fonde ala hohonge, ma ala pake Manetualain na'den-na soaneu ala tui dede'a-dede'ak fo ta tete'ek-ka fa. Ndia ta nanda no Manetualain hihi-nanaun fa. Ana bubuluk hata fo ana taok-ka, ma ndia sakasii seluk la'ban sila. Manetualain nde manakokolak-ka.”

Sulak Semaya

^24-25 Manetualain Fo Manakoasa, fo Israel Manetualain-na ana fe hala-hehelun neu au soaneu Semaya fo hataholi Nahelam ndia, nanahu Semaya haitua susulak pake ndia na'den-na neu basa laun Yerusalem-mala, neu imam Zefanya fo Maaseya anan-na, ma neu basa imam fe'ek-kala. Semaya sulak fe Zefanya susulak ndia, nai dalek isin-na nae leo ia:

²⁶ “Manetualain ana so'u o da'di imam fo nggati Yoyada, de besak ia o nde manapaleta matuaina nai Manetualain Uman-na. O bela-ba'um nde paleta fo ela basa hataholi kamulus, fo ala manaku aon-nala nabi soona, nanalangek nenik namosina besik neu lesuha'in.

²⁷ Tehu tao le'e de, o ta laka-makaseti Yeremia fo hataholi Anatot ndia, fo ana da'di sama leo nabi nai ita leoina-na tala'da?

²⁸ Muse ko'bo ketu hataholi ndia bafan-na, nana nafa'da ita hataholin manai Babel-la nae, sila muse leo dook-ka nai na. Ma hu kande ndia de, nafa'da nae, tao leo beo ala tao uma, ma ala tao tina-osi, fo la'a buna-boan-na.”

²⁹ Imam Zefanya nde lees fe au susulak ndia isin-na.

³⁰ Hu ndia, de Manetualain nadenu au

³¹ haitua halak neu basa hataholi Israel-la fo nanatu'u-tapak lo Babel neu-a, la'eneu Semaya so'dan-na. “Halak ndia nae leo ia, Semaya kokolak no emi nonokabai ndia nabi; te sekona Au, Manetualain, ta nde adenu fan. Hu kande hala kokolan ndia, de ana tao-na emi memehele neu dede'a kokolak pepeko-lelelok,

³² boema hu kande ana nadenu emi la'ban Au, de neukose Au hukun no ndia tititi-nonosin. Ta hapu hataholi esa neme sila tala'da, fo neukose elan nai emi tala'da, soaneu nita manada'dik-kala fo neukose Au tao-no'in neu basa Au anang-ngala. Au, Manetualain nde manakokolak-ka.”