YEREMIA 17 - Susula Malalaok Hehelu Palak Ma Hehelu Beuk

Sala-singok ma huhukuk la'eneu Yehuda

¹ Manetualain nafa'da nae, “Hai leoina Yehuda-la lemin, emi sala-singom-mala nanadoki-dula basak nai emi dalem dale, ma nai basa emi mei tunu-hotun-nala bu'un-nala nenik enge besik fo enge-a matan-na nenik poemata mai.

² Emi hataholim-mala hule-haladoi neu mei tunu-hotuk sosongo-tatangok-kala ma di sosongok-tatangok-kala nananapadedeik soaneu ina manek nituk Asyeranai basa ai huk-ka fo ndana manaeefek-kala, fo nai pupukuk-kala poin,

³ ma nai letek-kala fo nai kota deak. Nanahu basa mamana nakaluku-nakatele sosongok-tatangok fo emi mapadedeik basan nai basa nusa lala'en-na, nanahu basa sala-singok fo emi tao-no'ik-kala, hu ndia de neukose Au tao emi musum-mala kalo leni basa emi hata-hetom-mala ma emi su'i-betem-mala.

⁴ Neukose emi fe heni ae fo Au fen neu emi ndia no laka-nakasetik, ma neukose Au tao-a emi makaluku-makatele neu emi musum-ma nai nusak fo te'e-te'e da'di nusa dea ba'eneu emi. Au tao basa sila-la lala'en-na, nanahu Au nasa-melung lua ponu-ponu sama leo ha'i fo nanapilak-ka fo ta hapu nakamate fa.”

Nanoli-nafa'da mata-matak-kala

⁵ Manetualain nafa'da nae, “Metema hataholi la'o ela Au, fo ndia Manetualain-na, fo namahena neu ka'da hataholi daebafak-ka boema nasalai dean-na neu ka'da be'i-balakain soona, neukose Au huku.

⁶ Ndia sama leo na'u-aiana fo manamoli nai mok-ka, fo nai dae tokotik-ka, fo nene-lino-linok ma pilado-kolomasik, ma ta la'i esa boen fo ana hapu malole fa.

⁷ Tehu hataholi fo manamamahena neu Au neukose Au ba'e-palan tatas esa.

⁸ Ndia sama leo aia moli nai le oe manafaak-ka su'un-na; fo okan-na nandondolo losa oe-a. Ana ta bii neu fai hanas-sa fa, de don-na ka'da momo'dok nahele. Leomae fai hanas-sa la'e nusak-ka boe, ndia ta male-tale fa, de ka'da nabuna-naboa nahele.

⁹ Hataholi daebafak-ka dalen-na ta hapu neuk mala fan, malelahik lena basa hata-hata lala'en-na ma he'di-laun matuina nanseli.

¹⁰ Au Manetualain, manapalisak dalek, Au su'di-dou hataholi daebafak dale bobongo anan-na, Neukose Au balas hataholi-a esa-esak tunga ndia tatao-nono'in. boema Au tao tunga sila tatao-nono'in.”

¹¹ Nonokabai manupui lu'u tolok fo ndia nuun ta ndia fa, hataholi fo ta manatao ndos-sa fa hapu hata-heton soona, tatao-nono'in leondiak. Ka'da nai fai keke'uanak mesak-kana neukose namopo basa hata-heton-nala. Nai so'dak fai makabuin-na te butin-na nae ndia hataholi fo nggoak nanseli.

¹² Ita Manetualain uman-na sama leo kandela manek fo mandela-masa'ak, fo nai letek madema neme makahulun eli mai-a.

¹³ Manetualain, O nde been-na Israel namahehenan-na, fo O anam-mala; fo basa manala'o ela O, neukose ala da'di manamaek. Neukose sila mopok-kasa neme daebafak ia mai de leu leo hataholi manamatek-kala daebafan-na neu. Nana, O nde been-na oe mata maso'dak, fo sila la'o elak-ka, Ou Manetualain.

Yeremia noke Manetualain tutulu-fafalin

¹⁴ Manetualain, tao mahai au dei, soona neukose auda'di so'da-la'dak. Soi-tefa mala au dei, soona neukose au hapu so'dak. Ka'da O mesam-ma fo au koa-kiok-ka!

¹⁵ Hataholi lafa'da au lae, “Manetualain ndia basa huku-dokin lala'en-na nai bee? Nemena fo ana taon besak ia leona!”

¹⁶ Ou Manetualain, tehu ta la'i esa boen fo au akaseti O fa, fo fe namate-namopok neu sila. Au boeo ta hii, fo ela susa-soe-a la'e sila fa. O bubuluk ndia so Manetualain. O bubuluk hata fo O mafa'dak-ka.

¹⁷ O boso da'di hata esa fo nakabibik au daleng-nga. O da'di mamana nafufunik ba'eneu au, metema totoa-tataak-ka mai.

¹⁸ Sa'di bole manausi au-a, ma manatuni-ndeni au-a, O tao makamamaek-kana ma O tao mahenu dalen-na nenik bibi-namata'uk. Tehu boso tao leondiak ba'eneu au, O Manetualain. Muni fes mamate-mamopok neu sila losa sila lakalulutuk lanseli.

Muse fe ha'da-holomata neu fai Sabat

¹⁹ Manetualain nafa'da au nae, “Yeremia, muu leo Laun-nala Lelesu Inan-nala fo Yehuda manen-nala la'ok tunga nai lelek sila masok kalua kota. Boema muu seluk lo Yerusalem lelesu ina fe'en-nala.

²⁰ Manduku-malosak Au hala-hehelung-nga neu manek-kala ma basa hataholi Yehuda-la boema basa Yerusalem laun-nala lala'en-na fo manala'ok tunga lelesu sila-la.

²¹ Mafa'da mae leo ia: ‘Metema emi ta mahiik mate fa, soona boso tao-no'i hata nai fai sabat-ta, do meni hata masok tunga Yerusalem lelesu inan-nala.

²² Boso maue-male'di do meni hata beek ndia boe fo kalua neme o umam-ma nai fai Sabat-ta. Faik ndia fai hehelik soaneu Au, fo sama leo Au paleta basan u emi bei ba'i-kain-nala.

²³ Tehu emi bei ba'i-kaim ta nau lamanene do tao afik neu hata fo Au afa'dak fa. Sila lalanga batu, ma ta nau tunga paleta do nafa'da fas.

²⁴ Tunga basa Au paletang-ngala lala'en-na. Boso lu'a lepa hata beek ndia boe, tunga kota ia lelesu inan-na nai fai Sabat-ta. Tao fai sabat-ta da'di fai hehelik soaneu Au, fo boso tao-no'i hata nai faik ndia.

²⁵ Metema emi makalala'ok Au paletang ia-la no te'e-te'en-na soona, tao leo beo manek-kala ma malangan-nala fo ala paleta sama leo Dauk-ka neukose ala masok kota Yerusalem lelesu inan-nala. Sila sama-sama lo hataholi Yehuda-la ma Yerusalem laun-nala neukose ala sa'e kaleta mandalak, de nalosa kota Yerusalem-ma da'dik lupuk-lupuk-sek-se.

²⁶ Neukose hataholi mai leme kota-kota Yehuda, ma leme desa-desa manai Yerusalem titia-tatain-nala mai; neukose ala mai leme Benyamin ngolo-ta'du, leme nggolok manai letek-ka hun-na, leme nggolok manai lete lepak-ka, ma leme Yehuda boboan kona. Neukose ala leni bana-manu tutunu-hohotuk lo O umam leomae soaneu tunun, do ta tunu fan boema fefeek gandum ma kemenyan ma fefeek makasi.

²⁷ Basa sila neukose ala da'di metema emi mamahele neu Au, ma tao fao sabat-ta da'di fai hehelik soaneu Au. Boso lu'a-lepa hata beek ndia boe tunga Yerusalem lelesu inan-nala nai faik ndia dalen-na. Metema emi la'o lena Au paletang sila-la soona, Yerusalem lelesu inan-nala ma uma manen-nala neukose Au hotu heni la'i esak-kasa ma ha'i ndia ta hapu nakamate fa.’ ”