YEREMIA 28 - Susula Malalaok Hehelu Palak Ma Hehelu Beuk

Yeremia ma Nabi Hananya

¹ Teuk ndia boe nai bula kalima, manek Zedekia paleta neu teuk ka haan-na, Azur anan Hananya nde-been-na nabi esa neme kota Gibeon, ana kokolak no au nai Manetualain Uman. Ana nafa'da neu au nai imam-mala ma laun-nala matan

² nae Manetualain Fo Manakoasa, fo Israel Manetualain-na, nafa'da nae leo ia, “Manek Babel-la be'i-balakain Au tao alu'u son.

³ Nai teuk dua dalen ia neukose Au ho'i falik hata-heto maneme Au umang-nga, fo nanaho'i nenik neme anek Nebukadnezar-ra lo Babel neu-a.

⁴ Au boeo o falik Yoyakhin ana manen Yoyakim fo manek Yehuda, no basa Yehuda laun-nala fo nanafoo nenik lo Babel neu-a. Te'e-te'e neukose Au tao alu'u Babel be'i-balakain. Au, Manetualain, nde manakokolak-ka.”

⁵ Boema au afa'da neu Hananya nai imam-mala ma basa laun-nala matan fo manamapadedeik manai Manetualain Uman ndia ae,

⁶ “Malole so! Sa'di leo been-na o neuk sila-la da'di mata-nitak, ma te'e-te'e Manetualain neni falik neme Babel-la mai Manetualain Uman-na hata-heton ma no basa hataholi fo nanatu'u-tapak lo naa neu-a.

⁷ Tehu o, Hananya, ma emi basa-mala, hai laun-nala, soona mamanene ia dei:

⁸ Nabi-nabi fo ita bei taa, ala neuk lae, natee-natatik, namate-namopok, ma he'di-laus neukose ana tuni-ndeni la'e leoina ba'uk-ka, ma dedeo fo mabe'i-balakaik-kala.

⁹ Tehu Nabi mananeuk mole-dame-a, ka'da hapu nananamahelek da'di leo nabi fo te'e-te'e nananadenuk neme Manetualain mai, metema ana neuk-kala da'di mata-nitak.”

¹⁰ Boema Hananya ho'i heni lange fo maneme au lesuhaing-nga, de ana tao nala'din.

¹¹ Ana nafa'da nai basa laun manai ndia matan nae, “Manetualain nafa'da nae, manek Nebukadnezar-ra tao lange neu basa leoina-la lesuha'in-nala, ndia ana tao nala'di taos tao leo iak; Manetualain neukose tao leondiak nai teuk kaduak ia dalen-na.” Basa ndia boema au la'o.

¹² Manada'dik ndia beita doo be boen te, Manetualain nadenu au

¹³ U lo Hananya u fo au afa'dan ae leo ia, “Manetualain nafa'da nae, o hapu ka'da tao mala'di lange ai, tehu neukose ana nggatin nenik lange besik.

¹⁴ Manetualain Fo Manakoasa, fo Israel Manetualain-na nafa'da nae, neukose ana tao lange besik neu basa leoina iala lesuha'in-na, fo neukose ala sene-do'ok neu Nebukadnezar fo Manek Babel-la. Manetualain nafa'da nae bana fui-la boeo neukose ana fes leo Nebukadnezar koasan dale neu.”

¹⁵ Au anduku-alosak basa sila-la neu Hananya, boema au afa'da seluk ae, “Hai Hananya, mamanene! Manetualain ta nadenu o fa; O taom-ma leoina ia namahele neu ka'da dede'a-kokolak pepeko-lelekok.

¹⁶ Hu ndia de, Manetualain nafa'da nae, neukose o manatao namopok nai daebafak ia poin-na. Teuk ia dalen-na boe, neukose mate o, nana o madenu leoina ia la'ban Manetualain.”

¹⁷ Boema teuk nda dalen-na boe, nai bula kahitu-a boema mate Hananya.