ULANGAN 2 - Susula Malalaok Hehelu Palak Ma Hehelu Beuk

¹ Mate'ena boema, ita fali leo moo solokaek-ka teu, de ita tunga enok manaleo Namo Akaba neu, sama leo Manetualain paletan-na. Ita taleu-talaak dook-ka neme dae letelepak Edom-ma.

² Boema Manetualain nafa'da au,

³ nae, ita taleu-talaak doon-na seli nai dae ndia so. Da'di ita muse teu leo kii teu.

⁴ Basa boema, Manetualain nadenu au, fo au fe emi natutu'duk-ka nde ia nae, ‘Ta dook-ka so'on te, neukose emi masok nusa Edom-ma, fo emi tolanoom-mala, fo Esau tititi-nonosin nusan-na. Neukose ala bii-lamata'u neu emi,

⁵ tehu emi ta bole sapu-mala fas, nana neukose Au ta fe emi, sila daen faa anak boen, nanahu Au fe basa dae Edom-ma leo Esau tititi-nonosin neu so.

⁶ Emi bole asa nana'a-nininuk neme sila mai.’

⁷ Mafandendelek, tao leo beek de, emi Manetualaim-ma, fe emi baba'e-papalak nai basa hata lala'en fo emi tao-no'in. Nakaboboi emi, nai lelek emi maleu-malaak nai moo solokaek maloaina ia. Nasulu-nahapa emi, nai teuk haahulu ia dalen-na, ma Ana fe emi, basa hata lala'en fo emi paluun.

⁸ Basa boema, ita la'ok takandoo, de ita la'oela enok fo manatunga kota-kota Elat-ta, ma Ezion-Geber-re, fo leo Tasi Mates-sa teu, boema ita puta leo dulu kik teu, fo leo Moo Solokaek Moab-pa teu.

⁹ Boema, Manetualain nafa'da au nae, ‘Hataholi Moab, fo Lot tititi-nonosin-nala, emi ta bole taos le'e esa boen. Boeo, emi boso sapu-malas. Au fe basa nusa Ar-ra leo sila neu so, de neukose, Au ta fe sila daen faa anak boen, leo emi neu.’ ” (

¹⁰ Makahulun-na, hataholi Emim-mala, ala leo leme Ar. Hataholi sila aon-nala matuaina, sama leo hataholi Enak-kala, fo hataholi ao matua ma ei madema-la.

¹¹ Loke hataholi sila soona lae, hataholi Refaim boe, sama leo hataholi Enak-kala, tehu hataholi Moab-pala foi hataholi sila na'de hataholi Emim.

¹² Makahulun-na, hataholi Hori-la leo leme Edom, tehu Esau tititi-nonosin-nala usi henis ma ala tao lamopo-lamates, de neu fai makabuin boema, langatuu-la hataholi sila daen-na; leondiak boe, neu fai makabuin boema, leoina Israel-la usi heni sila musun-nala, leme dae fo Manetualain fen neu sila.)

¹³ “Basa boema, ita lena Lee Zered-ta, sama leo Manetualain paletan neu ita.

¹⁴ Ndia ana da'di nai lelek ita la'oela Kades-Barnea teuk 38 boema, ita lena Lee Zered-ta. Mate la'iesak solda'du maneme bobongik ndia mai, sama leo Manetualain nafa'dan-na.

¹⁵ Manetualain la'ban-nasa nakandondoo henin, losa mate'en-na boema, mopo-mate la'iesak-kasa.

¹⁶ Mate basa la'iesak-kasa boema,

¹⁷ Manetualain nafa'da ita nae,

¹⁸ ‘Faik ia, emi tunga dae Moab-pa, fo la'ok la'di tunga nusa Ar-ra.

¹⁹ Boema, emi losa mamanak manadeka no hataholi Amon, fo Lot tititi-nonosin-nala daen-na. Boso taos le'e do sapu-malas, nana neukose Au ta fe sila daen faa anak boen leo emi neu fa.’ ” (

²⁰ Nusak ndia nananita-nalelak sama leo nusa Refaim, nana loken tunga leoina fo makahulun-na ala leo leme ndia; hataholi Amon-nala, ala foin na'de Zamzumim

²¹ Hataholi sila-la, sama leo hataholi Enak-kala boe, fo ao matuaina-la. Hataholi sila balakain-na seli, ma hataholin-nala makadotok. Tehu Manetualain tao namopo-namates, nalosa hataholi Amon-nala loso-la dae ndia, de ala leo leme ndia.

²² Manetualain tao leondiak boe neu hataholi Edom, fo Esau tititi-nonosin manaleo manai Edom dae letelepan-na. Manetualain tao namopo-namate hataholi Hori-la, nalosa hataholi Edom-mala loso-la dae ndia, de langatuu-lan, boema ala leo lahele leme ndia, losa besak ia.

²³ Hataholi-la leme pulu Kreta mai, langatuu-la dae manandolo-ndolo Tasi Tala'dak-ka su'un-na. Ala tao lamopo-lamate hataholi Awi, fo nggolo isik manai dae ndia, boema langatuu-la dae ndia losa leo kona neu, fo nakandoo leo kota Gaza neu.)

²⁴ “Lelek ita seli dae Moab-pa, Manetualain nafa'da ita nae, ‘Besak ia, meu leo Lee Arnon-na selik meu. Neukose Au fe Sihon, fo manek Hesybon, fo hataholi Amori ndia, no nusan-na, leo emi neu.

²⁵ Neme faik ia, neukose Au tao-a leoina fo manaleo su'di lai bee boe, ala bii-lamata'u neu emi. Metema lamanene emi na'dem-ma soona, ala dele-bengge'be, nana bibii-namata'uk-ka.’ ”

Israel sengi Mane Sihon-na

²⁶ “Basa boema, au adenu hataholi de'ubee leme moo solokaek Kademot-ta mai, fo leu leo Mane Sihon, fo neme Hesybon mai, soaneu landuku-lalosak hala nonoke mole-dame-a nde ia:

²⁷ ‘Fe ami loak, fo ami la'ok tunga Tuan nusan-na. Neukose ami la'ok makandoo, fo ami ta singo meme okofoo mai fa.

²⁸ Neukose ami bae nana'a-nininuk fo ami mi'a-minun. Ami paluu ka'da tunga nusak ia,

²⁹ losa ami lena Lee Yarden-na, fo ami masok leo, ami Manetualaim-ma fe ami nusak-ka meu. Saul tititi-nonosin manaleo manai Edom-ma, ma hataholi Moab manaleo manai Ar-ra boeo, ala fe basa ami loak, soaneu ami la'ok tunga sila nusan-na so.’

³⁰ Tehu Mane Sihon-na ta fe ita loak la'ok tunga ndia nusan-na fa. Emi Manetualaim-ma fen nalanga batu, ma dalen-na natea, fo ela ita hapu sengin. Ita bei tangatuu-ta daen-na losa besak ia.

³¹ Basa boema, Manetualain nafa'da au nae, ‘Au fe Mane Sihon-na no daen-na leo emi neu; de ho'i-ma nusak ndia leona, fo mangatuu-man.’

³² Boema, Sihon no basa solda'dun-nala lala'en-na mai fo latee-lata'ti loo ita, deka no kota Yahas-sa.

³³ Tehu, ita Manetualain-na fen leo ita mai, boema ita sengin no basa solda'dun-nala lala'en-na.

³⁴ Nai lelek ndia boe, ita loso-ta basa kota-la de ita tao takalulutuk-kasa, ma ita tao tisa la'iesak laun-nala lala'en-na, touk-kala, inak-kala ma ni'iana-la. Ita ta po'ilotak hataholi esa boen, naso'da fa.

³⁵ Ita ho'i-ta, bana-manun-nala, ma ita loso-ta, kota-nala.

³⁶ No ita Manetualain-na tutulu-fafalin, de ita hapu loso-ta, basa kota sila-la, mulai neme Aroer mai, fo nai Bafak Arnon-na, ma kota manai bafak ndia tala'da, losa dae Gilead-ta. Ita tao takalulutuk basa papala nanadaman-nala.

³⁷ Tehu ita Manetualain-na kena-ka'i ita, fo ita ta bole deka hataholi Amon-nala daen-na, do Lee Yarden-na su'un-na, do kota-kota manai dae letelepan-na, do mamana fe'ek bee boe.”