ULANGAN 28 - Susula Malalaok Hehelu Palak Ma Hehelu Beuk

Baba'e-papalak ba'eneu hataholi manatunga paleta

¹ “Metema, emi tunga emi Manetualaim-ma, ma faik ia, au fe emi paleta lala'en-na, emi tao-no'in no emi dalek-katematuam-ma, soona neukose, Ana taon-na emi da'di leoina esa, nananita-nalelak nai daebafak-ka.

² Tunga emi Manetualaim-ma, soona neukose Ana fe emi basa baba'e-papalak-kala nde ia:

³ Baba'e-papalak ba'eneu emi kotam-mala, ma emi tinam-mala.

⁴ Baba'e-papalak ba'eneu emi, nalosa emi anam makadotok, emi dae-oem buna-boan sasi kao-kao, ma emi sapim-mala boema emi bi'ihii-bi'ilopom-mala lamade'u.

⁵ Baba'e-papalak ba'eneu emi gandum-mala, boema emi nana'am fo, emi taon neme gandum ndia mai.

⁶ Baba'e-papalak ba'eneu emi ue-le'dim lala'en-na.

⁷ Metema musu-a, ana sapu-na emi soona, neukose Manetualain sengi emi musum-ma. Neukose ala mai latee-latati no napalanik, tehu lalai tu'u-fo'a.

⁸ Neukose emi Manetualaim-ma, fe baba'e-papalak neu emi ue-le'dim lala'en-na, ma nadai nahenu emi sokam-mala nenik gandum. Neukose Ana fe emi baba'e-papalak nai Ana fe emi nusak-ka.

⁹ Metema, emi tunga emi Manetualaim-ma, ma emi tao-no'i basa paletan lala'en-na soona, neukose Ana tao emi da'di Ndia ana nanahelen, sama leo hala hehelun-na.

¹⁰ Soona basa leoina manai daebafak-ka, neukose lita lae emi nde been-na, Manetualain leoina hehelen, de neukose ala hia-penge emi.

¹¹ Neukose Ana ba'e-bati fe emi, anak makadotok. Neukose emi bana-manum makadotok, ma emi dae-oem buna-boan sasi kao-kao nai nusak fo, emi Manetualaim-ma helu basan neu emi bei-ba'i kaim-mala, soaneu Ana fen neu emi.

¹² Neukose tunga teuk, Manetualain fe u'dan-na mai nandaa no fain-na. Neukose Ana fe baba'e-papalak neu emi ue-le'dim lala'en-na, nalosa leoina makadotok, ala mai tona-asa nai emi, tehu emi ta bole fes ala tona-asa fa.

¹³ Neukose emi Manetualaim-ma, tao emi da'di mauli-malangan nai leoinak-kala tala'da, te Ana ta fe emi da'di manatunga dea fa. Metema, no dalek-katematuak, emi tunga basa Manetualain paletan lala'en fo, faik ia au fen neu emi-a soona, neukose emi boetai maso'da no tetu-temak, nakandondoo henin.

¹⁴ Tehu boso mafandeleheni paleta sila-la makandondook, nenik enok matak leo beek-ka boe. Boeo, boso sene-do'ok ma mamahele neu lamatua daebafak-kala.”

Nalenalangak-ka dada'di momolin

¹⁵ “Tehu metema, emi ta tunga emi Manetualaim-ma, ma emi ta tunga no emi dalek katematuam-ma, neu basa paletan ma hoholo-lalanen fo faik ia, au fen neu emi fa, soona basa soo-supak ia-la, neukose ala tuni-ndeni-la emi:

¹⁶ Sosoo-susupak ba'eneu emi kotam-mala, ma emi tinam-mala.

¹⁷ Sosoo-susupak ba'eneu emi gandum-mala, ma nana'ak fo, emi taon neme gandum ndia mai.

¹⁸ Sosoo-susupak ba'eneu emi, nalosa emi anam ka'da lumanak, emi dae-oem, buna boan ka'da faaanak, boema emi sapim ma emi bi'ihii-bi'ilopom boeo, ka'da lumanak.

¹⁹ Sosoo-susupak ba'eneu, emi ue-le'dim lala'en-na.

²⁰ Metema, emi tao tatao-nono'i mangalauk, ma emi ta sipok Manetualain fa soona, neukose Ana fe soe, napokak, ma toto'a-tataak-ka, nai basa hata lala'en fo, emi tao-no'ik-ka dalek, nalosa ka'da nai fai nggenggeloanak esa mesak-kana, Ana tao namate-namopo la'iesak emi.

²¹ Neukose, he'di-laus la'e emi tataas esa, nalosa neu mate'en-na te, ta ela emi esa boen, fo ana leo nai nusak fo, emi mangatuu-man ndia fa.

²² Neukose, Manetualain huku emi nenik he'di madaik-ka, petaaok-ka ma sumaik-ka. Neukose, Ana fe dae-a namatuu, ma Ana fe ani mato'bik-ka mai, nalosa emi dae-oem buna-boan nalutus. Soe sila-la, ala tuni-ndeni lahele emi, losa mate-mopo emi.

²³ U'dan-na ta mai fa, de emi daem-ma, natea sama leo besi-a.

²⁴ Neukose, Manetualain ta fe u'da oe fa, te Ana fe u'da afu ma solokaek, losa mate-mopo la'iesak emi.

²⁵ Metema, emi ta tunga emi Manetualaim-ma fa soona, neukose Ana fe emi musum-mala, ala sengi emi. Neukose emi meu matee-matati no napalanik, tehu emi malai tu'u-fo'a. Basa leoina manai daebafak-ka, ala mete emi toto'a-sosotam soona, ala bii-lamata'u lanseli.

²⁶ Metema, mate emi soona, manupui-la ma bana makaa-makisuk-kala, la'a emi popolam-ma, boema ta hapu hataholi, usiheni bana sila-la fa.

²⁷ Neukose, Manetualain huku emi nenik bisunggumak, fo sama leo Ana taon neu hataholi Masir-ra. Emi aom-ma, neukose henuk no bisu-a, ma kosolouk fo emi aom-ma nakaa, tehu ta hapu mo'do-akidoon-na fa.

²⁸ Neukose, Manetualain taon-na emi, da'di kamulus, pokek ma mapangamak.

²⁹ Nai fai le'ohana-na, emi mafangganggao sama leo hataholi pokek-ka, tehu emi ta mita enok-ka fa. Emi sanga enok tao leo beek boeo, manada'di tak. Emi nanatuni-ndenik nakandoo, ma nakodaa, ana mai namanako emi hata-hetom, tehu ta hapu manatulu-fali fa.

³⁰ Metema, emi ta tunga emi Manetualaim-ma fa soona, manada'dik-kala nde ia, neukose ala tuni-ndeni-la emi: Neukose emi meu a'du-matane ina anafe'ok, tehu hataholi fe'ek nde sao ina anafe'ok fo, emi meu a'du-matanek ndia. Neukose, emi mafofo'a uma, tehu hataholi fe'ek nde leo uma ndia. Neukose, emi sele osi angol, tehu hataholi fe'ek nde na'a boan-nala.

³¹ Neukose, ala do'do emi sapim-ma, nai emi matam-ma nai emi matam, tehu emi ta mi'a paan-na fa. Neukose emi mita, ala foo leni emi keledeim-mala, tehu ala ta fe falik-kasa fa. Neukose, ala fe emi bi'ilopom-mala leo emi musum-mala neu, tehu ta hapu manatulu-fali fa

³² Neukose ala fe heni, emi anam-mala leo hataholi nusa dea-la, nai emi matam, fo ala taos da'di ata. Tunga faik, emi mata-ma nakete, nana emi sanga emi anam-mala, tehu manada'di tak, nana neukose ala ta fali so'on.

³³ Leoina fe'ek esa, neukose ana ho'in-na basa emi dae-oem-ma buna-boan, fo emi hapun neme emi sosota-mamangum mai, fo emi ta hapu hata esa boen, te emi hapuk-ka nde, tuni-ndenik ma heheta-aa'ik nakandondoo henin.

³⁴ Neukose emi mamulu, nanahu tatao-nono'ik leondiak-ka.

³⁵ Neukose, Manetualain taon-na emi eim-ma bisu-bisu mesan, fo he'din-na seli, tehu ana ta hapu lea-hai fa; neukose bisunggumak-kala, ala da'di neme emi eiku'um-ma losa emi langadoo pe'dam-ma.

³⁶ Neukose, Manetualain no emi manem-ma, leo nusa dea fo, emi ta malelak-kana fa, ma emi bei-ba'i kaim-mala boeo, ta lalelak-kana boen. Nai ndia, neukose emi da'di ata neu lamatua daebafak fo, nanataok neme ai-batu mai.

³⁷ Nai nusa-nusak fo nai bee, Manetualain tao tapasasala emi-a, neni bibii-namata'uk nanseli fe hataholi manamete emi-a; neukose ala hakinonoli ma ala hika emi.

³⁸ Emi sele-nggali bini-ngges makadotok, tehu emi buna-boak ka'da faa anak, nanahu lamak-ka, na'aheni emi bubu'u-palusam.

³⁹ Neukose emi sele emi osi angol-ma fo emi mete-makanaen, tehu emi ta ketu-seu angol-la boan-na, ma emi minu angol-la oen-na fa, nanahu ulek-kala, la'aheni ai angol sila-la.

⁴⁰ Ai setun-na, ana moli nai emi nusam dale lala'en-na, tehu neukose konoheni boan-nala, nalosa emi ta hapu mina setun fa.

⁴¹ Neukose emi hapu anatouk ma ana inak, tehu musu-a ana fo nenis, da'di leo hataholi nanafook, nalosa mopo emi anam-mala.

⁴² Neukose lama-boo'i la'aheni emi ai-mala, ma emi bubu'u-palusam-mala.

⁴³ Hataholi nusa dea fo, manaleo manai emi nusam-ma, neukose ala boetai hapu koasa, tehu emi koasam-ma, ana boetai loe leo dae neu.

⁴⁴ Sila madoik-kala, fo ala fe emi tona-asa, tehu emi ta hapu hata esa boen fo, emi fe sila tona-asa. De neu mate'en-na, ala koasa emi.

⁴⁵ Basa soe sila-la lala'en-na, neukose ala mai lakandoo fo, ala tuni-ndeni-la emi, losa mate-mopo emi; nanahu emi ta tunga emi Manetualaim-ma, ma emi ta tao tunga hoholo-lalanek fo, Ana fen neu emi-a fa.

⁴⁶ Basa soe sila-la, nalupa leo ta'du huhukuk esa neme Manetualain soaneu emi ma emi tititi-nonosim, losa dodoon-na.

⁴⁷ Emi Manetualaim-ma fe basa emi, baba'e-papalak nai basa dede'ak lala'en-na dalek so, tehu emi ta nau malalau-maoonon, no dalek-katematuak ma namahokok fa.

⁴⁸ Hu ndia de, emi muse da'di ata neu musu-musu fo, Manetualain nadenus ala mai fo, ala la'ban emi. Neukose, emi mamala'a-mamandoe, maama'da, ma makahola-la boema to'a-taa nai basa hata-hata lala'en-na dalek.

⁴⁹ Neukose, Manetualain nadenu leoina esa, ana mai neme daebafak-ka pe'dan-na mai, fo ana la'ban emi, tehu emi ta malelak dede'an-na fa. Neukose, ala la'u leni emi, sama leo manupui kaka'ka, ana la'u neni manuana.

⁵⁰ Hataholi sila-la, mangalaun-na seli, ma ala ta lanuu dale susuek soaneu toulasik-inalasik ma ni'iana-la boe.

⁵¹ Neukose la'aheni emi bana-manum, ma emi dae-oem buna-boan, ma ala ho'ileni la'iesak emi gandum, angol, mina setun, do emi sapim ma emi bi'ihii bi'ilopom-mala, losa emi mate mo la'as-sa.

⁵² Neukose, ala sapu-la basa kota manai nusak fo, emi Manetualaim-ma fen neu emi ndia, nalosa ala tao lakalulutuk papala nanadamak mademaina fo, emi mamahenak sila-la.

⁵³ Lelek emi musum-mala, lakahapi-la emi kotam-mala, neukose ketu emi namahehenam-ma, nanahu la'a-ndoes-sa, nalosa emi mi'a seluk emi ana bongim fo, emi Manetualaim-ma fen neu emi-a.

^54-55 Nakalenak, manefetoana fo, dale-ha'dan malole nanseli boe, neukose ketu namahehenan-na, nai lelek musu-a nakahapi-nalas ndia, nalosa na'a seluk anan-nala, nanahu ta hapu nana'a fe'ek so'on. Ana ta fe tolanon-na, do saoina susuen-na do anan fo bei maso'dak-kala, faa anak boen.

^56-57 Nakalenak, ina manefetoana fo, dale-ha'dan malole nanseli, ma namasu'i atu-atu, nalosa ana beita la'o eik nita fa, tehu neukose ana tao sama leo manefetoa-nala, tataon ndia boe. Nai lelek fo, musu-a nakahapi-na kota-a, neukose ketu inak sila-la namahehenan-nala, nanahu la'a-ndoes-sa, nalosa no nafufunik, na'a seluk ana nanabongi beun-na no funin-na. Ana ta fe saotou susuen-na, ma anan fo bei maso'dak-kala, faa anak boen.

⁵⁸ Metema, emi ta tunga no emi dalek katematuam-ma, neu basa emi Manetualaim-ma hoholo-lalanen fo, nanasulak nai susulak ia dalek fa soona,

⁵⁹ neukose Manetualain fe emi ma emi tititi-nonosim-mala, he'di-laus manalea-hai tak-ka, ma he'di-laus fo, ta hapu tao nate'e fan.

⁶⁰ He'di-laus maneni bibii-namata'uk fo emi mita matan neme Masir-ra, neukose la'e emi, fo emi ta hapu lea-hai fa.

⁶¹ Manetualain boeo, neukose Ana fe, he'di-laus mata-matak-kala, ma he'di-laus fo, ta nanasulak nai Manetualain susula hoholo-lalanen-na dalek fa. Soona, neukose Ana tao namate-namopo emi.

⁶² Leomae, emi dede'um-ma, de'u nduuk manai lalai-a so boe, tehu nai emi dalek, hapu maso'dak, ka'da lumanak mesak-kana, nanahu emi ta tunga neu emi Manetualaim-ma fa.

⁶³ Sama leo Manetualain nahiik tao malole soaneu emi, ma Ana fe emi mamade'u, leondiak boe, neukose nahiik tao namate-namopo emi, ma tao nakalulutuk emi boe. Neukose, Ana usiheni emi neme nusak fo, ta dook-ka so'on te, emi mangatuu-malan ndia, dalek mai.

⁶⁴ Neukose, Manetualain tao tapasasala emi, leo basa leoina manai daebafak-ka lala'en-na neu. Nai naa, neukose emi sene-do'ok neu lamatua daebafak fo nanataok neme ai-batu mai, lamatua daebafak fo, emi ta malelak-kana, ma emi bei-ba'i kaim-mala boeo, ta lalelak-kana fa.

⁶⁵ Nai leoina sila-la tala'da, neukose emi ta hapu tetu-temak-ka, ma emi ta hapu mamanak esa boen, fo emi mafa'da mae, emi dae pusakam ndia fa; neukose Manetualain taon-na emi dalem-ma ta tesa-tama fa, ma ketu emi namahehenam-ma.

⁶⁶ Neukose, emi hapu susa-soe tataas esa, nai emi maso'dam-ma dalek. Lele'do-le'odaen, emi aom-ma ndefa, ma emi bii mamates-sa.

⁶⁷ Lelek emi mete mita su'di beek-ka soona, emi tenem-ma hako, nanahu mei bii mamates-sa. Nai fai fafain-na, emi mafa'da mae, le'odae leona, ma nai fai le'odaen-na, emi mafa'da mae, fafaik leona.

⁶⁸ Neukose, Ana fe emi sa'e ofak fo, fali seluk leo Masir meu, leomae Ana nafa'da basa nae, neukose emi ta fali seluk leo naa meu so'on. Neukose, emi mase'o emi aoinam-ma nai naa, soaneu da'di ata neu emi musum-ma, tehu hapu hataholi esa boen, fo ana nau asan-na emi fa.”