ULANGAN 30 - Susula Malalaok Hehelu Palak Ma Hehelu Beuk

Manetualain fe baba'e-papalak neu anan fo manatuka tei-sale dalek-ka

¹ “Besak ia, emi bole hele baba'e-papalak do soo-supak-ka, sama leo au afa'da mangalele'do basan neu emi so. Metema emi la'ola'di basa doidosok sila-la, ma emi maso'da nai leoina nusa dea-la tala'da, nai mamanak fo, emi Manetualaim-ma tao tapasasala emi-a soona, neukose emi mafandele neu hata fo, au fe emi helek-ka.

² Metema emi ma emi tititi-nonosim-mala, nau feli leo emi Manetualain-ma mai, ma emi tunga basa paletan fo, au fen neu emi, nai faik ia no emi dalek-katematuam-ma,

³ soona, neukose emi Manetualaim-ma sue-lai emi. Neukose, no falik emi neme leoina fo, nai bee emi nanatao tapasasalak-ka, ma Ana fe emi maso'da no tetu-temak seluk.

⁴ Leomae emi tapasasala su'di leo bee meu, nai daebafak-ka lala'en-na, neukose emi Manetualaim-ma tao nakabubua emi, fo no falik emi.

⁵ Boema, emi hapu falik dae fo makahulun-na, emi bei-ba'i kaim-mala leo-nana. Fo Ana fe emi maso'da no tetu-temak seluk, ma emi mamade'u lena heni emi bei-ba'i kaim-mala.

⁶ Neukose Ana tao nabebeu emi dalem-ma, nalosa emi sue-lai emi Manetualaim-ma no emi dalek-katematuam-ma, ma emi leo mahele meme nusak ndia.

⁷ Neukose Ana fe basa sosoo-susupak sila-la, leo emi musu-musum fo, ta lahiik ma manatuni-ndeni emi-a.

⁸ Neukose emi tunga Manetualain seluk, ma emi makalala'ok basa paletan fo, au fen neu emi nai faik ia.

⁹ Neukose emi Manetualaim-ma, fe emi tutunga-sasangam lala'en-na, neni buna-boak fe emi; neukose emi anam makadotok, ma emi bana-manum makadotok; ma emi tinam-mala, buna-boan sasi kao-kao. Manetualain namahoko, de Ana fe emi maso'da no tetu-temak, sama leo Ana namahoko, de Ana fe tetu-temak neu emi bei-ba'i kaim-mala boe.

¹⁰ Tehu, emi muse tunga emi Manetualaim-ma, ma tunga basa hoholo-lalanen fo, nanasulak nai susulak ia dalek, fo Manetualain susula Hoholo-lalanen-na. Emi muse fali leo Manetualain mai, no emi dalek-katematuam-ma.

¹¹ Nana au fe emi paleta, ta matea nanseli fa, ma ta dook-ka neme emi mai boen.

¹² Mamanan-na, ta nai lalai fa, nalosa emi matane mae, ‘Neukose, see kande kae leo naa neu, fo ana ho'in-nan, fo ela ita hapu tamanene ma ita tungan?’

¹³ Mamanan-na, ta nai tasi selik boen, nalosa emi matane mae, ‘Neukose, see kande neu ho'in-nan, fo ela ita apu tamanene ma ita tungan?’

¹⁴ Boso matane mae leondia, nanahu paleta sila-la, ala deka lanseli loo emi. Emi bubuluk basan so, ma emi kokolak-kana no ta paluu pake lees susulak so'on, da'di ka'da tao tungan leona.

¹⁵ Faik ia, emi bole hele, malole-a do mangalauk-ka, maso'dak-ka do mamates-sa.

¹⁶ Faik ia, au paleta emi, fo sue-lai emi Manetualaim-ma, ma tungan, boema tao-no i basa hoholo-lalanen ma paletan lala'en-na, fo ela emi maso'da no tetu-temak, ma emi da'di leoina matuaina. Neukose, emi Manetualaim-ma fe emi baba'e-papalak nai nusak fo, ta dook-ka so'on te, emi mangatuu-man ndia.

¹⁷ Tehu matema, emi ta tunga, ma emi ta nau mamanene fa, fo emi po'ilotak hataholi fe'ek, taon-na emi la'ok sala, fo emi sene-do'ok neu lamatua daebafak fe'ek-kala soona,

¹⁸ tao leo bee-o, neukose emi nanatao namate-namopok, ma emi teum-ma keke'uk-ka nai nusak fo, ta dook-ka so'on te, emi mangatuu-ma ndia. Mafandendelek! Te dede'ak ia Au afa'da neu emi nai faik dalen-na so.

¹⁹ Besak ia, emi bole hele, maso'dak-ka, do mamates-sa, Manetualain baba'e-papalan, do sosoo-susupan. Au aloo lalai-a ma daebafak-ka, fo ala da'di sakasii neu emi nakeketum-ma. Hele maso'dak-ka leona.

²⁰ Sue-lai emi Manetualaim-ma, ma tungan leona, ma lilineka neun. Soona, emi ma emi tititi-nonosim, neukose laso'da ma teu naluk nai nusak fo, Manetualain helu basan neu emi bei-ba'i kaim Abraham, Isak ma Yakob.”