YEREMIA 11 - Susula Malalaok Hehelu Palak Ma Hehelu Beuk

Yeremia ma Manetualain hehelu-balatan

¹ Manetualain nafa'da au nae,

² “Taoafik neu hehelu-hoholok fo Au taon neu Au anang-ngala eno-dalan. Mafa'da neu hataholi Yehuda-la ma Yerusalem laun-nala mae

³ Au, fo Israel Manetualain-na, soo-supa neu see ndia fo ana ta nau tunga Au hehelu-hoholong dia eno-dalan fa.

⁴ Hehelu-hoholong ndia Au tao basan neu sila bei-ba'ikain-nala, nai lelek Au O falik-kasa kalua leme Masir mai, fo nusak ndia sama leo tasi ha'i ba'eneu sila. Au adenus lamahele neu Au, ma tao no'i basa hata fo Au paleta basak-ka so. Besak ia Au afa'da basa hataholi Yehuda-la ma Yerusalem laun-nala ae, metema ala lamahele Au soona, neukose sila da'di Au anang, ma sila Manetualain nde Au.

⁵ Metema sila tao-no'i basa sila-la soona, neukose Au tao atetu Au hala-hehelung-nga neu sila bei ba'i-kain-nala ae, nusak fo maisi-mamina ma tetu-temak fo besak ia ala langatu lak ndia, neukose Au fen neu sila.” Au ataa ae, “Malole, Manetualain.”

⁶ Boema Manetualain nafa'da neu au nae, “Muu leo kota-kota manai Yehuda, ma enok-enok manai Yerusalem-ma. Mafa'da Au hala-hehelung nde ia neu hataholi-hataholi manai naa-la. Madenus fo ala taoafik ma ala lamahele au hehelu-hoholong eno-dalan.

⁷ Lelek fo Au ofalik sila bei ba'i-kain-nala kalua leme Masir mai-a, Au fes nasanene'dak mahelek, fo ela lamahele neu au. Losa faik ia be, au bei fe ahele au anang-ngala nasanenedak la'eneu dede'ak ndia,

⁸ ma adenus lamahele Au hehelu-hoholong ndia, te sila ta nau lamanene ma ta nau tunga fa. Nakalenak sila langa batu lahele, ma mangalauk-ka sama leo makahulun-na. Hu ndia de basa huhukuk-dodokik, fo manai hehelu-hoholok ndia dalek-ka neukose Au solin leo sila alun lain neu.”

⁹ Basa boema Manetualain nafa'da seluk au nae, “Hataholi Yehuda ma Yerusalem laun-nala lalabasa halak fo ala la'ban au.

¹⁰ Sila tao sala-singok fo nanatao basak neme sila bei ba'i-kain-nala fo ala ta nau lamahele neu Au fa, de sila lamahele neu lamatua daebafak fe'ek, ma ala ta nau tunga Au paletang-nga fa. Leomae Israel ma Yehuda la'olena hehelu-balatak, o Au tao basan neu sila bei ba'i-kain-nala.

¹¹ Hu ndia de, Au, fo Manetualain, fe nasanene'dak ae, neukose Au eni fe sila susa-soe de sila ta hapu laladeak fa. Metema ala lalo bebou, loke tutulu-fafalik neme Au-a mai soona, Au ta nau amanene fa.

¹² Boema hataholi Yehuda-la ma Yerusalem laun-nala leu loke tutulu-fafalik neu lamatua daebafak fe'ek fo sila koa-kion no fe tutunu-hohotuk neu-a. Lamatua daebafak ndia neukose ta soi-tefa sila nai lelek susa-soe ndia mai-a fa.

¹³ Hataholi Yehuda-la lamatua daebafan-nala ba'u nanseli, de'u sila kotan-nala boe. Yerusalem laun-ala lapadedeik mei tunu-hotuk de'u enok-enok manai Yerusalem kotan-nala, soaneu fe tutunu-hohotuk neu lamatua daebafak Baal-la.

¹⁴ Hu ndia de, Yeremia, boso hule-haladoi soaneu sila, ade moke tutulu-fafalik neme Au-a soaneu sila. Metema sila mai dudu'a-aafi makale'ok-ka dalek fo loke tutulu fafalik neme Au-a mai soona neukose Auta nau amanene fas.”

¹⁵ Manetualain nafa'da nae, “Au anang-ngala fo Au sue-laik-ka ala tao basa eno-dalak, fo mangalauk so. De sila ta lanuu hak lai Au umang-nga fa. Sila leuik-ka lae, hu ka nde no tao hehelu-balatak-ka, ma hu ka nde no tutunu-hohotuk bana-manu, de neukose sila hapu binga. Ta'da-la mamate-mamopok-ka. Ade hu ka nde no enok ndia de sila bisa lamahoko?

¹⁶ Hapu hai Au foi sila na'de, ai setun manae'efek, fo tepa neni boan-na ma neulauk-neulauk mesan. Tehu besak ia, nenik halak nadodolo fo matuaina, de neukose Au hotu heni basa doon-nala, ma neukose Au heu la'di basa ndanan-nala.

¹⁷ Au nde apadedeik Israel ma Yehuda, Au, Manetualain Fo Manakoasa. Tehu besak ia Au dudu'a basa soaneu Au eni fe susa-soe neu sila. Sila nde tao aon basa sila-la, nanahu la tao basa mangalauk so, fo nde ala fe tutunu-hohotuk neu Baal-la, de nalosa Au amanasa.”

Nakabubua makahatuk soaneu taonisa Yeremia

¹⁸ Manetualain nafa'da neu au la'eneu au musu nong-ngala dudu'a-aafi mangalaun-nala soaneu au.

¹⁹ Au sama leo bi'i lopo-a fo ta pake dudu'a-dodok so'on, te nenin leo mamana dodo'dok-ka neu. Au ta bubuluk fa te, au nde da'di sila dudu'a-aafi mangalaun-na isin-na. Sila lafa'da lae, “Mai fo ata lo'o heni ai ia, beidai ana bei nabuna-naboa ia; Ita tao tamate-tamopon fo ela hataholi lasanggango heni na'den-na.”

²⁰ Boema au hule-haladoi ae, “Ou Manetualain Fo Manakoasa, O manamaketu-mala'dik fo matetuk; O nde so'ba-su'di dudu'a-aafik-ka ma hataholi-la dalen-na. Au dede'ang ia Au fen leo o-a neu. Ela leo been-na o nde ito mutang O bala hataholi-hataholi sila-la tatao-nono'in-nala.”

²¹ Kota Anatot hataholin-nala hii ela leo been-na Au mate. Sila lafa'da lae, “Metema O tui benga Manetualain hehelu-balatan neu ami tataas esa soona, neukose ami taomisa o.”

²² Hu ndia de, Manetualain Fo Manakoasa nafa'da nae, “Neukose Au huku sila! Sila hataholi-hataholi muli-solun-nala neukose mates nai matematatik-ka dalek, ma sila anan-nala neukose mates nenik la'as-sa.

²³ Au aketu basa fain-na soaneu emi mamate-mamopok ba'eneu hataholi-hataholi Anatot-tala, ma metema sila huhukun-nala losa soona, neukose hataholi esa ta naladeak fa boen.”