ULANGAN 8 - Susula Malalaok Hehelu Palak Ma Hehelu Beuk

Dae malole soaneu mamana leleok

¹ “Basa hoholo-lalanek fo au fen neu emi, nai faik ia, emi muse tao-no'in no dalek-katematuak, fo ela emi maso'da mahele, ma emi boetai mamade'uk-ka, ma emi leo nai dae fo, Manetualain helu basan neu emi bei-ba'i kaim-mala.

² Mafandendelek leona! Te nai teuk haahulu dalen-na, emi Manetualaim-ma nauli-nalanga emi, nai emi leleo-lala'o dae doom-ma dalek, tunga moo solokaek-ka. Manetualain dudu'a basa leleo-lala'ok ndia, soaneu Ana so'ba emi, fo ela Ana nita beek nanape'dak nai emi dalem dale, ma ade neukose emi tunga paletan-nala do ta.

³ Ana po'ilotak emi mamala'a-mamandoe, boema Ana fe emi koki manna, fo emi mi'a. Emi, ma emi bei-ba'i kaim-mala, makahulun-na beita mi'a mita nana'ak ndia fa. Manetualain tao leondiak, fo nanoli emi, nae hataholi daebafak-ka, ta hapu naso'da nenik ka'da nana'a-nininuk mesak-kana fa, tehu naso'da neme Manetualain hala-kokolan mai.

⁴ Nai teuk haahulu dalen-na ndia, emi bua papakem-mala, ala ta da'di palaak fa, ma emi eim-mala boeo, ta peta fa.

⁵ Mafandendelek mae emi Manetualaim-ma, nanoli emi, sama leo amak esa, nanoli anan-nala.

⁶ Da'di, tao-no'i basa hata lala'en fo, emi Manetualaim-ma paletan neu emi. Maso'da tunga hoholo-lalanen, ma fe ha'da-holomata neun.

⁷ Emi Manetualaim-ma, no emi leo nusak fo maoe-maisik-ka meu; nusak fo, lee ma oematan makadotok, ma oe manafaak-ka nai dae dale, fo ana faa leo bafak-kala, ma pupukuk-kala neu.

⁸ Nusak ndia, ana fe buna-boa mata-matak-kala, fo nde gandum, angol, kaa boak, dalima boak, ai setun ma fanioe.

⁹ Neukose, emi ta mamala'a-mamandoe, do to'a-taa nai ndia fa. Besi-la, lai batu piak manai sila-la dalek, ma emi bole kali liti-a nai pupukuk-kala dalek.

¹⁰ Neukose, emi mi'a-minu losa emi makabete, soona moke makasi neu emi Manetualaim-ma, soaneu dae maoe-maisik fo, Ana fen neu emi ndia.”

Nasanene'dak fo ela boso mafandele heni Manetualain

¹¹ “Manea matalolole, fo boso nalosak emi mafandele heni, emi Manetualaim-ma; ho'u la'iesak hoholo-lalanen fo au fen neu emi, nai faik ia dalen-na.

¹² Metema, emi mi'a-minu losa emi makabete, ma emi taom-ma emi umam-mala malole, fo emi leo nai dalek,

¹³ ma metema, emi sapim, bi'ihiik ma bi'ilopom-mala boetai lamade'uk-ka, ma emi lilofulam, lilopilam boema emi hata-hetom fe'ek lala'en-na makadotok soona,

¹⁴ manea matalolole, fo ela emi boso da'di hataholi manakoao-ndaeaok, ma mafandele heni emi Manetualaim-ma fo manasoi-po'i emi neme Masir mai, fo mamanak manatao emi da'di ata.

¹⁵ Manetualain nauli-nalanga emi, tunga moo solokaek maloaina, fo neni bibii-namata'uk, ma henuk no menge makaak-ka ma kulak-kala ndia. Nai dae ma'dak, fo oe ta nai ndia fa, Ana fe oe-a faa neme batu dale mai, fo ela emi hapu minu losa emi makabete.

¹⁶ Ana fe emi koki manna neme moo solokaek-ka, fo ana da'di emi nana'am, fo emi bei-ba'i kaim-mala, beita lalelak nana'ak ndia fa. Manetualain tao basa sila-la, fo Ana so'ba emi, ma Ana taon-na emi makaloe-makadae oam-mala, fo ela neu mate'en-na, Ana tao malole soaneu emi.

¹⁷ Da'di, emi ta bole dudu'a-dodoo, mae no emi tutunga-sasangam-ma emi be'i-balakaim, de emi da'di hataholi kamasu'i-makabetek.

¹⁸ Mafandendelek te, emi Amam Manetualaim nde fe emi su'i-betes ndia. Ana tao leondiak, nanahu losa faik ia dalen-na, Ana bei lilineka neu hehelu-balataan, fo Ana taon no emi bei-ba'i kaim-mala.

¹⁹ Boso mafandele heni, emi Manetualaim-ma, ma boso fali deak leo lamatua daebafak fe'ek-kala meu, boema emi sene-do'ok ma mahele neun. Faik ia, au fe emi nasanene'dak, ae metema emi mafandele henin, fo emi taon soona, tao leo bee-o, Manetualain tao namate-namopo emi.

²⁰ Metema, emi ta lilineka neu emi Manetualaim-ma fa soona, neukose Ana tao namate-namopo emi boe, da'di leo Ana tao namate-namopo leoina fe'ek-kala neme emi matam-ma.”