Biblia Todo Logo
Bìoball air-loidhne

- Sanasan -

ULANGAN 15 - Susula Malalaok Hehelu Palak Ma Hehelu Beuk


Teu ka hitu
( Im. 25:1-7 )

1 “Neu teuk-ka hitu, mate'en-na soona, emi muse kokaheni basa huta-bu'uk-kala.

2 Enon-na leo iak: Basa hataholi Israel fo, ana fe leoinan esa tona doik soona, ana muse kokaheni hutak ndia, nanahu tunga Manetualain nakeketun-na, hutak ndia nanakokahenik so, da'di, ta bole la'ok-kana so'on.

3 Emi fe hataholi nusa dea, ana tona emi doim-ma soona, emi bole la'ok-kana, tehu metema emi leoinam nde tona soona, emi ta bole la'ok doik ndia fa.

4 Emi Manetualaim-ma, neukose Ana fe emi baba'e-papalak, nai nusak fo emi Manetualaim-ma neu emi. Soona nai emi leoinam-ma dalek, neukose ta hapu hataholi nuu taa-hata taak fa,

5 sa'di emi mamanene matalolole emi Manetualaim-ma halan-na, ma tao-no'i nasa paleta fo faik ia, au anduku-alosak-kana neu emi.

6 Neukose emi Manetualaim-ma, Ana fe emi baba'e-papalak, sama leo hala hehelun-na. Neukose, emi fe leoina makadotok, tona emi doim-ma, tehu neukose emi ta tona doik fa; neukose emi koasa leoina makadotok, tehu neukose ala ta koasa emi fa.

7 Mahani te, metema emi leo nai emi Manetualaim-ma fe nusak-ka, boema emi leoinam esa, nai emi kotam esa dalek, ana to'a-taa soona, emi boso mete ka'da emi aoinam-ma mesak-kana, fo emi ta nau tulu-fali fan.

8 Nasafalin-na, emi muse madale malole, fo fe hataholi ndia, ana tona doik dadaik, ndia paluun-na.

9 Manea matalolole, fo boso nalosak emi dodoo nai emi dalem dale, mae leo ia: teuk fo kokaheni huta-bu'uk-kala, ana deka so, de emi ta nau fen tona doik fa. Boso makaboboi dudu'a-aafi mangalauk ndia, nai emi dalem dale. Metema, emi ta nau fe hataholi ndia, ana tona doik fa, boema naloo bou-bou neu Manetualain, fo ana kalaak emi, soona neukose emi hapu salak.

10 Fen no dalen-na namahokok, ma boso no nakasetik, soona neukose emi Manetualaim-ma, fe baba'e-papalak neu emi ue-le'dim lala'en-na.

11 Nai hataholi Israel-la dalek, neukose hapu nahele, hataholi de'ubee nuu taa-hata taak, ma manato'a-taak. Hu ndia de, au paleta emi, fo madale malole neu hataholi sila-la.”


Tatao-nono'ik soaneu ata-la
( Kel. 21:1-11 )

12 “Metema, touk esa do inak esa, nai emi leoinam dalek, ana nase'o aoinan-na, fo ana da'di emi atam soona, ana muse naue-nale'di fe emi, nai teuk nee dalen-na. Muse po'in nai teuk-ka hitun-na dalek.

13 Ta bole fe ata nanapo'ik ndia, ana fali ne'un no lima louk fa.

14 No emi dale malolem-ma, emi muse fen su'di beek neme hata fo, emi Manetualaim-ma fen neu emi, fo nde bi'ihiik bi'ilopo, gandum ma angol.

15 Mafandendelek te, makahulun-na emi da'di ata neme Masir boe, boema emi Manetualaim-ma, Ana soi-po'i emi; hu ndia de, au fe emi paleta ndia.

16 Tehu, metema ata ndia, ana ta nau feli ne'u fan, nanahu ana sue-lai emi ma emi teidalem-mala, de ana nau leo no emi soona,

17 moon leo emi umam-ma lelesun-na neu, fo so'bo di'idoon-na, soona neukose ana da'di emi atam losa mate. Emi muse tao leondiak boe, neu emi ata inam-mala.

18 Metema, emi po'i ata esa soona, boso masasale dale, nana nai teuk nee dalen-na, ana naue-nale'di fe emi, no ngga'din-na ba'u malalau-maoono esa, ngga'din-na seli. Tao tunga paleta ndia, soona neukose emi Manetualaim-ma, fe baba'e-papalak neu emi ue-osam lala'en-na.”


Sapiana ma bi'ihiiana bi'ilopoana fo nanabongi makasososak-kala

19 “Sapi maneanak, ma bi'ihii maneanak, bi'ilopo maneanak fo, nanabongi makasososak-kala, emi muse tunu-hotu fen neu emi Manetualaim-ma. Ta bole pake sapi sila-la, soaneu ala hela luku nai ha'deoe dale fa, ma ta bole nggute bi'ilopo sila-la, bulun-na fa.

20 Tunga teuk, emi ma emi teidalem-mala, muse mi'a paan-na nai emi Manetualaim-ma matan, nai mamanak fo Manetualain helek-ka.

21 Tehu, metema bana ndia ei lu'u la'ak, fo nde ei helak do mata pokek, do ana hapu he'di-laus matuaina fe'ek soona, emi ta bole tunu-hotu fen neu emi Manetualaim-ma fa.

22 Basa hataholi fo, nau malalaok do manggenggeok boe, bole na'a paan-na, nai uma, sama leo na'a paa nusa.

23 Ta bole mi'a daan-na fa, tehu emi muse po'ahenin leo dae lain neu, sama leo oe-a.”

Lean sinn:



Sanasan