ULANGAN 34 - Susula Malalaok Hehelu Palak Ma Hehelu Beuk

Musa mamaten-na

¹ Boema, Musa la'oela masadokek Moab-pa, de ana kae leo Lete Nebo-a lain neu, boema ana kae nakandoo leo poin mana'de Pisga lain neu, fo nai Yerikho boboan dulu. Nai mamanak ndia, Manetualain natu'dun, nusak ndia lala'en-na, fo nde: dae Gilead-ta, leo kii neu, fo nakandoo leo kota Dan-na neu;

² basa dae Naftali lala'en-na; dae Efraim-ma, ma dae Manasye-a, dae Yehuda, leo muli neu, fo nakandoo leo Tasi Tala'dak neu;

³ Yehuda baboan kona, ma masadokek fo, natabaa neme Zoar leo Yerikho neu, kota fo henuk no ai kurma.

⁴ Boema, Manetualain nafa'da Musa nae, “Nusak ndie nde, Au helu fen neu Abraham, Isak ma Yakob, fo ala fen neu sila tititi-nonosin. Musa, Au atu'dun neu o, tehu Au ta nau o muu leo naa muu fa.”

⁵ Boema, mate Manetualain atan Musa neme dae Moab-pa, sama leo hala nafa'da makahulun-na.

⁶ Manetualain natoi-natonon nai bafak esa, nai Moab, fo nai kota Bet-Peor-ra selik, tehu losa besak ia, ta hapu hataholi esa boen, fo ana bubuluk Musa laten-na nai bee fa.

⁷ Musa teun natun esa duahulu boema, maten. Be'ibalakain ta naloe fa, ma matan-na bei nita.

⁸ Nai masadokek Moab-pa, leoina Israel-la, ala kii-makaleleu Musa, ma dalen-na he'dis, faik teluhulu dalen-na.

⁹ Manetualain ba'e-bati Yosua, fo Nun anan-na, nenik dudu'a-aafi manatee-tenok, nanahu Manetualain natu'dun fo, ana nggati Musa. Leoina Israel-la, ala tunga Yosua, ma lakalala'ok paleta fo, Manetualain fe neu sila, tunga Musa.

¹⁰ Nai Israel, ta hapu seluk nabi sama leo Musa, fo ana kokolak nasasalematak no Manetualain fa.

¹¹ Ta hapu hataholi manatao manada'di beuk, ma manatao mata beuk-kala, sama leo Musa taon soaneu nusa Masir-ra, neu manen-na, ma neu basa manapaletan-nala, nandaa no Manetualain paletan-na.

¹² Ta hapu hataholi, fo ana tao tatao-nono'i matuaina-la, ma neni bibii-namata'uk, sama leo Musa taon neme basa leoina Israel lala'en-na, matan-na fa.