ULANGAN 22 - Susula Malalaok Hehelu Palak Ma Hehelu Beuk

¹ Metema, hataholi esa nai emi leoinam dalek, mopo sapin do bi'ilopon esa, fo emi mitan soona, boso tao nono'kabai, emi ta bubuluk fa, tehu meni falik bi'ilopo ndia, leo mano-nuuk-ka neu.

² Metema, mano-nuuk-ka, uman-na nai dook-ka, do emi ta bubuluk mano-nuuk-ka nde see fa soona, meni bana ndia, leo o umam neu. Fo metema, mano-nuuk-ka, ana mai sangan soona, fe falik-kana.

³ Metema, emi mita keledei esa, do bua papakek biak esa, do hataholi esa nai emi leoinam dalek, namopo hatan esa soona, fe falik-kana leo, mano-nuuk-ka neu.

⁴ Metema, hataholi esa neme emi leoinam dalek, keledein do sapin esa, ana tu'u neu, nai enok lain soona, emi boso tao nono'kabai, emi ta bubuluk fa, tehu tulu-falin fo, mafofo'a falik bana ndia.

⁵ Inak-kala, ta bole pake-nggao sama leo touk-ka, ma touk-kala, ta bole pake-nggao sama leo inak-ka, nana emi Manetualaim-ma, Ana nape'da dale nasak hataholi manapake-nggao leondiak-ka fa.

⁶ Metema, emi mita manupui ndunuk esa nai ai lain, do nai dae lain, fo manupui ina bei natolo, do manupuiina no anan-nala lai dalek soona, boso ho'u-ma, manupui ina ndia.

⁷ Emi bole ho'i-ma, manupui anak sila-la, tehu inan-na soona, nemen-na fo, ana laa, fo ela boso mate manupuiina, fo naso'da no tetu-temak.

⁸ Metema, emi mafofo'a uma soona, pa'a okofefeok uma ndia so'dan-na. Fo metema hataholi tu'da neme uma ndia punin lain mai, fo maten soona, emi ta lu'a-lepa salak ndia fa.

⁹ Boso sele bubu'u-palusa fe'ek, nai emi osi angol-ma dale, te ka'da ai angol-la mesak-kana. Metema, emi sele bubu'u-palusa fe'ek boe soona, ta bole emi ketu-seu osi angol ndia buna-boan fa, nau angol do bubu'u-palusa fe'ek-kala boe.

¹⁰ Boso pa'a sapi esa, ma keledei esa neu ai luku esa.

¹¹ Boso pake makabubua, bua papakek matak dua, fo nde bua-papakek fo nanatenuk neme bi'ibulu ma temak abalutu-a mai.

¹² Tao fifikok neu, emi bua-papakem-ma pe'dan haas.”

Nakanenetek la'eneu saotouk-saoinak

¹³ “Metema, touk esa, ana sao no anafe'oanak esa, de basa boema, ana nape'da dale nasak-kana so'on.

¹⁴ Boema, ana tao susula kalaak pepekok nae, nai lelek ala sao-a, saoinan-na ta matatema so'on.

¹⁵ Nai dede'ak ndia dalek, anafe'oanak ndia, ina-aman muse ho'i-la tema fulak fo daak-ka bei nai temak fulak ndia lain, fo ana da'di ta'du nae, nai lelek sila anafe'on-na sao-a, sila anafe'on-na bei matatema. Sila muse latu'du temak ndia, neu kota ndia lasin-nala, nai uman naketu-nala'dik-ka.

¹⁶ Anafe'oanak ndia, aman muse nafa'das nae, ‘Au fe basa au anafe'ong-nga neu hataholi ia, fo ana taon da'di ndia saon so, tehu besak ia, ana nape'da dale nasak-kana so'on.

¹⁷ Ana tao susula kalaak pepekok, nae nai lelek ala sao-a, ta matatema so'on. Tehu, ta'dun-na nde ia, nae nai lelek ndia, au anafe'ong-nga bei matatema. Mete matalolole daak-ka mamanan-na, bei nai temak fulak-ka nde ia!’

¹⁸ Soona, kota ndia lasi-lasin-nala, muse laloo touk ndia, fo ala fepan.

¹⁹ Boeo, ala muse fen nahuta doi fulak natun esa, fo ana fe doik sila-la leo aliaman-na neu, nanahu ana tao nalutu anafe'oanak Israel esa, na'den-na so. Ma ana muse sao nahele inak ndia, ma ana ta bole naelak heni fan, losa mate.

²⁰ Tehu leounik-ka, susula kalaak ndia tete'ek-ka, ma ta hapu ta'du, nae nai lelek ala sao-a, saoinan ndia bei matatema,

²¹ soona muse no inak ndia, leo ina-aman lelesun-na neu. Fo basa touk manai kota ndia, ala tapan nenik batu, losa maten nai mamanak ndia. Inak ndia, ana tao tatao-nono'ik esa, neni mamaek fe ita leoinan, nanahu lelek bei nai ina-aman uman, fo ana beita saoana fa, te ana sungu hai no touk so. No huhukuk ndia de, emi tao mamopo tatao-nono'i mangalauk ndia.

²² Metema, nai kota esa dalek, ala ho'u-la touk esa, ana sungu no hataholi fe'ek saon-na soona, muse tapanisa la'iesak duas. No enok ndia, emi tao mamopo tatao-nono'i mangalauk ndia.

²³ Metema, nai kota esa dalek, ala ho'u-la touk esa, ana sungu no anafe'oanak esa, hataholi fe'ek, adu-natane basan so.

²⁴ Nai dede'ak ndia dalek, ala muse loo duas, leo kota deak neu, fo ala tapas nenik batu, losa mates. Muse taonisa anafe'oanak ndia, nanahu ana ta nggasi, fo noke tutulu-fafalik fa, te se'kona, manada'dik ndia, ana da'di nai kota dale, de ana nggasi soona, hataholi-la lamanene. Ma muse taonisa touk ndia, nanahu ana sungu no anafe'oanak fo, hataholi fe'ek adu-natane basan so. No hataholi ka duak sila-la mamaten ndia de, emi tao mamopo tatao-nono'i mangalauk ndia.

²⁵ Tehu, dede'an-na fe'ek seluk bai, metema touk esa, ana tao tatao-nono'i mangalauk no anafe'oanak esa nai tina dale, te se'kona, hataholi fe'ek adu-natane basa anafe'oanak ndia so. Nai dede'ak ia dalek, ka'da touk-ka mesak-kana, nde muse nanahukunisak.

²⁶ Ta bole tao hata-hata la'e anafe'oanak ndia fa, nanahu ana ta tao tatao-nono'ik esa fo, nandaa nanahukunisak fa. Dede'ak ndia, sama leo dede'ak fo, hataholi esa neu sapu-na hataholi fe'ek boema, ana taonisan.

²⁷ Tatao-nono'i mangalauk ndia, ana da'di nai tina, de leomae anafe'oanak ndia, ana nggasi fo, noke tutulu-fafalik boeo, ta hapu hataholi mai tulu-fali fan.

²⁸ Metema, ala ho'u-la touk esa, ana tao tatao-nono'i mangalauk no anafe'oanak esa, hataholi beita adu-natane fan.

²⁹ Nai dede'ak ndia dalek, touk ndia muse bae anafe'oanak ndia belin-na ba'u, doi fulak limahulu leo anafe'oanak ndia aman neu. Touk ndia, muse ana ka'bing no anafe'oanak ndia, nanahu ana laka anafe'oanak ndia fo, duas tao tatao-nono'i mangalauk, de muse ana sao nahelen losa mate.

³⁰ Hataholi esa boen, ta bole nakamumulu-nakamamaek aman, nenik ana sungu no aman saoina makahatun esa.”