ULANGAN 16 - Susula Malalaok Hehelu Palak Ma Hehelu Beuk

Faik Feta Paskah

¹ “Tao feta Paskah nai hataholi Yahudi-la bula Abib-pa, fo fe ha'da-holomata neu emi Manetualaim-ma, nana nai bulak ndia dalen-na, fo le'odae boema, Ana soi-po'i emi meme Masir mai.

² Meu leo Manetualain hele mamanak-ka meu, fo do'do emi bi'ihiim bi'ilopom do emi sapim esa, da'di leo tutunu-hohotu Paskah, soaneu fe ha'da-holomata neu emi Manetualaim-ma.

³ Emi muse mi'a tutunu-hohotuk ndia, no loti fo ta pake laluteik fa. Emi muse mi'a loti fo ta pake laluteik ndia, faik hitu dalen-na, sama leo nai lelek no lai-laik emi la'oela dae Masir-ra. Mi'a loti fo loken lae loti doidosok-ka, fo ela nai emi fai maso'dam-ma dalek, emi mafandendelek, faik fo emi la'oela Masir, fo emi mamana doi-dosom-ma.

⁴ Nai faik hitu dalen-na, nai basa emi nusam-ma lala'en-na, hataholi esa boen, ta bole pe'da laluteik nai uman-na fa. Nai le'odae makasososak-ka, emi do'do bana-la, emi muse mi'a heni paan-nala, nai le'odaek ndia boe.

^5-6 Emi muse do'do bana soaneu Feta Paskah nai emi Manetualaim-ma hele mamanak-ka, fo boso nai mamana fe'ek, nai emi Manetualaim-ma fe emi nusak-ka. Emi muse tunu-hotu tutunu-hohotuk sila-la, nai lelek le'do-a tenak, sama leo nai lelek emi la'oela dae Masir-ra.

⁷ Tunu-nasu paa sila-la, nai emi Manetualaim-ma hele mamanak-ka, fo balahaa fafaik soona, fali meu'um-ma leo emi umam-ma meu.

⁸ Basa feta ndia soona, nai faik nee dalen-na, emi muse mi'a loti fo ta pake laluteik fa. Nai faik ka hitun-na soona, emi muse makabubua fo sene-do'ok neu emi Manetualaim-ma. Nai faik ndia dalen-na, emi ta bole tao ue-le'dis fa.”

Feta Keketu-kokoluk

⁹ “Lekem-ma, mamasok hitu neme, emi mulai ke'di gandum-mala, fai makasososan-na,

¹⁰ fo tao Feta Keketu-kokoluk, fo fe ha'da-holomata neu emi Manetualaim-ma. Nai faik ndia, emi meni fen tunu-hotuk fo, emi fe no emi dale hihiim-ma, de'u Manetualain fe emi baba'e-papalak-ka.

¹¹ Nai emi Manetualain-ma matan, fo nai Ana hele mamanak-ka, emi mamahoko-setelee, sama-sama moo emi anam-mala, emi atam-mala, ma hataholi Lewi-la, hataholi nusa dea-la, faluina-anamaak fo, manaleo manai emi kotam-ma.

¹² Tinga basa paletan-nala, no dalek-katematuak, ma mafandendelek te, makahulun-na, emi da'di ata neme Masir so.”

Feta Lalaa Akidook

¹³ “Emi fepa basa gandum-mala, ma emi ka'bi basa emi angol-la soona, emi muse tao Feta Lalaa Akidook-ka, faik hitu dalen-na.

¹⁴ Mamahoko-setelee, sama-sama moo emi anam-mala, emi atam-mala, hataholi Lewi-la, ma faluina-anamaak fo, manaleo manai emi kotam-mala.

¹⁵ Emi muse tao feta ndia, fai hitu dalen-na, soaneu fe ha'da-holomata neu emi Manetualaim-ma, nai Ana hele mamanak-ka. Mamahoko-setelee, nanahu emi Manetualaim-ma, Ana fe baba'e-papalak neu emi daem-ma buna-boan, ma emi ue-le'dim.

¹⁶ Basa touk Israel-la, muse mai sene-do'ok neu emi Manetualaim-ma, nai Ana hele mamanak-ka, teuk esa soona, la'i telu, fo nde nai Feta Paskah, nai Feta Keketu-kokoluk, ma Feta Lalaa Akidook-ka. Basa hataholi-la, muse leni tunu-hotuk,

¹⁷ tunga ndia hahapu-dadain, nandaa no emi Manetualaim-ma fen baba'e-papalak-ka dede'un-na.”

Ndoos ma mateuk-ka eno-dalan

¹⁸ “Nai emi Manetualaim-ma fe emi kota-la esa-esak, emi muse so'u manakee-manafula, ma manapaleta, soaneu laketu-lala'di laun-na dede'an-na, no ndoos ma matetuk.

¹⁹ Nai sila nakeketun-na dalek, sila ta bole laketu-lala'di, tunga sila dale hihiin-na fa, do laketu-lala'di no, ala mete matak. Sila boeo, ta bole sipo hata esa nalupa sosolo dalek fa, nanahu sosolo dalek ndia, ana tao napoke hataholi manatee-tenok ma hataholi manatao tunga ndoos ma matetuk-ka, matan-na, nalosa naketu-nala'din-nala ta ndoos ma matetuk fa.

²⁰ Emi muse tao ndoos ma matetuk tataas esa, fo ela emi hapu leo mahele, ma maso'da no tetu-temak, nai emi Manetualaim-ma fe emi nusak-ka.

²¹ Metema, emi tao fe emi Manetualaim-ma mei tunu-hotuk soona, boso tao ai nanadoki-dulak sosongo-tatangok fo nalupa Asyera mata aon, neu boboan-na,

²² ma boso lutu, lutu batu sosongo-tatangok fo sene-do'ok neun, nanahu emi Manetualaim-ma ta hii tatao-nono'ik ndia fa.