ULANGAN 4 - Susula Malalaok Hehelu Palak Ma Hehelu Beuk

Musa fe nafofo'ak neu Israel fo ela ala lilineka

¹ Boema Musa nafa'da leoina ndia nae, “Tunga basa hoholo-lalanek fo, au anolin neu emi, fo ela emi bole maso'da losa emi leo nai dae fo emi bei-ba'i kaim-mala Manetualain-na fen neu emi-a.

² Emi boso popo-tama seluk paleta neu au fe emi paleta-la, do tao mamopo paleta sila-la esa boen. Tunga emi Manetualaim-ma paletan fo au fen neu emi ndia.

³ Emi mita matam, hata fo emi Manetualaim-ma taon neme Letek Peor-ra so. Hataholi fo manasene-do'ok neu Baal nai mamanak ndia, Ana tao namopo-namates,

⁴ Tehu emi fo manalilineka nahele neu emi Manetualaim-ma, bei naso'da losa besak ia.

⁵ Au anoli basa hoholo-lalanek sila-la neu emi, sama leo au Manetualaing-nga paletan neu au-a. Tunga basa sila-la nai nusak fo, neukose emi masok-kana, fo emi leon ndia.

⁶ Tao-no'i basa sila-la no lilinekak. Metema emi taon leondiak soona, leoina fe'ek-kala lita emi manatee-tenom-ma. Metema lamanene la'eneu hoholo-lalanek sila-la soona, neukose lafa'da lae, ‘Leoina matuaina ndia manatee-tenon-na, ma dodole da'u-na ba'un-na seli!’

⁷ Leoina matuaina beek-kande, nanuu lamatua daebafak fo metema paluun soona, ana deka nanseli, sama leo ita Manetualain-na Ana deka no ita? Metema ita taloo bou-bou toke tutulu-fafalik soona, nataa ita, su'di neu fai beek ndia boe.

⁸ Ma leoina matuaina beek kande, nanuu hoholo-lalanek fo ndoos ma matetuk nanseli, sama leo hoholo-lalanek fo au anolin neu emi nai faik ia?

⁹ Taoafik ma mafandendelek matalolole, fo ela nai emi fai maso'dam-ma dalek, emi ta mafandele heni hata fo emi mita matam so. Tui emi upu-anam-mala,

¹⁰ la'eneu faik ndia, fo nai lelek emi mapadeik meme emi Manetualaim-ma matan neme Letek Sinai-a. Nai lelek ndia, nafa'da au nae, ‘Maloo makabubua leoina ndia. Nana Au ahiik lamanene hata fo Au sanga anduku-alosak-kana, fo ela lanoli tunga neu Au, nai sila fai maso'dan-na dalek, ma fo ela lanoli anan-nala fo ala tunga Au.’

¹¹ Tui emi anam-mala, tao leo beek de emi mai de emi mapadeik nai letek ia huun-na, letek fo ha'imasu makahatuk-ka poti-nan sama leo ko'as makateina, ma ha'in-na pila losa leo lalai neu.

¹² Basa boema, Manetualain kokolak no emi, neme ha'i dale mai, de emi mamanene halan-na, tehu emi ta mita mata-panan leo beek fa.

¹³ Ana po'a-benga neu emi, neme naa mai, la'eneu hata fo emi muse tao-no'in, soaneu emi tao matetu hehelu-balatak fo Ana taon no emi-a. Ana sulak basa Paleta ka 10-kala, neu batu lei ka duak-kala lain ndia, emi muse tao tungan.

¹⁴ Manetualain nadenu au fo au anoli emi, basa hoholo-lalanek fo emi muse tungan, nai nusak fo mahani te neukose emi masok-kana, fo emi leo nai ndia.”

Nasanene'dak fo ela boso sene-do'ok neu lamatua daebafa fa'ek

¹⁵ “Mafandendelek matalolole! Te nai lelek Manetualain kokolak no emi neme ha'i dale mai, fo neme Letek Sinai-a, emi ta mita hata esa boen.

¹⁶ Da'di, manea leona, fo ela boso nalosak emi masala-masingo, nanahu emi tao dodoki-dudulak fo emi sene-do'ok neun. Dodoki-dudulak ndia lupan-na su'di leo beek boe, sama leo touk do inak,

^17-18 manupui do i'ak, bana manalo'do-laek do bana fe'e-fe'ek-kala.

¹⁹ Boso tao sala-singok, nanahu sene-do'ok ma mamahele neu hata fo emi mitan nai lalai, sama leo: le'do-a, bulak-ka, ma nduuk-kala. Emi Manetualaim-ma po'ilotak leoina fe'ek-kala sene-do'ok neu basa sila-la.

²⁰ Tehu emi nde been-na, leoina fo nanasoi-tefak neme Masir mai, mamanak fo emi doi-doso manseli. Noo emi kalua meme nusak ndia mai, fo ela emi da'di Ndia leoinan, sama leo besak ia.

²¹ Tehu emi Manetualaim-ma namanasa au, hu kande emi, de Ana soo nae, neukose au ta lena leo Lee Yarden-na selik u, fo masok dae maoe-maisik fo neukose, Ana fen neu emi ndia fa.

²² Ta dook-ka so'on te, neukose emi lena leo selik meu, fo mangatuu-ma dae maoe-maisik ndia; tehu au ta tunga fa, nana neukose mate au nai ia.

²³ Mafandendelek matalolole! Fo boso mafandele heni emi Manetualaim-ma tao hehelu-balataak no emi-a. Tunga paletan-na; fo boso doki-dulak dodoki-dudulak nai lupak matak leo beek ndia boe, fo sene-do'ok neun,

²⁴ nana emi Manetualain-ma sama leo ha'i manana'a naputuk-ka. Ana ta nau emi makasasamak-kana no hata esa boen.

²⁵ Boeo mahani te, metema emi leo dook-ka nai nusak ndia, ma emi maupu-maanak soona, boso tao sala-singok, nanahu emi tao dodoki-dudulak nai lupak matak leo beek-ka boe. Tatao-nono'ik ndia nde been-na, tatao-nono'i mangalauk esa, nai emi Manetualain-ma mata memeten-na, de neukose namanasa.

²⁶ Ela leo been-na, nai faik ia, lalai-a no daebafak-ka da'di sakasii, lae metema emi ta nau tunga au fa soona, neukose no lai-laik, mopok emi neme dae fo emi leon nai Lee Yarden-na selik eli.

²⁷ Neukose Manetualain tao tapasasala emi nai leoina fe'ek-kala tala'da, de ela ka'da emi hataholim lumanak laso'da lahele.

²⁸ Nai ndia, neukose emi sene-do'ok neu hataholi daebafak-ka taon-na lamatua daebafak-kala, lamatua daebafak fo nanataok neme ai-batu mai, fo ana ta hapu nita do namanene, ana ta hapu na'a ma ana ta hapu de'i fa.

²⁹ Boema, neukose emi sanga emi Manetualaim-ma, fo metema emi sangan no emi dale katematuam-ma soona, neukose emi hapun.

³⁰ Metema, basa soe sila-la tuni-ndeni-la emi, ma emi nai toto'a-sosotak-ka dalek, soona neukose emi fali ma'im-ma, leo emi Manetualaim-ma mai, fo emi tungan.

³¹ Emi Manetualaim-ma nde been-na, Manetualain fo dale susue-lalain ba'un-na seli. Ana ta nau la'oela emi, do Ana tao namopo-namate emi, do nafandele heni hehelu-balataak fo Ana taon no emi bei-ba'i kaim-mala fa.

³² Palisak matalolole, tepo-lelek makahulun-na, fo nai lelek beita bongi emi nai faik fo Manetualain nakadada'dik hataholi daebafak manai daebafak ia poin-na. Sangan nai basa daebafak ia poin-na lala'en-na. Fafaka'ma dede'a matuaina ia, ana da'di hai nai makahulun eli so do beik? Hapu hataholi namanene hai, la'eneu manada'dik matak leo ia-ka so do beik?

³³ Hapu leoina fo naso'da nahele, nai lelek namanene lamatua daebafak esa, ana kokolak nos neme ha'i dale mai, sama leo emi la'o-la'dik-ka so do beik?

³⁴ Hapu hai lamatua daebafak, napalani ho'in-na leoina esa neme leoina-la tala'da mai, boema ana taos da'di ndia ana hehelin, sama leo emi Manetualaim-ma, Ana taon soaneu emi neme Masir so do beik? Emi mita matam, tao leo beek de, Manetualain no be'i-balakai matuainan-na, Ana fe soe-a, ma natee-natatik-ka mai, Ana tao manada'di beuk-kala, ma Ana tao dede'a matuaina-la.

³⁵ Manetualain natu'du basa sila-la neu emi, fo ana da'di ta'du esa, nae ka'da Manetualain ndia mesak-kana, nde Manetualain-na, de ta hapu lamatua daebafa fe'ek fa.

³⁶ Ana fe emi mamanene halan-na neme lalai mai, soaneu nanoli emi; Natu'du basa ha'i matuainan-na neu emi nai daebafak ia so, de ana kokolak no emi neme ha'i ndia dalek mai.

³⁷ Nanahu, Ana sue-lai emi bei-ba'i kaim-mala, de Ana hele basa emi, nenik koasa matuainan-na, ma noo emi kalua meme Masir mai so.

³⁸ Leoina fo matua ba'u lena, ma be'i-balakain lena neme emi mai, Ana usi henis leme emi matam-ma mai, soaneu noo emi leo sila nusan fo Ana fen leo emi neu, fo nde nusak fo besak ia ana da'di emi nusam so.

³⁹ Hu ndia de faik ia, mame'dak leona, fo boso mafandele henin: te ka'da Manetualain mesak-kana nde Manetualain fo nai lalai ma daebafak-ka; ta hapu lamatua daebafa fe'ek fa.

⁴⁰ Tunga la'iesak hoholo-lalanek fo au fen neu emi nai faik ia, soona emi ma emi tititi-nonosim neukose maso'da no tetu-temak, ma emi maso'da makandoo nai emi Manetualaim-ma fe emi nusak-ka losa dodoon-na.”

Kota-kota nasulu aok manai Lee Yarden-na boboan dulu

⁴¹ Boema, Musa natu'du kota telu lai Lee Yarden-na boboan dulu,

⁴² fo ala da'di kota nasulu aok, mamanak fo hataholi-a hapu naso'da, metema ta name'da fa te, ana taonisa hataholi fo ndia musun ta hataholi ndia fa. Ana bole nalai leo kota sila-la esa dalek neu, fo ela ndia boeo ta nanataonisak fa.

⁴³ Kota Bezer-ra nai letelepak manai moo solokaek-ka, nanasadiak soaneu leo Ruben-na; kota Ramot, fo nai dae Gilead-ta, nanasadiak soaneu leo Gad-ta; ma kota Golan, fo nai dae Basan-na, nanasadiak soaneu hataholi Manasye-la.

Manetualain hoholo-lalanen nanafek neu leoina Israel-la

⁴⁴ Boema, Musa fe leoina Israel-la Manetualain hoholo-lalanen, ma nakaneneten-nala.

^45-46 Musa nakalala'ok paleta ndia ndek ala kalua leme Masir mai, de leme bafak manai Lee Yarden-na boboan dulu, fo nasasalematak no kota Bet-Peor-ra. Dae ndia nde been-na dae nangatuu palaak neme hataholi Amori-la manen-na na'de Sihon, fo nde makahulun-na ana paleta neme kota Hesybon-na. Musa no leoina Israel-la sengi manek ndia, nai lelek ala kalua leme Masir mai.

⁴⁷ Langatuu-la Manek Sihon ndia daen-na, ma Manek Og fo neme Basan mai, daen-na boe; mane ka duak sila-la nde been-na, hataholi Amori-la manen sila, fo ala leo leme Lee Yarden-na selik dulu.

⁴⁸ Dae ndia, natabaa neme kota Aroer-ra, fo nai Lee Arnon-na su'un-na, fo nakandoo leo kii neu, de ana losa Letek Siryon-na, fo nde Letek Hermon-na,

⁴⁹ ma basa dae manai Lee Yarden-na boboan dulu, de ana leo kona neu, fo ana losa Tasi Mates-sa nai Letek Pisga huun-na.