YEREMIA 1 - Susula Malalaok Hehelu Palak Ma Hehelu Beuk

¹ Susulak ia, isin-na nde been-na Yeremia dede'a-kokolan. Fo imam esa neme kota Anatot-ta, nai nusa Benyamin-na, na'de Hilkia anan Yeremia ia.

² Nai tepo lelek Amon, fo mane Yehuda anan Yosia paleta neu teuk-ka telun-na boema, Manetualain kokolak no Yeremia.

³ Basa ndia boema Manetualain kokolak seluk non la'i nono'ik, mulai tepo lelek Yoyakim, fo Yosia anan-na paleta, losa Zedekia, fo Yosia anan-na paleta neu teuk-ka sanahulu esan-na. Nai bula ka lima, fo nai teuk ndia boe, laun Yerusalem-mala nanafook leo mamana tu'u-tapak neu.

Yeremia nananalook

⁴ Manetualain nafa'da au nae,

⁵ “Au beita fe o lupa-aok nai o inam tein dale fa, ma beita bongi o fa te, Au hele ma Au so'u basa o, soaneu da'di nabi ba'eneu leoina-kala.”

⁶ Boema au ataa ae, “Ou Manetualain au ta kokolak alelak fa, nanahu au bei muli-soluk nanseli.”

⁷ Tehu Manetualain nataa nae, “Boso mafa'da mae, o bei muli-soluk manseli. Metema, Au adenu o muu leo su'di see muu soona, o muse muu, ma Au adenu o mafa'da basa hata lala'en-na, o muse manduku-malosak-kana neus.

⁸ Boso bii-mamata'u neus, nana neukose Au sama-sama o o, fo Au asulu-ahapa o. Au, fo Manetualain nde manakokolak-ka!”

⁹ Basa ndia boema Manetualain look liman-na mai, de nafaloe au bafang-nga, boema nafa'da nae, “Mamanene leona, fo po'a-benga dede'a-kokolak fo, Au afa'dak ia-la.

¹⁰ Faik ia, Au fe o koasa neu leoinak-kala, ma nusa-nusak-kala – koasa soaneu tao matu'u henin, ma tao mandefa henin, soaneu loli henin, ma tao mamopo-mamate, soaneu mafofo'a ma sele-nggali.”

Ninitak dua

¹¹ Manetualain natane au nae, “Yeremia, o mita beek?” Boema au ataa ae, “Au ita ai ba'dam-ma ndanan-na, Manetualain.”

¹² Boema Manetualain nae, “Tete'ek-ka, Au anea fo ela basa hata fo Au afa'dak-ka, ala da'di.”

¹³ Boema Manetualain natane seluk au nae, “O mita seluk beek bai?” Boema, au ataa ae, “Au ita ulek-ka nakadoto nai boboak kii, de hii-hii nae nasale leo ia mai.”

¹⁴ Manetualain nafa'da nae, “Soe matuaina, neukose ana mai neme kii mai, fo ana tunin-na basa nusak ia laun-nala.

¹⁵ Neukose Au adenu basa leoina manai boboak kii-la, ala mai, fo ala koasa Yerusalem. Neukose ala loso-la, papala nanadamak fo manaokofefeo-la kota ia, boema lelesuinan-nala, ma basa kota-kota manai Yehuda-la.

¹⁶ Neukose Au huku Au anang-ngala, nanahu lasala-lasingo, ma lasadea Au. Ala fe basa tutunu-hohotuk neu lamatua daebafa fe'ek-kala, ma ala dokik dodoki-dudulak, fo ala sene-do'ok neun.

¹⁷ Yeremia, maheheleaom leona! Muu leona, fo manduku-malosak neus, basa hata fo Au paletan neu o. Boso bii-mamata'u neus, fo ela Au boso tao-ala o boetai bii-mamata'u seluk, metema o masasalematak moos.

^18-19 Mamanene te, neukose nusak ia, laun-nala la'ban o, fo nde Yehuda manen-nala, basa manaho'u paleta-la, basa imam-mala, ma laun-nala. Tehu faik ia, Au fe o be'i-balakaik, soaneu la'ban-nasa. Neukose o da'di sama leo kota fo, nanuu kota musu, sama leo dii besi, ma papala nanadama liti. Neukose ala ta hapu sengi o fa, nana neukose Au o o, ma Au asulu-ahapa o. Au, fo Manetualain nde manakokolak-ka.”