ULANGAN 24 - Susula Malalaok Hehelu Palak Ma Hehelu Beuk

Nakanenetek la'eneu naelak-ka ma sao seluk

¹ “Metema, touk esa, ana sao anafe'oanak esa, fo neu makabuin-na boema, nape'da dale nasak-kana so'on, nanahu tatao-nono'in ta malole, neni mamaek nai aoinan-na. Soona, touk ndia fen susulan-naelak, fo ana usihenin neme uman-na mai.

² Basa boema, inak ndia sao seluk tou fe'ek.

³ Tehu neu fai makabuin boema, touk ndia nape'da dale nasak-kana so'on, boema ana fen susulan-naelak de ana usihenin. Do fafa'kama, mate saotouk-ka duan ndia.

⁴ Nai dede'ak ia dalek, saotouk makasososak-ka, ana ta bole sao inak ndia so'on; ana muse mete inak ndia, da'di leo inak fo, na'den-na naggenggeo so. Tehu metema ka'da ana saon-nan boe, soona tatao-nono'ik ndia, nalupa leo nakamumulu-nakamamaek esa, soaneu emi Manetualaim-ma. Emi ta bole tao sala-singo mangalauk ndia, nai emi Manetualain fe emi nusak-ka fa.”

Nakanenetek mata-matak-kala

⁵ “Metema, touk esa besak-ka ana saoana soona, ta bole madenun neu teken solda'du fo, neu natee-natati, do ana tao bela nusak fe'e-fe'ek. Muse fen loak teuk esa dalen-na, fo ana tunga-sanga soaneu uma loon, fo ela ana tao namahoko saoinan-na dalen-na.

⁶ Metema emi fe hataholi fe'ek, ana tona emi hatam esa soona, boso ho'im-ma hataholi ndia batu popo'de gandum-ma, da'di neu bua nape'dak esa. Metema, emi ho'i-ma batu ndia soona, emi loso-ma hataholi ndia no umaisin-nala maso'dan-na nde ndia.

⁷ Metema, hataholi esa, namanako neok neni leoinan esa, fo ana taon da'di ata, do nase'ohenin soona, muse hukunisa hataholi ndia. No enok ndia, emi tao mamopo tatao-nono'i mangalauk ndia.

⁸ Metema, hapu he'di lou mangalauk, fo imam-mala paleta emi tao beek soona, taon no malolen-na; tunga natutu'duk fo, au fen neu imam sila-la.

⁹ Mafandendelek, hata fo emi Manetualaim-ma, Ana taon soaneu Miryam, nai emi leleo-lala'om-ma dalek, fo nai lelek emi kalua meme Masir mai-a.

¹⁰ Metema, emi fe emi nono hataholim-ma, ana tona emi hatam esa soona, boso meu leo uman dale meu, fo ho'i-ma ba'dun-na, fo da'di neu bua nape'dak esa.

¹¹ Te mahani ka'da deak, fo nemen-na, fo ndia nde neni matan mai.

¹² Metema, hataholi ndia nuu taak-hata taak soona, o ta bole pe'da ba'du ndia losa le'odae katemak esa fa,

¹³ tehu tunga-tunga le'odaen-na, muse fe falik-kana, fo ela ana sungu soona, ana pake. Soona neukose, ana noke makasi, fo emi Manetualaim-ma, neukose dalen-na namahoko neu emi.

¹⁴ Boso ese-lumu hataholi mana'a ngga'di nuu taak-hata taak ma manato'a-taak-ka, nau emi leoinam do hataholi nusa dea fo, manaleo nai emi kotam esa boe.

¹⁵ Tunga faik, fo le'do beita temak fa te, emi muse bae ngga'din faik ndia dalen-na; ana namahena doik ndia, nanahu ana paluun. Metema, emi ta bae ngga'din-na fa soona, neukose ana naloo bou-bou neu Manetualain fo, noke tutulu-fafalik soaneu emi, fo emi da'di hataholi masala-masingok.

¹⁶ Boso hukumisa ina-amak, nanahu anan-na tatao-nono'i mangalaun-na, ma boso hukumisa anak-ka, nanahu ina-amak tatao-nono'i mangalaun-na. Bole hukunisa hataholi esa, nanahu ndia mesak-kana nde tao, tatao-nono'i mangalauk ndia.

¹⁷ Boso losom-ma, hataholi nusa dea, ma anamaak-kala hak-ka, ma boso ho'i-ma, inafalu esa bua papaken-na, da'di neu bua nape'dak esa.

¹⁸ Mafandendelek te, emi da'di hai ata neme Masir so, de emi Manetualaim-ma soi-po'i emi; hu ndia de, au fe emi nakanenetek ia-la.

¹⁹ Metema, emi ketu-kolu basa emi daem-ma buna-boan soona, boso boe meu makapipili, emi ke'di masanggango gandum-mala bai. Nemen-na fo, hataholi nusa dea-la, ma faluina anamaak-kala, soa sila-la, fo ela emi Manetualaim-ma, Ana fe emi baba'e-papalak nai emi ue-le'dim lala'en-na dalek.

^20-21 Emi seuheni emi ai setum-ma, ma emi angol-la boa makasososan-nala soona, boso boe meu seu, emi masaggangoheni ai boak-kala bai. Nemen-na fo, faluina anamaak-kala, soa sila-la.

²² Mafandendelek te, emi da'di hai ata neme Masir so, hu ndia de au fe emi nakanenetek ia-la.