ULANGAN 7 - Susula Malalaok Hehelu Palak Ma Hehelu Beuk

Manetualain anan fo Ana helek-kala

¹ “Neukose emi Manetualaim-ma no emi leo nusak fo, neukose emi leon-nana, ma neukose, Ana usi heni leoina makadotok-kala, leme nusak ndia dalek mai. Neukose, Ana usi heni leoina hitu, leme emi matam-ma mai, fo leoina sila-la, aon-nala ba'u lena emi, ma balakain-nala, lena heni emi boe, fo hataholi sila-la nde hataholi Het, Girgasi, Amori, Kanaan, Feris, Hewi ma Yebus.

² Metema, emi Manetualaim-ma fe leoina sila-la, leo emi koasam dale neu, fo emi sengis soona, taomisa la'iesak-kasa. Emi boso sue-lais, do tao hehelu-balataak moo hataholi sila-la.

³ Emi ma emi anam-mala boeo, ta bole sao hataholi sila-la fa, ma boso fe loak neu emi anam-mala sao hataholi sila-la boe,

⁴ fo ela hataholi sila, boso tao-la emi anam-mala dook-ka leme Manetualain mai, fo ala sene-do'ok neu lamatua daebafak fe'ek. Nana, neukose Manetualain namanasa, fo no lai-laik, Ana tao namate-namopo emi.

⁵ Hu ndia de, tao makalulutuk leoina sila-la, mei tunu-hotun-nala, tao makalulutuk lutubatu sosongo-tatangon-nala, tao makalulutuk dii sosongo-tatangon-nala, ma hotu heni dodoki-dudula sosongo-tatangok fo ala sene-do'ok-ka.

⁶ Emi muse tao basa sila-la, nanahu emi Manetualaim-ma, nuun emi. Ma neme basa leoina manai daebafak-ka lala'en-na, emi Manetualaim-ma, Ana helek-ka nde emi, soaneu emi da'di Ndia anan, fo malalao-malalafuk.

⁷ Manetualain sue-lai ma Ana hele emi, ta hu kande emi ba'u lena neme leoina fe'ek-kala mai fa; te'e-te'e, emi nde been-na, leoina fo anak nanseli nai daebafak ia.

⁸ Tehu, Manetualain hele emi, nanahu Ana sue-lai emi, ma nahiik tao natetu, Ana tao hehelu-balataak no emi bei-ba'i kaim-mala. Hu no ndia de, Ana soi-tefa-nala emi, nenik koasa matuainan-na, ma Ana soi-po'i emi neme emi da'di ata neu mane Masir-ra.

⁹ Mafandendelek mae ka'da emi Manetualaim-ma mesa-mesak-kana nde Manetualain-na, ma Ndia nde Manetualain fo manalilinekak. Manetualain tao natetu hehelu-balataan, ma natu'du nahele susue-lalain neu hataholi fo, manasue-lain neun-na, ma manatunga paletan-nala, losa bobongik lifun esa.

¹⁰ Tehu, Ana ta hia-penge huku hataholi, fo ana ta nahiik-kana fa.

¹¹ Da'di, tunga basa hoholo-lalanek fo faik ia, au anduku-alosak-kana neu emi.”

Baba'e-papalak neu hataholi manatunga paleta

¹² “Metema, emi taoafik neu paleta sila-la, ma emi tao-no'in no emi dalek-katematuam-ma, soona emi Manetualaim-ma boeo, neukose Ana lilineka neu hehelu-balataan fo, Ana taon no emi-a. Neukose, Ana natu'du nahele susue-lalain neu emi, sama leo Ana helu basan neu emi bei-ba'i kaim-mala so.

¹³ Neukose, Ana sue-lai ma Ana fe emi baba'e-papalak, nalosa emi anam makadotok, fo emi dede'um-mala, boe popo-tama lakandoo. Neukose, Ana fe baba'e-papalak neu emi tinam-mala, nalosa labuna-laboa gandum, angol ma mina setun. Neukose, Ana fe emi baba'e-papalak, nalosa emi sapim-mala, bi'ihiim-mala, ma bi'ilopom-mala lamade'u. Neukose, emi sipo baba'e-papalak sila-la, nai nusak fo Manetualain fen neu emi, nandaa no hala hehelun neu emi bei-ba'i kaim-mala.

¹⁴ Neme basa leoina manai daebafak-ka, ta hapu esa boen, fo ana hapu baba'e-papala manasasi kao-kaok-ka, sama leo emi fa. Neme emi basa-basam-mala, ma neme emi bana-manum lala'en-na mai, ta hapu kalate'dis esa boen.

¹⁵ Neukose, Manetualain nasulu-nahapa emi, neme he'di-laus lala'en-na mai, ma nadook emi neme basa soe lala'en fo, emi mita matam neme Masir, tehu Ana fe soe sila-la, ala tuni-ndeni-la, emi musum-mala.

¹⁶ Basa leoina fo, emi Manetualaim-ma fes leo emi koasam dale neu-a, emi muse tao mamate-mamopos; boso matu'du susue-lalaik neu leoina sila. Boso sene-do'ok neu sila lamatua daebafak-kala, nanahu tatao-nono'ik ndia, neni fe emi soe.

¹⁷ Fafa'kama, emi dodoo-mae, leoina sila-la, de'ulena emi, nalosa emi ta bisa usiheni fas.

¹⁸ Tehu emi boso bii-mamata'u leoina sila-la; mafandendelek, hata fo emi Manetualaim-ma nafa'da mane Masir-ra no laun-nala lala'en-na.

¹⁹ Mafandendelek, emi mita matam soe matuaina-la, manada'di beuk-kala, ma be'i-balakai matuaina fo emi Manetualaim-ma paken, soaneu Ana soi-po'i emi-a. Leondiak boe, neukose emi Manetualaim-ma, taon soaneu leoina fo, emi bii-mamata'uk-kala.

²⁰ Lena-lenak, emi Manetualaim-ma, neukose nakadada'dik bibi-namata'u matuaina, nai leoina sila tala'da, nalosa hataholi fo lalai leu ke'ke boeo, neukose mate-mopos.

²¹ Da'di, boso bii-mamata'u neu leoina sila-la. Te emi Manetualaim-ma nasulu-nahapa emi. Ndia nde been-na, Manetualain fo matua-madema, ma nanasu'di-do taak.

²² Neukose Ana usiheni leoina sila-la faa-faa, neme emi matam-ma mai. Emi ta bole tao mamate-mamopos no lai-laik fa, fo ela bana makaa-makisuk-kala boso lamade'u, ma leni fe emi bibii-namata'uk.

²³ Enon-na leondiak, ba'eneu emi Manetualaim-ma fe emi musum-mala leo emi neu. Neukose, Ana taon-nalas lapokak losa mate-mopos.

²⁴ Neukose, Ana fe sila manen-nala leo emi neu. Fo neukose, emi taomisas, ma mopo na'den-nala. Ta hapu hataholi esa boen, fo ana bisa nakatatakak nasasalematak no emi fa; nana neukose emi tao mamate-mamopo la'iesak-kasa.

²⁵ Hotuheni, dodoki-dudula sosongo-tatangok fo, ala sene-do'ok-kala. Emi dalem-ma boso tu'da neu liliofulak do lilopilas fo nananakadiditak, neu dodoki-dudulak sila-la, boema emi ho'i malas. Metema, emi la'olena paleta ndia soona, neukose mate emi, nana emi Manetualaim-ma ta hii hataholi fo, manasene-do'ok neu dodoki-dudulak sosongo-tatangok fa.

²⁶ Boso pe'da-fua dodoki-dudulak sosongo-tatangok esa, nai emi umam dale, fo ela sosoo-susupak fo manatuni-ndeni nalas-sa, boso tuni-ndeni-nala emi boe. Emi muse makamuu-makadau ma malua tatao-nono'ik matak leondiak-ka, nanahu Manetualain soo-supa tatao-nono'ik ndia.”