Biblia Todo Logo
Bìoball air-loidhne

- Sanasan -

ULANGAN 14 - Susula Malalaok Hehelu Palak Ma Hehelu Beuk


Fafaluk tunga eno matetun-na

1 “Emi nde been-na, Manetualain anan. Da'di, nai lelek emi hataholim esa mate, fo emi falu soona, boso tao makahina emi aoinam-ma, do emi nggeuheni emi langadoom manai emi dedeim-ma nisi lain-na, sama leo leoina fe'ek-kala tataon-na.

2 Emi nde been-na, emiManetualaim-ma nuun emi; neme basa leoina fo manai daebafak ia lala'en-na, emi nde, Manetualain helen, soaneu da'di Ndia anan-nala.”


Bana ta nalulik ma bana nalulik
( Im. 11:1-47 )

3 “Boso mi'a bana fo, Manetualain ta nau ta'a paan-na fa.

4 Emi bole mi'a bana-la nde ia, paan-na: sapi, bi'ilopo, bi'ihiik,

5 nusa, bi'ilopo fuik, bi'ihii fuik,

6 ma basa bana eifanga kaba'ek-kala, ma bana fo ala doa-aale

7 Emi ta bole mi'a bana fo eifangan-na katemak, ma ana ta doa-aale fa. Boso mi'a onta, kelinci, do lafo fa. Manetualain ta nau emi mi'a bana sila-la, paan-na fa, nanahu leomae ala doa-aale, tehu eifangan-nala katemak.

8 Boso mi'a bafi paan-na. Manetualain ta nau ta'a bana sila-la, paan-na fa, nanahu leomae eifangan-nala kaba'ek, tehu ala ta doa-aale fa. Ta bole mi'a paan-nala, ma ta bole koila'e bana mates popolan-na fa.

9 Emi bole mi'a i'ak fo, mahingik ma maunek mata-matak lala'en-na.

10 Bana fo naso'da nai oe dale, tehu hingin ta ma unen ta nde been-na, bana fo Manetualain ta nau ta'a paan-na, da'di emi ta bole mi'a fas.

11 Emi bole mi'a basa manupui mata-matak lala'en fo, nanakena-ka'i tak-kala.

12-18 Tehu emi ta bole mi'a manupui matak de'ubee, paan-nala fa, Manupui sila-la nde: manupui kaka'ka, ko'donaok, balupua mata-matak lala'en-na, manupui esa na'de manupui nasar, manupui kaa, manupui onta, manupui esa na'de manupui camar, manupui esa na'de manupui blekok ma danoe mata-matmatak lala'en-na, manupui esa na'de manupui undan, manupui esa na'de manupui kasa ma soik-ka.

19 Basa lama-bob'i mali'dak-kala nde been-na, bana nanakena-ka'ik sila-la, da'di, emi ta bole mi'a paan-nala fa.

20 Emi bole mi'a bana mali'dak fo, nanakena-ka'i tak-kala.

21 Emi ta bole mi'a bana manamateaok-kala, paan-na fa, tehu hataholi nusa dea fo, manaleo manai emi nusam-ma, bole la'a, do lase'os leo leoina nusa dea-la neu. Emi nde been-na, hataholi fo, nanahele hehelik soaneu emi Manetualaim-ma. Ta bole nasu bi'ilopoana do bi'ihiiana paan-na, nenik inan su'uoen-na fa.”


Nakanenetek la'eneu tunu-hotu ba'ek esa neme ba'eneu sanahuluh

22 “Tunga teun, emi muse ho'i-ma emi daem-ma buna-boan, metema hahapu dadain ba'ek esa neme ba'eneu sanahuluh, fo taon da'di tunu-hotu boa sosak, soaneu Manetualain.

23 Nai emi Manetualaim-ma matan, nai mamanak fo Ana helen soaneu mamana nakaluku-nakatele, emi muse mi'a tunu-hotu ba'ek esa neme ba'eneu sanahuluh, fo nde gandum, angol, mina setun, boema emi sapiana, bi'ihiiana, bi'ilopoana fo, nanabongi makasososak-kala. Tao basa sila-la, fo ela emi hapu manoli fe ha'da-holomata neu emi Manetualaim-ma, losa dodo-na.

24 Metema, emi Manetualaim-ma hele mamanak nakaluku-nakatelek-ka, dook-ka nanseli neme emi umam-ma mai, nalosa emi ta hapu meni emi Manetualaim-ma fe emi daem-ma buna-boan, hahapu dadain ba'ek esa neme ba'eneu sanahuluh leo ndia neu fa, soona

25 mase'oheni emi daem ndia, buna-boan seli, fo meni doin-na leo, emi Manetualaim-ma hele mamanak-ka neu.

26 Emi mahiik su'di beek-ka soona, asa pake doik sila-la – sapi, bi'ihiik, bi'ilopo, angol ma ala-lalu – boema nai mamanak ndia, fo nai emi Manetualaim-ma matan, emi ma emi teidalem-mala, muse mi'a-minu sama-sama no namahoko-setelek.

27 Boso po'ilotak, hataholi Lewi fo manaleo manai emi kotam-mala, laleu-lalaak; mafandendelek te, hataholi sila-la dae-oe taak-kala.

28 Nai tunga-tunga teuk-ka telun-na sanga basan, fo metema emi hapu emi daem-ma buna-boan, hahapu dadain ba'ek esa neme ba'eneu sanahuluh, fo pe'da makabubuas nai emi kotam-mala.

29 Fe nana'a-nininuk sila-la, leo hataholi Lewi-la neu, nanahu sila dae-oen ta, ma fe hataholi nusa dea-la, faluina anamaak fo, manaleo manai emi kotam-mala dalek. Sila bole mai ho'i basa sila paluun lala'en-na. Metema emi taon leondiak, soona emi Manetualaim-ma, neukose Ana ba'e-pala emi ue-le'dim lala'en-na.”

Lean sinn:



Sanasan