ULANGAN 13 - Susula Malalaok Hehelu Palak Ma Hehelu Beuk

¹ Metema, nabi esa do hataholi manamakandandak me'is esa, nafa'da emi ta'du-tana beuk do manada'di beuk,

² nenik ana ke'diindiu emi, fo ela emi sene-do'ok ma mamahele neu lamatua daebafak fo, emi beita malelak-kana fa, fo leomae hata fo nafa'dak ndia, ana da'di te'e-te'e boe,

³ boso taoafik neun. Nana emi Manetualaim-ma pake hataholi ndia, fo Ana mete, ade te'e-te'e, emi sue-lai Manetualain no emi dalek katematuam-ma do ta.

^4-5 Hataholi matak leondiak-ka, muse hukunisan, nanahu ana nau taon-na emi, matofa-matalak meme enok fo, emi Manetualaim-ma paletan neu emi. Hataholi ndia nde been-na, hataholi mangalauk, nanahu ana nadenu emi, lena-la'ban emi Manetualaim-ma fo, manasoi-po'i emi meme Masir mai, mamanak fo emi da'di ata. Da'di, muse tao nisa hataholi ndia, fo ela mopo tatao-nono'i mangalauk ndia. Tehu, ela leo been-na, emi tunga emi Manetualaim-ma, ma fe ha'da-hoholomata neun; tungan ma tao-no'i basa paletan-nala lala'en-na. Lilineka mahele, ma mamahele neun.

^6-7 Metema, emi tolanom, do emi anatoum do anainam, do emi saoina susue-lalaim-ma, do emi tia-laim-mala, no denge-dengek, ala fufu'di-oodok emi, fo sene-do'ok neu lamatua daebafak fe'ek-kala, fo emi beita malalelak-kasa, ma emi bei-ba'i kaim-mala boeo beita lalelak-kasa fa, leoina fo manaleo deka do manaleo lai dook-ka, lamatua daebafak-nala,

⁸ emi boso mamanenen do boso po'ilotak ala fufu'di-oodok emi. Boeo, emi boso sue-lai do masulu-mahapa hataholi ndia.

^9-10 Muse tapa hataholi ndia nenik batu, losa maten. O nde muse tapa makasososa, hataholi ndia nenik batu, fo besak-ka laun-na lala'en-na. Muse taonisa hataholi masalak ndia, nana ana nau tao natu'da emi, neme emi Manetualaim-ma fo, manasoi-po'i ita teme mamanak fo, ana tao ita da'di ata neme Masir-ra.

¹¹ Boema, basa leoina Israel-la lala'en-na, neukose lamanene la'eneu kanisak ndia, fo ala bii-lamata'u, nalosa hataholi esa boen, ta napalani tao tatao-nono'i mangalauk ndia so'on.

¹² Mahani te, metema emi leo nai, emi Manetualaim-ma fe emi kota-la soona, neukose halak-ka nakapepela

¹³ nae emi leoinam-mala, hataholi mangalaun de'ubee, ala tao-la laun manai kota, latofa-latalak nenik ala sene-do'ok neu lamatua daebafak fo emi beita malelak-kana fa

¹⁴ Metema, emi mamanene dede'a anin matak leondiak-ka soona, palisak matalolole dein. Metema, tatao-nono'i mangalauk ndia, tete'ek-ka,

¹⁵ soona taonisa la'iesak laun manai kota ndia lala'en-na, sama-sama loo bana-manun-nala. Muse tao namate-namopo la'iesak kota ndia.

¹⁶ Muse tao nakabubua laun manai kota ndia, hata-heton lala'en-na, fo madodous leu dae loak dale, soona muse hotuheni kota ndia, no basa hata-heton lala'en-na, fo da'di neu tutunu-hohotuk ba'eneu emi Manetualaim-ma. Basa ndia soona, la'oela basa hata-heto nanahotu henik sila-la, muse la'oelas leme ndia, fo ala da'di ai batu manatapasasalak, boema, ta bole mafofo'a falik kota ndia so'on.

¹⁷ Emi ta bole ho'i-ma bua-lo'as nanasoo-supak sila-la, fo emi taos da'di emi nuum fa, te muse tao makalulutuk la'iesak-kasa. Soona neukose Manetualain nasan-na tenak, de Ana natu'du susue-lalain neu emi. Neukose dalen-na malole no emi, fo Ana tao emi da'di leoina matuaina, sama leo Ana helu basan neu, emi bei-ba'i kaim-mala so,

¹⁸ sa'di emi tunga basa paletan fo, au anduku-alosak-kana neu emi, nai faik ia dalen-na, ma tao tunga basa hihii-nanaun lala'en-na.”