YEREMIA 13 - Susula Malalaok Hehelu Palak Ma Hehelu Beuk

Lafa keke'uk nanatao neme temak lenan

¹ Manetualain nadenu au u asa lafa keke'uk nanataok neme temak lenan mai fo au paken, tehu au ta bole bolon leo oe dale nee fa.

² Boema au u asa lafa keke'uk ndia, de au paken.

³ Basa boema Manetualain kokolak seluk no au, nae,

⁴ “Muu leo lee Efrat, fo mafuni lafa keke'uk ndia lo batu-la lelan-na neu.”

⁵ Boema no Manetualain paletan-na, de au u afuni lafa keke'uk ndia, dekak no lee Efrat-ta.

⁶ Makabuin-na basa faik de'ubee boema Manetualain nadenu seluk au lo lee Efrat-ta u, soaneu ho'i falik lafa keke'uk ndia.

⁷ Boema au u leona, de au ho'i falik lafa keke'uk ndia, neme mamanak fo au afunik-ka. Te sekona lafa ndia po'on so, de ta bisa paken makandondook fa.

⁸ Boema Manetualain kokolak seluk no au, nae,

⁹ “Neukose au laka-akasete hataholi Yehuda-la ma Yerusalem laun-nala eno-dalan tao leondiak. Neukose au tao akalulutuk sila manakoao-ndaeaon nanseli ndia.

¹⁰ Leoina fo mangalauk ia-la langabatu lanseli ma ala ta nau lamahele neu au fa. Ala hule-haladoi, ma sene-do'ok neu kada lamatua daebafak fe'ek. Hu ndia de neukose silasama leo lafa keke'uk fo sosoa-ndandaan tak ndia.

¹¹ Leondiak boe au dudu'a ae ela leo been-na hataholi Israel ma Yehuda nanapa'a nahelek neu au sama leo lafa keke'uk fo nanapa'a nahelek neu manapake kaile'bona. No leondiak de ala da'di au anang-ngala fo manataon-na au na'deng-nga nanakoa-kiok, ma manafe ha'da-holomata. Tehu, ala ta nau tunga Au fa.”

Nggusi mamanak angol

¹² Amak Manetualain nafa'da nae, “Yeremia, mafa'da au hala-hehelung-nga neu hataholi Israel-la mae, basa nggusi mamana angol-la muse isi angol mahenus. Ala lataa lae, ‘Masa bole ami ta bubuluk mae basa nggusi-la muse tao nahenus nenik angol?’

¹³ Soona mafa'da neus mae, hataholi-hataholi manai nusa ia, manek-manek fo Dauk tititi-nonosin-nala, basa imam-mala, nabi-la, ma basa Yerusalem laun-nala neukose Au isi ahenus nenik angol losa ala mafuk.

¹⁴ Boema neukose Au tao tapasasala sila esa no esa. Lasik ma mulik, neukose Au tao taos tao leondiak ta pake do'o-do ampon fa. Neukose Au tao akatoto'a-akatatak-kasa ta pake nameme'da susuek do lalaik fa. Au Manetualain, nde manakokolak-ka.”

Nasanene'dak neu Yeremia la'eneu koaok

¹⁵ Hataholi Israel-la lemin, Manetualain kokolak nae! Boso koao, te mamanene neun!

¹⁶ Emi muse mamatua-mamadema emi Amam Manetualain-na, te ana beita fe makahatuk-ka mai fa, emi eim-ma makatunun nai letelepak-ka, te mangale'dok fo emi mamahehenak-ka beita tao nasafali fan da'dik makiu-makahatuk fa.

¹⁷ Metema o ta nau mamanene fa, neukose au kii amanininok. Au kii amatani neu O nakatutuam ndia no dale nameme'dak. Au lu'uoeng-nga nasalalalok nanahu Manetualain anan-nala nanafua sama leo hataholi nanafook.

¹⁸ Manetualain nafa'da neu au nae, “Madenu manek-ka no ina manek-ka kona neme kandela manen lain mai, nana ti'ilanga manen fo mana'ahiik-ka tu'da henin neme langan mai so.

¹⁹ Yehuda kota-kotan manai kona-la nana sapu nak so, ma ta hapu masok leo nanasapunak sila-la dalek neu fa. Basa hataholi Yehuda-la nanafua leo mamana ookak-ka neu.”

²⁰ Manetualain nafa'da neu Yerusalem laun-nala nae, “Taoafik leona! Emi musum-mala mai leme kii mai! De hataholi-hataholi fo emi masulu-mahapak-kala, ma emi mamahenak-kala lai bee.

²¹ Fo neukose emi mafa'da beek-ka metema hataholi-hataholi fo emi taos sama leo emi tolanom-mala ala tao lakala emi, ma ala koa emi? Tao leo beo neukose emi mame'da he'dis sama leo inak-ka fo ana sanga bongi.

²² Fafa'kama emi matane mae, tao le'e de basa sila-la ala tuni-ndeni emi ao paam-ma, ma tao le'e de emi bua-lo'am-ma nana siba'ek, ma emi nana saok nenik laka-nakasetik. Bubuluk leon-na te, basa sila-la da'di nanahu emi sala-singom-mala ba'u nanseli.

²³ Hapu hataholi lou nggeok-ka tao nasafali loon-na dulan-na do meoasu namopo molin-na? Tao leo beeo ta! Leondiak boe, emi fo manatao mangalauk-ka tao leo beeo ta tao malole fa.

²⁴ Neukose Au tao tapasasala emi, sama leo anin-na fu dae sopuk-ka neme moo solokaek-kamai.

²⁵ Au aketu basa emi ua-nalem-mala leondiak so, nanahu emi mamahele neu lamatua daebafak masapepekok-kala.

²⁶ Neukose Au nde sisiba'e papake-ngganggaok manai emi aom-ma, fo ela emi makahola-la ma emi mae.

²⁷ Au ita basa emi tao-no'i dede'ak-dede'ak fo Au ta hii fan. Au ita basa emi tunga lamaua daebafak fe'ek-kala nai pupukuk-kala ma nai tina-osi-la, sama leo hataholi touk-kala lamula hataholi saoinan, do sama leo ndala mane-a asa sasaon-naneu ndala ina. Yerusalem Laun-nala lemin, soe ba'eneu emi! Neukose faihi'da de fo emi matapo'i neme basa mangalauk-kala mai?”