ULANGAN 31 - Susula Malalaok Hehelu Palak Ma Hehelu Beuk

Yosua nggati Musa

¹ Musa nafa'da seluk leoina Israel-la

² nae, “Besak ia, au teung natun esa duahulu so, de au ta auli-alanga abe'i emi so'on. Bai te, Manetualain nafa'da basa, nae au ta bole lena seli Lee Yarden-na fa.

³ Neukose, emi Manetualaim-ma, nde la'ok nai emi matam-ma, fo Ana tao namate-namopo leoina manaleo manai sila-la, nalosa emi mangatuu-ma emi nusam-ma. Neukose, Yosua da'di emi mauli-malangam, sama leo Manetualain nafa'dak-ka.

⁴ Neukose, Manetualain tao namate-namopo leoina sila-la, sama leo Ana sengi Sihon ma Og, fo hataholi Amori-la manen-na, boema Ana tao nakalulutuk sila nusan-na.

⁵ Neukose, Manetualain fe emi sengis, boema emi muse taos, sama leo au afa'dan neu emi-a.

⁶ Ela leo been-na, emi matetea-nahehele emi dalem-ma, ma mapalani! Boso biis, nana emi Manetualaim-ma nde, neukose tulu-fali emi. Neukose, Ana ta tao ba'ihana emi dalem-ma, ma Ana ta la'oela emi fa.”

⁷ Boema Musa naloo Yesua, de nafa'dan nai basa leoina Israel-la matan nae, “Yesua, ela leo been-na, matetea-mahehele o dalem-ma, ma mapalani! Neukose, o nde mauli-malanga leoina ia, fo langatuu-la nusak fo, Manetualainhelu basan neu sila bei-ba'i kain-nala so.

⁸ O manahela-nolem ma manatulu-falim nde Manetualain. Neukose, Ana ta tao ba'ihana o dalem-ma, ma Ana ta la'oela o fa. Hu ndia de, boso bii-mamata'u, ma dalem-ma boso ba'ihana.”

Basa teuk hitu soona muse les Manetualain hoholo lalanen la'iesa

⁹ Boema Musa sulak-na Manetualain Fo Manakoasa hoholo-lalanen, de ana fen leo imam Lewi fo, ana hapu bela-ba'uk soaneu ana ito-ato Peti Hehelu-balataak-ka, ma ana fen neu basa mauli-malangan Israel-la.

¹⁰ Ana fes paleta nae, “Nai tunga-tunga teuk-ka hitun-na, sanga basan, nai teuk fo huta-bu'uk nanakokahenik, nai feta Lalaa Akidook-ka soona,

¹¹ emi muse lees mapane'e, hoholo-lalanek ia-la neu hataholi Israel fo, manamai sene-do'ok neu emi Manetualain-ma, nai Ana hele mamanak-ka.

¹² Madenu basa touk-kala, inak-kala, ma ni'iana-la, boema hataholi nusa dea fo, manaleo manai emi kotam-mala, lakabubua fo lamanene lelees ndia, fo ela ala lanoli fe ha'da-holomata neu emi Manetualain-ma, ma ala tunga paletan-nala, no lilinekak.

¹³ No enok ndia, basa emi anam fo, beita lamanene lita, emi Manetualaim-ma hoholo-lalanen-na, ala hapu lamanenen, fo lanoli fe ha'da-holomata neu Manetualain, nai lelek sila bei laso'da nai nusak manai Lee Yarden-na selik ndia, fo ta dook-ka so'on te, emi mangatuu-man so.”

Manetualain fe Musa paleta mate'ek-kala

¹⁴ Basa boema, Manetualain nafa'da Musa nae, “O so'dam-ma, ta dook-ka so'on. Da'di, muu fo moo Yosua leo Au Lalaa Temang-nga neu, fo ela Au fen natutu'duk.” Boema, Musa no Yesua leu leo Manetualain Lalaa Teman-na leu,

¹⁵ de Manetualain natu'du aoinan-na neu duas, nai dii ko'as dale, fo deka no Lalaa Temak-ka lelesun-na.

¹⁶ Manetualain nafa'da Musa nae, “O mamatem-ma deka so. Mate o soona, leoina Israel-la, ta lilineka neu Au so'on, ma lafandeleheni hehelu-balataak fo, Au taon no sila. Neukose, ala la'oela au, fo ala sene-do'ok neu lamatua daebafak manai nusak fo, ta dook-ka so'on te, emi masok mala dalek ndia.

¹⁷ Metema, ana da'di leondiak soona, neukose Au nasa-melung, lua ponu-ponu neu emi. Neukose, Au la'oelas, ma Au tao amopo-amates. Neukose, susa-soe matuaina makadotok, ala tuni-ndeni lalas, boema neukose, ala lame'da lae basa sila-la ala da'di, hu kande Au, sila Manetualain fo ta nok sila so'on.

¹⁸ Nai lelek ndia, Au ta nau tulu-fali fas, nanahu ala sene-do'ok neu lamatua daebafak fe'ek, ma ala tao tatao-nono'i mangalauk.

¹⁹ Besak ia, sulak-ma, nakameek-ka nde ia, fo manolin neu leoina Israel-la, fo da'di leo sakasii ba'eneu sila.

²⁰ Neukose, Au oos leo nusak fo, kamasu'ik ma maoe-maisik-ka, sama leo Au helu basan neu sila bein-na'i kain-nala so. Neukose, ala laso'da no namahokok nai ndia, ma ala hapu basa nana'a-nininuk fo ala paluu-ka. Tehu, neu fai makabuin, te neukose ala fali deak, fo ala sene-do'ok neu lamatua daebafak fe'ek-kala. Neukose, ala ta sipok Au fa, ma lafandeleheni Au hehelu-balataang,

²¹ ma neukose, susa-soe matuaina makadotok, ala tuni-ndeni lalas. Tehu neukose, lakamee lahele nakameek ia, ma ala paken da'di leo, sakasii soaneu sila. Nakalenak besak ia, Au beita oos leo nusak fo, Au heluk-ka neu fa, te bubuluk sila dudu'a-aafin, tetee-tutu'dan so.”

²² Nai faik ndia boe, Musa sulak nakameek ndia, boema nanolin neu leoina Israel-la.

²³ Basa boema, Manetualain nafa'da Yesua, fo Nun anan-na nae, “Yesua, ela leo been-na, matetea-mahehele o dalem-ma, ma mapalani! Te neukose, o mauli-malanga leoina Israel-la, masok leo nusak fo, Au helu basa, fen leo sila neu, fo neukose Au tulu-falis.”

²⁴ Boema, Musa sulak Manetualain hoholo-lalanen neu susulak esa dalek. Ana sulak besa-besa non, neme makasososan-na losa mate'en-na.

²⁵ Ana sulak basa boema, nafa'da basa imam Lewi fo, manaito-ato Peti Hehelu-balataak-ka nae,

²⁶ “Ho'i-ma Manetualain susula Hoholo-lalanen ia, fo pe'dan neu emi Manetualaim-ma, Peti Hehelu-balataan-na, boboan-na, fo ela nahele neme ndia, fo da'di leo sakasii esa, ba'eneu leoina ndia.

²⁷ Au bubuluk, ala langa batu lanseli, ma ala nau lena-la'ban paleta. Au bei aso'da ia boeo, ala lena-la'ban Manetualain; mu'da hata no, mahani te, au mate bai!

²⁸ Besak ia, madenu basa mauli-malangan leoinak-kala, ma basa malanga solda'du matuaina-la, fo lakabubua mai au matang ia, fo ela au afa'das dede'ak-kala nde ia. Au aloo lalai-a no daebafak-ka, da'di leo sakasii soaneu sila.

²⁹ Au bubuluk, ae mate au soona, neukose hataholi sila-la da'di hataholi mangalauk, ma ala ta sipok hata fo, au anolin neu sila fa. Ma neu makabuin-na te, susa-soe-a tuni-ndeni nalas, nanahu ala tao-la Manetualain namanasa, nanahu ala la'olena hata fo, Ana ka'in-na.”

Musa nakameen-na

³⁰ Basa boema, Musa lees nakameek ia, losa mate'en-na, de basa leoina Israel-la lala'en-na, lamanenen.