YEREMIA 22 - Susula Malalaok Hehelu Palak Ma Hehelu Beuk

Yeremia nanoli-nafa'da soaneu teidale manek Yehuda

^1-2 Manetualain nadenu au u leo manek Yehuda fo Dauk tititi-nonosin uma manen neu, soaneu anduku-alosak Manetualain hala hehelun neu manek no basa manana'a ngga'di ma Yerusalem laun-nala. Manetualain hala-kokolan neu sila leo ia,

³ “Tao ndos ma matetuk. Po'i hataholi manake'di-ndiuk neme hataholi manake'di-ndiuk koasan-na. Boso tuni-ndeni do tao mangalauk neu hataholi manamai, do falu ina ana maak. Boso tao misa hataholi f salan ta nai mamanak ia.

⁴ Metema emi makalala'ok Au paletang ia no te'e-te'e soona, neukose manek-manek fo ala paleta sama leo Dauk ta ala masok tunga uma manek ia lelesu inan-na. Sila lo basa manana'a nggadi ma sila laun-na neukose ala sa'e kaleta ma ndala.

⁵ Tehu metema emi ta tao tunga Au paletang ia fa soona, Au soo-supa ae, neukose uma manek ia ana da'di batu-ai madodok. Au, Manetualain, nde manakokolak-ka.

⁶ Ba'eneu Au soona, manek Yehuda mamana manen-na mana'ahiik nan seli, mana'an-na leo dae Gilead-ta ma letek-letek Libanon; tehu mamanak ndia Au taon sama leo mok solokaek fo ta hapu hataholi esa boen leon fa.

⁷ Neukose Au haita hataholi soaneu tao nakalulutuk. Neukose ala leni taka, fo ala lo'o labu diin-na fo mana'ahiik sila-la fo nanataok neme ai kaiyou Libanon. Boema neukose ala tapas leo ha'i dale neu.

⁸ Basa ndia soona, neukose hataholi nusa dea ba'uk-ka la'ok lisik ndia soona esa natane esa nae, tao le'e de Au, Manetualain, tao leondiak la'eneu kota fo mana'ahiik ndia.

⁹ Boema neukose hataholi-la lataa lae, basa sila da'di nanahu ei masapepeko-masandandali neu emi hala-hehelun no Au, fo emi Manetualaim-ma, de emi sene-do'ok ma hule-haladoi neu lamatua daebafa fe'ek-kala.”

Dede'a kokolak neme Yeremia la'eneu Yoahas

¹⁰ Hai hataholi Yehuda, boso dale-he'dis soaneu Manek Yosia mamaten-na. Te ka'da kii-mamatani neu Yoahas fo ana manen-na nana ala lon so de ana ta fali fa. Dae oen fo mamana fua funin neukose ana ta nita fa.

¹¹ Manetualain nafa'da nae, “La'eneu Yoahas fo Yosia ana manen-na fo ana dadi manek nai Yehuda nggati aman, nde bee soona, ana la'o neme ia mai, de ana ta fali fa.

¹² Neukose ana mate nai mamana ookak-ka, ma neukose ta mete nita nusak ia fa so'on.”

Dede'a kokolak neme Yeremia la'eneu Yoyakim

¹³ Soe ba'eneu hataholi fo nafofo'a uman-na no make'di-mandiuk, ma ana tao namaloan no ta tao tunga ndoon-na fa. Soe ba'eneu ndia fo nadenu hataholi-la laue-laos-sa te nggadi tak.

¹⁴ Soe boe ba'eneu hataholi fo nafa'da nae, “Neukose au apadedeik uma manek fo matuaina no kama matuaina losa lain,” boema nai uma manek ndia ana taon-na jendela no bingke nala neme ai kaiyou Libanon, ma lose dama pilas neun.

^15-16 Hai manek Yoyakim, mamanene leon! Metema o mafofo'a uma manek-ka nenik ai kaiyou Libanon fo mana'ahiik nan seli, ade ndia ta nafa'da fa nae, o man fo malole lena neme manek fe'ek-kala mai do ta? So'ba mafandele su'dik o amam: ana name'da nita so'dak fo malole-mana'a, ma nai ue-osan lala'en-na dalek, nabuna-naboa, nanahu ana tao ka'da tunga ndoos ma matetuk, boema ana palisak hataholi nuu taa hata taak-ka dede'an-na nenik ndoos ma matetuk. Memak hataholi fo malelak Manetualain muse tao-no'i leondiak.

¹⁷ Tehu o, Yoyakim, fe'ek. K'da o sanga nanalak neu o aopam-ma. O tao misa hataholi fo ta nasala-nasingo fa, ma o tuni-ndeni laun-na nenik nasa meluk.

¹⁸ Hu ndia de la'eneu Yoyakim fo manek Yehuda fo Yosia ana manen-na soona, Manetualain nafa'da nae, “Mamaten-na neukose nanakii-nanatani tak; neukose ta hapu manamafa'da fa nae, ‘Ado, au nonoong-nga, ado’ ta hapu fo manadale-he'dik, do nafa'da nae, ‘Kasian ama manek!’

¹⁹ Neukose Yoyakim nana lele'a-lolosok ma nana pia henik leo Yerusalem lelesu inan deak neu, sama na leo hataholi lele'a-lolosok keledei mates.”

Tutui-bebengak la'eneu Yerusalem ua-nalen

²⁰ Manetualain nafa'da nae, “Hai Yerusalem laun-nala lemin, meu leo Libanon ma Basan, fo kii namatani nai na. Nggiso-nggasi nai letelepak Moab, nana emi soloda'dun lala'en-na nanatao nakalak so.

²¹ Au kokolak basa neu emi nai lelek emi so'da molen-na malole, tehu emi ta nau mamanene. Memak emi ha'da tataom neme makahulun eli mai losa besak ia leondiak; beita la'i esa fo emi tunga Au paletang-nga fa.

²² Hu ndia de, basa mauli-malanga neukose mopos sama leo anin-na fun. Neukose emi soloda'dun-nala nana fua nenik sama leo nanahukuk, ma emi kotam-ma nananakadadaek ma nananakamumulu-nananakamamaek nanahu basa emi tatao-nono'i mangalaun-nala.

²³ Emi leo-mapalasa no nene-lino-linok ma nana okofefeok nenik dii kaiyou Libanon, tehu metema nai lelek hedi-laus la'e emi soona, neukose emi doi-doso sama leo inak fo ana sanga bongi.”

Manetualain huhukun la'eneu Yoyakhin

²⁴ Manetualain nafa'da neu manek Yoyakhin, fo Yoyakim ana manen-na fo manek Yehuda nae, “Neme Au-a mai, Manetualain fo maso'dak, Au afa'da no te'e-te'e ae, leomae o ba'eneu Au soona, sama leo ndeli mamatade'ik nai Au limang konang-nga tehu leomae leondiak boe, neukose Au fe'a heni o

²⁵ fo Au fen neu hataholi-hataholi fo o bii-mamata'uk-ka, ma fo manahii tao nisa o-a. Neukose Au fe o leu Nebukadnezar fo manek Babel-la no ana boan-nala.

²⁶ Neukose Au use heni o mo o inam fo Au tu'u emi lo nusak fo ta emi mamana fua funi-ndala sila ma fa, ma neukose mateemi nai na.

²⁷ Emi neukose mahiik man seli neu nusak ia, tehu neukose emi ta fali fa.”

²⁸ Au Yeremia afa'da ae, “Ade manek Yoyakhin ana da'di sama leo ule ba'ek fo nanatapa henik ma ta lahiik-kana fa do? Hu ka nde ndia de ndia no anan-nala nanausik ma nanatu'u-tapak lo nusak fo dook-ka ba'eneu sila do?”

²⁹ Hei au nusang-ngo nei, mamanene hat fo Manetualain nafa'dak-ka,

³⁰ “Nananaketu basak soaneu hataholi ndia mopo anan-nala ma nai so'dan-na dalek ana ta hapu dai hata esa fa boen. Neme ndia tititi-nonosin mai ta hapu da'dik manapaleta nai Yehuda da'di leo manek fo Dauk tititi-nonosin-na. Au, Manetualain, nde manakokolak-ka.”