YEREMIA 19 - Susula Malalaok Hehelu Palak Ma Hehelu Beuk

Kete fo nanaba'ek

¹ Manetualain nadenu au u asa kete, ma leleko manamalanga leoina de'ubee, boema imam lasik de'ubee,

² soaneu ala la'ok lakabubua lo sila lo Bafak Hinom, fo ala tunga Lelesu Ina Beling-nga. Nai naa au muse po'a-benga hata fo nanaheluk neu au.

³ Au muse afa'da leo ia, “Hai Yehuda manen-nala ma Yerusalem laun-nala lemin! Mamanene hata fo Au, Manetualain Fo Manakoasa, fo Israel Manetualain-na, sanga kokolak no emi. Neukose Au uni susa-soe fo matuaina lo mamanak ia mai, de nalosa hataholi fo manamamanenek-kala nggenge.

⁴ Au tao dede'ak ndia nana loina ia la'o ela Au so. Ala tao langgenggengo mamanak ia nenik ala fe tutunu-hohotuk lo lamatua daebafak fe'ek-kala ba'eneu sila, ba'eneu sila bei ba'i-kain-nala, ma ba'eneu manek-manek manai Yehuda. Sila boeo ala tao hataholi sala taak-kala daan-na nai mamanak ia boe.

⁵ Ala lapadedeik mei tunu-hotuk ba'eneu Baal-la, soaneu sila fe anan-nala da'di neu tutunu-hohotuk, te sekona Au beita adenu ita sila tao-no'i dede'ak ndia fa. Nakalenak seluk bai dede'ak matak leondiak-ka beita da'di moli nita nai Au dudu'ang dale fa.

⁶ Hu ndia de fain-na losa soaneu mamanak ia ta nanaseseik lae Tofet do Bafak Hinom fa, te Bafak Dodo'dok-ka.

⁷ Neukose Au tao-a hataholi Yehuda-la ma Yerusalem laun-nala buna-boa taak-kala nai mamanak ia. Neukose Au po'ilotak sila nana tao nakalak neme sila musum-mala mai, ma nana tao nisak nai natee-natatik-ka dalek. Neukose Au po'ilotak manupui-la ma bana makaa-makisu-la la'a sila popolan.

⁸ Neukose Au tipas mamate-momopok-ka fo matuaina nanseli neu kota ia de nalosa basa hataholi manala'ok tunga ndia neukose ala nggenge ma langgenggengo ao.

⁹ Musu-a nakahapin-na kota ia, de ala sanga tao lisa laun-nala. Nakahapik ndia bela-ba'u, de nalosa hataholi manai kota ia dalek anan-nala lo nonon-nala lana'a-la ao seluk.”

¹⁰ Makabuin-na boema Manetualain nadenu au tao ba'e kete ndianai hataholi fo manatunga au-a matan-nala.

¹¹ Au muse afa'da sila ae Manetualain Fo Manakoasa nafa'da nae leo ia, neukose leoina ma kota ia Au tao akalulutuk de nalosa ana da'di sama leo kete fo ba'ek ndia fo ta hapu tao nahiin seluk fa. Neukose hataholi natotoi-natotono sila popolan nai Tofet, nanahu ta hapu seluk mamana lo-late fe'ek fa.

¹² Kota ia no laun-nala neukose Au taon sama leo Tofet.

¹³ Basa uma manai Yerusalem ma basa Yehuda manen uman-nala neukose langgenggeo sama leo Tofet; nanahu nai uma sila-la lain, hataholi-la tunu bomenik soaneu lamatua lalai-a, a fe fefeek angol soaneu lamatua daebafak fe'ek-kala.

¹⁴ Boema au la'o ela Tofet, mamanak fo au nananadenuk anduku-alosak Manetualain hehelu-hoholon. Au u leo Manetualain uma pandopon-na neu, de au apadeik nai ndia, boema au afa'da basa hataholi-la,

¹⁵ ae, Manetualain Fo Manakoasa, Fo Israel Manetualain-na nafa'da nae leo ia, “Hu ka nde emi malanga batu ma ta au mamanene fa, de neukose Au uni fe kota ia ma basa nggolo ta'duk manai boboa kaisun-nala, ma susa-soe lala'en-na fo Au dudu'a basas.”