YEREMIA 23 - Susula Malalaok Hehelu Palak Ma Hehelu Beuk

Namahehenak soaneu le'dofai manamaik

^1-2 Manetualain fo Israel Manetualain-na nafa'da nae, “Soe ba'eneu emi basa mauli-malanga fo manatao tapasasala Au anang-gala! Tunga ndoon-na emi masamumumu-masamamao Au anang-ngala, tehu emi ta tao-no'i fan; emi po'ilotak-kasa ala tapasasala ma lalai. Besak ia neukose Au huku emi nanahu emi tatao-nono'i mangalaum-mala.

³ Tehu Au anang bei elak neukose Au tao akabubuas neme nusa-nusak fo nai mamanak Au tu'u-tapa heni sila. Neukose Au uni falik lo sila dae-oen-na mai, ma sila tititi-nonosin neukose boetai lamaba'uk-ka.

⁴ Neukose Au so'u mauli-malangan soaneu nakaboboi sila. Au anang-ngala neukose ala ta bii do lamata'u fa; neukose neme sila esa mai boeo ta mopon fa. Au, Manetualain, nde manakokolak-ka.”

⁵ Manetualain nafa'da nae, “Neukose losa fain-na te, Au so'u-a manek esa fo ndoos ma matetuk neme Dauk tititi-nonosin-na mai. Manek ndia neukose ana paleta no ndolu ma malelak, ma ana tao beek soona, ndoos ma matetuk nai basa nusak-kala.

⁶ Metema ana paleta soona, neukose hataholi Yehuda-la laso'da-lamole ma neukose hataholi Israel-la laso'da-lamole no nenee-lino-linok. Manek ndia neukose loken soona lae, ‘Manetualain Ita So'dan-na’.

⁷ Neukose losa fain-na te, hataholi ta supa-soo nenik Au na'deng-nga, Manetualain fo maso'dak-ka, fo mananeni falik hataholi Israel-la kalua leme Masir mai,

⁸ te ka'da neme Au-a mai Manetualain fo maso'dak-ka fo mananeni falik hataholi Israel-la kalua neme nusak esa nai dulu, ma neme basa nusak fe'ek-kala fo nai bee Au tao tapasasala sila. Sila neukose ala leo om sila dae oen-nala.”

Yeremia hala haituan-na la'eneu nabi-la

⁹ Au hala haituang-nga nde ia la'eneu nabi-la; Au daleng-nga nakalulutuk ma au ndele nggebe-nggebe. Nanahu Manetualain ma hala kokolan fo malalao-malalafuk-ka, taon-na au sama leo hataholi manamafuk fo mananinu angol ba'uk.

¹⁰ Ita nusa-namon-na henuk no hataholi fo ta manalilineka neu Manetualain fa. Sila so'dan-na mangalauk, ma ala tao sala sila ha'da palin-na. Nanahu Manetualain supa-soo de, na'u manai mook-ka ana da'di tuk, ma basa nusak lala'en-na kii-lamatani.

¹¹ Manetualain nafa'da nae, “Nabi-la ma imam-mala ta nau lamahele Au fa. Boema Au hapu as ala tao mangalauk nai Au umang-nga.

¹² Hu ndia, de sila enon-na neukose talimo'dis-sa ma makahatuk-ka, de nalosa ala lo'do de la tu'u leu. Neukose Au uni soe ba'eneu sila, metemea fain-na losa soaneu huku-doki sila. Au, Manetualain nde manakokolak-ka.

¹³ Au ita basa nabi Samaria-la sala-singon-nala so. Ala kokolak linik Baal-la na'den-na, de ala tao lakatutu'dak Au anang Israel-la.

¹⁴ Tehu Au ita nai Yerusalem bai soona, nabi-nabi-la tao-no'i mangalauk lena seluk bai. Ala lasapepeko-lasandandali ma ala hohonge, boema ala tulu-fali hataholi fo manatao-no'i mangalauk-ka de nalosa ta hapu hataholi esa Taka Tei-sale dale boen. Ba'eneu Au soona, basa-basas mangalauk-ka sama leo Sodom ma Gomora.”

¹⁵ Manetualain Fo Manakoasa nafa'da nae, “Neukose Au fe basa nabi-nabi manai Yerusalem-mala sesele-bubu'u makaheduk soaneu nana'an-nala ma laso soaneu nininun-nala, nanahu ala tao-la hataholi-hataholi manamai nusak-ka lala'en-na ala ta fe ha'da-holomata mai Au fa.”

¹⁶ Manetualain Fo Manakoasa nafa'da neu laun Yerusalem-mala nae, “Boso mamanene basa nabi-la hala-kokolan fo ala fe mamahehenak fo ka'da louk tatas esa. Ka'da sila landuku-lalosak sila mesak-kasa meneunala te Au hala-haituang-nga ta ndia fa.

¹⁷ Ba'eneu hataholi-hataholi fo tanau lamanene Au hala-kokolang-nga fa, ala lafa'da tatas esa lae, ‘Neukose emi maso'da-mamole.’ Ma neu basa hataholi fo malanga batuk-ka, ala lafa'da lae, ‘Neukose o ta hapu susa-soe fa.’ ”

¹⁸ Au afa'da ae, “Ta hapu hataholi esa boen neme nabi sila-la, ala bubuluk hata fo manape'da-fuak nai Manetualain dudu'a-aafin dale. Ta hapu neme sila mai-a lamanene hai, ma ala bubuluk ndia dudu'a-aafi manamain-na fa; Ta hapu fo mana tao afik do mana tao malole neu ndia dede'a-kokolan boen.

¹⁹ Manetualain nasa-melun nonokabai ani sangu-a fo manasa ina fo ana tuni-ndeni hataholi-hataholi mangalauk-ka.

²⁰ Nasa-melun neukose ta naloe fa, metema Ana dudu'a-aafi nakala basa-basas beita da'di fa. Nai fai makabuin-na neukose Manetualain anan-nala bubuluk dede'ak ndia no mangale'dok.”

²¹ Manetualain nafa'da nae, “Nabi sila-la manggaten-nala seli, te sekon-na Au ta adenu fas. Ala tui benga pake Au na'deng-nga, te sekon-na ta hapu hala haitua esa boen fo Au en neu sila fa.

²² Leounik-ka ala bubuluk hata fo nanape'da-fuak a Au dudu'a-aafing dale soona, tao leo beo ala tui bengan neu Au anang-ngala basa hata fo Au afa'dak-ka. Soona neukose Au anang-ngala Tuka Tei-sale dale neme sala-singok ma ha'da palik fo mangalauk-ka.

²³ Au Manetualain fo hapun su'di nai bea, te ta ka'da nai mamanak esa fa.

²⁴ Ta hapu hataholi sa boen nafuni-na ao inan-na neme Au mata memeteng-nga fa, nana Au nae mamanak lala'en-na: nai nusa so'dak-ka ma nai daebafak-ka.

²⁵ Basa hata fo nananafa'dak neme nabi sila-la Au bubuluk-kasa so. Ala lasapepeko-lasandandali pake Au na'deng-nga lae, Au hala haituang-nga ala sipon tunga me'i-afek.

²⁶ Nabi sila-la sanga lakatutu'dak Au anang-ngala neniuk sila tutui-bebenga pepeko-lelelo mesan-nala losa fai hi'da?

²⁷ Ala dudu'a lae, neniuk me'i-afek fo sila tuik ndia de, Au anang-ngala lasanggango neu Au salma leo sila bei-ba'i manamaten-nala lasanggango heni Au, de ana sese-do'ok neu Baal-la.

²⁸ Nabi fo manamalame'ik-ka muse nafa'danae, ‘Ia ka'da me'is-sa.’ Tehu nabi fo manahapu hala haituak neme Au mai-a, muse nanduku-nalosak hala haituak ndia no matetun-na. Te gandum-ma ta hapu nakasasamakana no ha'de aik-ka fa.

²⁹ Au hala kokolang sama leo ha'i-a, ma sama leo makoa fo manatao makalulutuk batu-a.

³⁰ Neukose Au la'ban nabi-nabi fo manatui-benga hala haituak neme nonon-nala ma, boema lafa'da lae, hala haituak ndia neme Au-a mai.

³¹ Au boeo la'ban nabi-nabi fo nanduku-nalosakndia hala kokolan mesan-na boema nafa'da nae ndia neme Au-a mai.

³² Au, Manetualain, neukose la'ban nabi sila-la fo nde landuku-lalosak sila me'i-afen-nala fo uk no masapepeko-masandandalik. Ala lakatutu'dak Au anang-ngala nenik masapepeko-masandandalik ma nenik sila bafa loun-nala. Au ta adenu nabi sila-la fa. Sila sosoa-ndandaan tak makandondook soaneu Au anang-ngala. Au, Manetualain, fo manakokolak-ka.”

Manetualain lelepa mabelan-na

³³ Manetualain nafa'da nae, “Yeremia, metema hataholi esa neme Au anang-ngala do, hataholi nabi esa do imam natane neu o, ‘Ade Manetualain helu nae leo bee?’ Soona o muse mataa mae, ‘O nde been-na lelepa mabelan-na Manetualain; hu ndia de neukose o nanatu'u-tapa henik.’

³⁴ Metema hataholi esa neme Au anang-ngala do nabi do imam fo ala bei kokolak la'eneu ‘Manetualain lelepa mabelan-na’, soona ndia no basa uma isin lala'en-na Au hukus.

³⁵ Nasafalin-na, hataholi esa-esak muse natane neu nonon-na do neu uma isin-na, ‘Natatak neme Manetualain mai-a?’ do ‘Manetualain nafa'da nae leo bee?’

³⁶ Sila ta bole pake dede'ak si'ek lae ‘Manetualain lelepa mabelan-na’. Metema bei hapu fo mana pake dede'ak si'ak ndia soona, neukose Au tao Au hala haituang-nga te'e-te'e ana da'di lelepa mabela soa neun. Hataholi fo manamafa'da nae, ‘Manetualain lelepa mabelan-na’ ka'da ana puta-pai Au hala kokolang-nga, fo sila Manetualain-na, Manetualain fo maso'dak-ka, Manetualain Fo Manakoasa.

³⁷ Sila bole lafa'da ka'da neu nabi-nabi-la lae, ‘Ade Manetualain natatan neu o-a nae leo bee? Manetualain nafa'da nae leo bee?’

³⁸ Metema ta hapu manamahehele neu Au paletang sila-la, ma ala bei pake dede'ak si'ak ‘Manetualain lelepa mebelan-na’.

³⁹ Soona, neukose Au ho'u as fo Au tapas leu dook-ka neu, leomae sila ma kota fo Au fe basan neu sila, ma sila bei ba'i kai manamaten-nala.

⁴⁰ Neukose Au tao-a sila mae ma nananakadadaek soaneu losa dodoon-na, ma sila a nalen ndia neukose hataholi ta lasanggango heni fan.”