YEREMIA 10 - Susula Malalaok Hehelu Palak Ma Hehelu BeukNakaluku-nakatele sosongok-tatangok 1 Hataholi Israel-la lemin, mamanene Manetualain hala-hehelun neu emi. 2 Manetualain nafa'da nae, “Boso na'da leoina fe'ek-kala ha'da tataon, ma mita ta'du tana nai lalai-a, fo leoina sila bii-mamata'u soona boso nggenge. 3 Leoina sila-la ha'da-tataon-nala sosoa-ndandaan taak makandondook. Ala lo'o ai nai nula dale, fo ladenu tuka ai-la tao-no'in da'di dodoki-dudulak sosongok-tatangok. 4 Basa soona dodoki-dudulak ndia, nanabalias nenik lilopilas ma lilofulak, boema tao latea-lahelen nenik paku fo boso tu'da. 5 Dodoki-dudulak sosongo-tatangok sila-la sama leo hataholi nai osi aido dale. Sila ta hapu kokolak fa, ta hapu nggani ein-nala fa, ma muse so'us. Boso bii-mamata'u neus, nana ala ta tao mangalauk neu emi fa; Ta lakatatakak tao malole boen fa.” Makaluku-makaele neu Manetualain 6 Manetualain do mandela masa'ak, ta hapu sama leo O fa, O na'dem-ma matua-madema ma henuk no koasa. 7 See ndia fo ana ta nau namahele fa, neu O, manek la'eneu leoina-la? Te'e-te'e o manafe ha'da-holomata nanseli. Neme basa malelak fo manai leoina-la tala'da ma neme basa sila manen-nala mai, ta hapu hataholi esa boen naksasamak no O fa, Ou Manetualain. 8 Sila basa-basas nggoa-panganaa nana lamatua daebafan-na ka'da ai tuk mesak-kana, ma ta hapu nanoli hata neulauk fa. 9 Ndia manapopoti-papaluk nenik lilofulak ma lilopilas fo nananenik neme Spanyol ma kota Ufas-sa, fo basa-basas lala'en-na lima tataak neme basa lima leen ma mana tao nalelak lilopilas-sa. Papake-ngganggaon neme temak pilas balanggeok ma tema pilas nulak-ka mai, fo nanatao neme basa manatenu malelak-ka mai. 10 Tehu O, Manetualain, Manetualain fo matetuk-ka, Manetualain fo manafe so'dak-ka, Manek fo manaketu basa tak. Metema O mamanasa soona, daebafak-ka nanggengo, metema O nasam-ma lua soona leoina-la ta lakatatak fa. ( 11 Hei anang-ngala lemin, emi muse mafa'da neus mae, lamatua daebafak-kala fo ta lakadada'dik lalai-a ma daebafak ndia fa, neukose nanatao namopo-namatek. Neukose sila mopok-kasa neme daebafak ia mai.) Nakamee kokoa-kikiok neu Manetualain 12 Manetualain nakadada'dik daebafak-ka nenik koasan-na, Ana heheo-hihiluk daebafak-ka nenik manatee-tenon-na, ma nataba lalai-a nenik dudu'a-aafin-na. 13 Ka'da nenik paletan-na, de oe-a nadodolo nai lalai-a. Ana fe ko'as-sa neme daebafak-ka pe'dan, ma ana tao ndelas-sa lasalolo'de nai u'dan dale, boema ana haitua anin neme mamana pepe'dan-na. 14 Hataholi daebafak-ka nita basa sila-la boema lame'da, lae ndia nggoak ma ta nanuu dudu'a-aafik fa. Basa manatao nalelak lilopilas mopo matan-nala, nana sila tao dodoki-dudulak sosongo-tatangok ndia ta te'e-te'ek fa ma hahaen ta. 15 Sosongo-tatangok sila beli taak-kala, nanda nanahokinonolik ma nananakadadaek. Metema losa fain-na soona sila mopo-mate. 16 Yakob etualain-na ta sama leo sosongo-tatangok ndia fa; Ndia manamakadada'dik basa hata lala'en-na. Na'den-na nde Manetualain Fo Manakoasa; Ndia nde hele Israel da'di Anan-nala. Bibii-namata'uk moli da'di nai nusak dale 17 Hei Laun Yerusalem-mala lemin, ala sapu-la emi! Hu ndia de malai beno'u leon-na! 18 Oek ia soona neukose Manetualain po'ilotak basa leoina Yehuda-la neu mamana okak-ka; Neukose Ana tao nakalulutuk emi basa makandondook. Ndia nde been-na ala-heheluk neme Manetualain. 19 Laun Yerusalem lalo bebou lae, “Ami hapu bisu matua de ana ta hapu hai fa. Makahulun-na ami maedaenga toto'a-tataak ia ami lu'a-lepan, te sekona taa. 20 Ami lalaa temam-ma, ma talin-nala ketun la'iesak-kasa. Ta hapu manamapadedeik falik lala temak so'on, ma ta tao falik teman-nala fa nanahu la'o basa ni'iana-la so.” 21 Boema au ata ae, “Ita mauli-malangan sila-la nggoak-kala. Ala ta loke natutu'duk neme Manetualain mai fa, hu ndia de ala ta hapu hata esa boen, ma ita tapasasala su'di leo bee neu. 22 Mamanene dei! Hapu tutuik lae leoina esa nai kii ana sanga tao nale'a-napilik. Neukose soloda'dun-nala tao-la Yehuda kotan-nala da'di nenee lino-linok ma ta hapu manaleo-mapalasa fa. Neukose busa fuik-kala lafuni lai na.” 23 Manetualain, au bubuluk ta hapu hataholi esa boen nanuu koasa fo ana naketu ua-nalen do lelepos nalelak so'dan-na eno-dalan. 24 Fepa li'u ami ou Manetualain, tehu boso fepa liu mahe'di ami nanseli. Boeo boso huku ami, metema O nasam-ma be fo'a, nana tao leo beo neukose ami basa-mala mate-mopo. 25 Po'a-ngganga O nasam-ma neu leoina fo ta nalelak O fa ma ta nau lakaluku-lakatele neu O fa. Nana sila tao lamate-lamopo O anam-mala makandondook ma ala tao lakalulutuk ami nusam-ma. |
LAI 2018
Indonesian Bible Society