YEREMIA 25 - Susula Malalaok Hehelu Palak Ma Hehelu Beuk

Musu neme ki mai

¹ Nai teuk kasanahulu haan-na Yoyakim fo Yosia ana manen-na da'di basa manek nai Yehuda boema, au hapu hala haituak leme Manetualain la'eneu basa leoina Yehuda, Lelek ndia te Nebukadnezar da'di manek nai Babel besak-ka teuk esa ndia.

² Au afa'ada neu basa leoina Yehuda ma Yerusalem laun-nala ae,

³ “Teuk duahulu telu dodoon-na, lelek teuk kasanahulu telun-na boema, mon anamanen Yosia paleta nai Yehuda, de losa faik ia Manetualain kokolak no au, boema au beita hahae tui-bengan neu emi lala'en-na hata fo Ana nafa'dak-ka. Tehu emi ta mafaduli fa.

⁴ Manetualain boeo nadenu tataas esa neu basa nabim-mala fo atan-nala lo emi-a neu, tehu emi ta nau mamanene ma tao afik neu fas.

⁵ Ala ladenu emi la'o ela emi ha'da-tataom fo mangalauk-ka, ma emi tatao-nono'im fo masala-masingok-ka, fo ela emi hapu leo mahele nai nusak fo nanafek neme Manetualain neu emi bei-ba'i kai manamatem-mala ma neu emi da'di leo hata pusaka.

⁶ Nabi sila-la kena-ka'i emi boso sene-do'ok ma hule-haladoi neu lamatua daebafak fe'ek-kala. Ala kena-ka'i emi boso sene-do'ok neu sosongok-tatangok fo emi taom-mala sila, nana dede'ak sila-la tao-la Manetualain namanasa. Metema emi tao tunga Manetualain paletan sila soona, Ana ta huku emi fa.

⁷ Tehu Manetualain nde nafa'da nae, emi ta nau mamanene fan. Nakalenak emi tao mafo'a nasan-na nanahu emi sosongo-tatangom sila-la. Emi nde tao aom huhukun-na Ana fen neu emi aopaam-ma.

⁸ Hu kande emi a nau mamanene hala-kokolan-na fa, de Manetualain Fo Manakoasa nafa'da nae,

⁹ ‘Neukose Au alo basa leoina manai neme ki mai-a, ma Au atang Nebukadnezar fo manek Babel-la boe. Neukose Au fe sila soaneu latee-latati la'ban Yehuda no laun-nala, ma basa leoina manai boboa-kaisun-nala. Leiona Yehuda no leoina titia-tatain-nala neukose Au tao akatoto'a-akatatak-kasa ma Au po'ilotak-kasa lakalulutuk soaneu losa dodoon-na. Hataholi fo manamitas-sala neukose ala nggenge-la ma lame'da bibi-namata'uk. Au, Manetualain nde manakokolak-ka.

¹⁰ Sila halan-nala namahoko-setele ma lame feta ka'bing-nga neukose Au taos ate'es. Neukose ala ta lanuu mina soaneu banu-nala fa, ma neukose sila gamdum-mala basas.

¹¹ Basa nusak ia lala'en-na neukose Au po'ilotak-kana nakalulutuk ma ana da'di nenee-lino-linok. Leoina manai boboa-kaisun-nala neukose ala sene-do'ok neu manek Babel teuk hituhulu dodoon-na.

¹² Basa ndia soona neukose Au huku leoina Babel-la no manen-na, nanahu sila sala-singon-nala. Neukose Au tao atu'u nusak Babel-la ma Au po'ilotak-kana nakalulutuk soaneu losa dodoon-na.

¹³ Neukose Au huku Babel nenik basa susa-soe fo Au dodoak-ka soaneu leoina-leoina fo Au afa'da basan tunga Yeremia – fo neu basa susa-soe fo nanasulak nai susulak ia dalek.

¹⁴ Neukose Au bala hataholi Babel-la tatao-nono'in-nala; neukose sila nanataok da'di ata neme manek matua-la ma neme leoina ba'uk-ka,’ ”

Manetualain huhukun-na nai leoina-la

¹⁵ Manetualain, Israel Manetualain-na, nafa'da neu au nae, “Ho'im-ma nggala angol ia fo Au isi basan nenik Au angol nasa-melung-nga. Menin lo basa leoina fo nai bee Au adenu o-a, fo madenus ala linu angol ia.

¹⁶ Metema ala linun soona, neukose ala lapoka-lapangak ma mopo dudu'a-aafin-nala nanahu natee-natatik-ka fo Au uni fen neu sila.”

¹⁷ Boema au sipo-a nggala angol ndia neme Manetualain liman-na mai, de au u lo basa leoina fo nai bee Manetualain nadenu au-a, boema au taos ala linu angol ndia.

¹⁸ Au fe Yerusalem no basa kota manai Yehuda-la, no manek-kala, ma mauli-malangan-nala linu angol ndia, de nalosa ala da'di sama leo mook-ka fo tokotik ma mangalaun-na seli. Losa faik ia sila na'den-na nanapakek da'di leo soo-supak.

^19-26 Hataholi fe'ek-kala fo muse ala linu Manetualain nggala angol ndi na'den-nala nanasulak nde ia: manek Masir no basa mana na'a ngga'din-nala ma basa mauli-malangan-nala; basa hataholi Masir-rala la'ena ma hatatoli fe'ek manai Masir-rala; basa manek manai nusak Us; basa kota Filistin-nala manen manai Askelon, Gaza, ma Ekron; basa hatatoli fo bei mana maso'dak manai Asdod; basa hataholi Edom, Moab ma Amon; basa manek manai Tirus ma Sidon; basa manek manai nggolo-ta'duk Tasi Tala'dak-ka su'un; basa kota-kota Dedan-nala, Tema, ma Bus-sa; basa hataholi mananggute keke'u langadoon-nala; basa manek Arab-pala; basa leo anak manasese'do-babalik-kala manen-nala fo nanaleok manai letelepak; basa manek manai Zimri, Elam, ma Madai; basa manek manai ki la, manai dook ma manadekak, hataholi esa-esak. Basa leoina manai daebafak-ka poin-na lala'en-na muse linu angol ndia. Ma hataholi mate'ek fo muse ninu angol ndia nde manek Babel-la.

²⁷ Boema Manetualain nafa'da neu au nae, “Mafa'da meu hataholi sila-la mae Au, Manetualain Fo Manakoasa, fo Israel Manetualain-na nadenus ala ninu losa ala mafuk ma ala muta-muta mesan. Au taoas latu'u lai fo'ak de ala ta hapu fo'a fa, nanahu natee-natatik-ka fo au uni fen neu sila.

²⁸ Ma metema ala ta nau sipo nggalas ndia neme o limam-ma mai fa soaneu linu angol fa soona mafa'da mae, Manetualain Fo Manakoasa nde paleta dede'ak ndia.

²⁹ Neukose Au tao makasososa nakalulutuk ndia nai Au kotang-nga. Boso nalosak sila laedaenga neukose ata hapu huhukuk fa. Ta bole nae ta sila nanahuhuk nanahu neukose Au uni natee-natatik neu basa leoina daebafak ia poin. Au, Manetualain Fo Manakoasa nde manakokolak-ka.

³⁰ Basa hata fo Au afa'dan neu o-a, hai Yeremia, muse o manduku-malosak-kana. Mafa'da meus mae, ‘Manetualain halan-na nakapepela neme nusa so'dak-ka mai; ana nasanggunggulu la'ban Anan-nala neme mamana leleon fo malalau-malalafuk-ka. Basa laun manai daebafak-ka lamanene Ana naka'di-nakau sama leo manamaue-maosak fo manake'e anol nai mamanak kaka'bik-ka.

³¹ Halan-na nadodolo neme daebafak-ka pe'da leu pe'dak neu; Manetualain tao dede'ak ndia neu basa leoina la. Neukose basa hataholi lala'en-na sese'an-na nanapalisak fo ela manatao mangalauk-ka neukose nana huku nisak.’ ”

³² Manetualain Fo Manakoasa nafa'da nae, “Anin-na nadodolo neme pe'dak leu pe'dak neu; susa-soe tuni-ndeni leoina esa basa soona esa.”

³³ Neu faik ndia te, hataholi-hataholi fo manataonisak neme Manetualain mai-a, neukose popolan-nala lalefu'ak nai basa daebafak-ka poin-na. Neukose nanaki-namatani tak, ma nanako'o tak soaneu nananatoik, te ka'da nanapo'ilotak nai dae sama leo hu'u-kadafu madodouk-ka.

³⁴ Hai mauli-malangan-nala lemin, hai basa manafo Manetualain anan-nala lemin, ki-namatani mapane'e! Loli fali nai afu dale, nana fain-na losa emi nanado'dok, ma mananaladeak-ka neukose nanatao tapasasalak. Neukose emi sama leo ule dae kabelik-ka fo tu'da henin de ba'en.

³⁵ Tao leo beo neukose emi ta maladeak fa.

^36-37 Emi tei susa dale he'di ma ki mamatani no dale he'dik, nanahu nai nasan-na dalek Ana tao nakatoto'a-nakatatak emi leoina ma Ana tao nakalulutuk emi nusa namon fo nene-lino-linok ndia.

³⁸ Sama leo singa kalua neme bolon dale mai, leondiak boe Manetualain kalua soaneu Ana huku anan-nala. Natee-natatik-ka ha'i-ha'i no Manetualain nasa-melun tao nasafali nusak ia da'di mok solokaek.