ULANGAN 27 - Susula Malalaok Hehelu Palak Ma Hehelu Beuk

Manetualain hoholo-lalanen nanasulak nai batu lain

¹ Bosa boema, sama-sama no basa mauli-malangan Israel-la, Musa landuku-lalosak hala heheluk-ka nde ia, neu leoina Israel-la nae, “Tunga basa paleta lala'en fo au fen neu emi nai faik ia dalen-na.

² Nai lelek emi lena Lee Yarden-na, fo emi masok leo emi Manetualaim-ma fe emi nusak-ka meu soona, emi muse mapadedeik-ma, batu matuaina de'ubee, fo lose ha'o neus.

³ Sulak la'iesak hoholo-lalanek ia-la, de'ek esa-esa neu batu sila. Metema, emi masok nusa kamasu'ik ma maoe-maisik fo, emi Manetualaim-ma helu basan neu emi bei-ba'i kaim-mala,

⁴ ma emi nai Lee Yarden-na selik so, soona emi muse meu leo, Letek Ebal-la meu. Emi muse mapadedeik batu nanalose ha'o sila-la, sama leo au paletan neu emi, nai faik ia dalen-na.

⁵ Bei nai mamanak ndia boe, emi muse mapadedeik fe emi Manetualaim-ma, mei tunu-hotuk esa, neme batu-batu fo besi beita la'e batu sila-la fa,

⁶ nana emi mapadedeik fe emi Manetualaim-ma, mei tunu-hotuk-ka, muse nanataok neme batu katemak mai. Emi muse tunu-hotu, tutunu-hohotu nanatunuk nai mai tutunu-hohotuk ndia lain.

⁷ Boeo, emi muse tunu-hotu, emu tutunu-hohotu mole-damem, fo mi'an neme mamanak ndia, boema mamahoko-setelee nai emi Manetualaim-ma matan-na.

⁸ Emi muse sulak Manetualain hoholo-lalanen-nala de'ek esa-esak no mangale'dok, nai batu-batu nanalose ha'o sila-la lain.”

⁹ Basa boema, sama-sama no basa Imam Lewi-la, Musa nafa'da basa leoina Israel-la lala'en-na nae, “Tolano-tolanoong-ngala lemi, taoafik ma mamanene leon-na! Te faik ia dalen-na, emi da'di, emi Manetualaim-ma ana nanahelen so.

¹⁰ Hu ndia de, tunga emi Manetualaim-ma, ma tao-no'i basa paletan fo, faik ia, au fen emi.”

Soo-supak ba'eneu hataholi fo, ana ta tunga paleta ka sanahuluhduak-kala fa

¹¹ Boema, Musa nafa'da leoina sila-la nae,

¹² “Metema, emi lena-mala Lee Yarden-na selik, fo nai lelek baba'e-papalak-ka, nanakokolak ba'eneu leoina ia soona, leo Simeon, Lewi, Yehuda, Isakhar, Yusuf ma leo Benyamin-na, muse lapadeik leu Letek Gerizim-ma poin-na.

¹³ Ma nai lelek fo, soo-supak-ka nanakolak soona, leo Ruben, Gad, Asyer, Zebulon, Dan boema leo Naftali-a, muse lapadeik leu Letek Ebal-la poin-na.

¹⁴ Hataholi Lewi-la, muse ala kokolak dede'ak ia-la, no lapane'e halan-nala, ma hataholi Israel-la, muse lataa lae, Tete'ek-ka, ‘Amin’.

¹⁵ Hataholi Lewi-la, ala kokolak lae, ‘Nanasoo-supak ba'eneu hataholi fo, ana tao dodoki-dudulak neme batu, ai, do liti-a mai, fo ana sene-do'ok neun, no nafufunik; Manetualain ta hii sosongo-tatangok fa!’ Basa laun Israel-la lala'en-na lataa lae: ‘Tete'ek-ka!’ (Amin)

¹⁶ ‘Nanasoo-supak ba'eneu hataholi fo, ana ta fe ha'da-holomata neu ina-aman fa, boema ana po'ilotak-kasa laleu-lalaak.’ Hataholi Israel-la, lataa lae, ‘Tete'ek-ka!’ ‘Amin!’

¹⁷ ‘Nanasoo-supak ba'eneu hataholi fo, ana nakano'dok dae too no titia-tatain-na.’ Hataholi Israel-la lataa lae, ‘Tete'ek-ka!’ ‘Amin!’

¹⁸ ‘Nanasoo-supak ba'eneu hataholi fo, ana taon-na hataholi pokek-ka sala enok-ka.’ Hataholi Israel-la lataa lae, ‘Tete'ek-ka!’ ‘Amin!’

¹⁹ ‘Nanasoo-supak ba'eneu hataholi fo, ana natona-na hataholi nusa dea, faluina anamaak hak-ka.’ Hataholi Israel-la lataa lae, ‘Tete'ek-ka!’ ‘Amin!’

²⁰ ‘Nanasoo-supak ba'eneu hataholi fo, ana nakamumulu-nakamamaek aman, nanahu ana sungu no aman saoian esa.’ Hataholi Israel-la lataa lae, ‘Tete'ek-ka!’ ‘Amin!’

²¹ ‘Nanasoo-supak ba'eneu hataholi fo, ana tao tatao-nono'i mangalauk no bana-manu.’ Hataholi Israel-la lataa lae, ‘Tete'ek-ka!’ ‘Amin!’

²² ‘Nanasoo-supak ba'eneu hataholi fo, ana sungu no feto bongin-na, do tolanon fo ama esa, do ina esa.’ Hataholi Israel-la lataa lae, ‘Tete'ek-ka!’ ‘Amin!’

²³ ‘Nanasoo-supak ba'eneu hataholi fo, ana sungu aliinan-na.’ Hataholi Israel-la lataa lae, ‘Tete'ek-ka!’ ‘Amin!’

²⁴ ‘Nanasoo-supak ba'eneu hataholi fo, ana taok-kanisak-ka, no nafufunik.’ Hataholi Israel-la lataa lae, ‘Tete'ek-ka!’ ‘Amin!’

²⁵ ‘Nanasoo-supak ba'eneu hataholi mana se'ba hataholi fo, ana taonisa hataholi sala tak-ka.’ Hataholi Israel-la lataa lae, ‘Tete'ek-ka!’ ‘Amin!’

²⁶ ‘Nanasoo-supak ba'eneu hataholi fo, ana ta tao natetu Manetualain hoholo-lalanen, ma nanolin-nala, nai tatao-nono'in-na dalek.’ Hataholi Israel-la lataa lae, ‘tete'ek-ka!’ ‘Amin!’ ”