ULANGAN 11 - Susula Malalaok Hehelu Palak Ma Hehelu Beuk

Manetualain matua-mademan

¹ “Sue-lai emi Manetualain-ma, ma tunga paletan lala'en-na, tataas esa.

² Besak ia, mafandendelek hata fo, emi bubuluk-kana la'eneu Manetualain neme emi maso'dam-ma mai. Emi anam-mala, ala ta bubuluk hata esa boen. Te emi nde mita matam, emi Manetualaim-ma matua-mademan, be'i-balakain ma koasan-na,

³ ma Ana tao manada'di beuk matuaina-la, soaneu mane Masir-ra ma nai basa nusan-na lala'en-na

⁴ Emi mita, tao leo beek de, Manetualain tao namate-namopo solda'du Masir-ra no basa ndalan-nala, ma kaleta musun-nala. Ana taon-na basa-basas bolo leme Tasi Gelagah nai lelek ala usi emi-a.

⁵ Emi bubuluk Manetualain fe emi beek neme moo solokaek-ka, fo ndia te, emi beita losa mamanak ia fa.

⁶ Emi boeo, mafandendelek, hata fo Manetualain taon soaneu Datan ma Abiram, fo Eliab neme leo Ruben-na mai, anan-nala. Emi basa-basam-mala mita, daebafak-ka natangga, boema ana ko'do-nalas, sama-sama loo teidalen-nala, uma ofun-nala, basa atan-nala ma bana-manun-nala.

⁷ Hei, emi nde mita matam, Manetualain tao basa manada'di beuk-kala.”

Baba'e-papalak ba'eneu hataholi manatunga paleta ma soo-supak ba'eneu hataholi manatunga tak-ka

⁸ “Tunga la'iesak hoholo-lalanek fo, faik ia au fen neu emi, soona emi bisa lena lee-a, fo masok leo nusak fo, ta dooanak so'on te, emi leo nai dalek ndia.

⁹ Ma neukose, emi maso'da mala dook-ka, nai nusa kamasu'ik ma maoe-maisik fo, Manetualain helu basa, Ana fen leo emi bei-ba'i kaima-mala no tititi-nonosin-nala neu.

¹⁰ Nusak fo, neukose emi leon ndia, ta sama leo dae Masir fo, makahulun-na emi mamana leleo-ma fa. Nai naa, emi muse maue-male'di, losa emi pusem-ma ti'ti, fo besak-ka emi tinam-mala hapu oe, nai lelek emi sele-nggali bini-ngges.

¹¹ Tehu nusak fo, neukose emi masok-kana ndia nde been-na, nanuu letek ma bafak makadotok, ma ana hapu oe u'dak tataas esa.

¹² Emi Manetualaim-ma, nakaboboi ma nanea nusak ndia, tunga teun.

¹³ Da'di, tunga la'iesak paleta fo faik ia, au anduku-alaosak-kana neu emi; sue-lai emi Manetualaim-ma, ma makaluku-makatele neun, nenik basa emi ao paa samanem lala'en-na.

¹⁴ Metema eni tao leondiak, soona la'e fain-na te, neukose Manetualain fe emi daem-ma, u'dan nai lelek emi ketu-kolu basa, ma nai lelek emi mulai sele-nggali. Soona, neukose emi hapu gandum, angol ma mina setun, dai emi mi'a-pake,

¹⁵ boema, na'u dai emi bana-manum-mala la'a. Neukose emi ta to'a-taa, nana'a-nininuk fa.

¹⁶ Boso nau hataholi fufu'di-oodok emi, fo emi dook-ka meme Manetualain mai, fo emi sene-do'ok ma mamahele neu lamatua daebafak fe'ek-kala.

¹⁷ Metema, emi la'olena paleta sila-la soona, neukose Manetualain namanasa emi. Neukose Ana ta fe emi u'dan fa; fo emi daem-ma namatuu, nalosa mate emi bubu'u-palusam-mala. Soona, ta dooanak so'on te, emi mate nai dae maoe-maisik fo, Manetualain fen neu emi ndia.

¹⁸ Mafandendelek ma taoafik neu paleta sila-la. Emi muse pe'da au dede'a-kokolang ia-la, nai emi dalem dale; em muse taon da'di leo ta'du-tana neu emi limam-ma, ma emi muse taon neu emi dedeim-ma, fo mafandendelek mahelen.

¹⁹ Manoli paleta sila-la, neu emi anam-mala. Kokolak moos, nai lelek emi nai uma dale, do emi nai emi leleo-lala'om-ma dalek, do nai lelek emi nai ue-le'dis dale, do nai lelek emi hahaeaom-mala.

²⁰ Sulak-kana neu emi umam-ma diin-nala, ma neu emi lelesuinam-mala.

²¹ Soona, neukose emi ma emi anam-mala, hapu fai naluk-le'do loak nai nusak fo, emi Manetualaim-ma helu basa, Ana fen leo emi bei-ba'i kaim-mala neu. Nai lelek lalai-a bei nai daebafak-ka lain, nai lelek ndia boeo, neukose emi bei leo nai nusak ndia.

²² Tunga basa hoholo-lalanek fo, au anduku-alosak-kana neu emi ndia, no dalek-katematuak: Sue-lai emi Manetualaim-ma, ma tao basa hata lala'en fo, Ana paletan neu emi, ma ela leo been-na, emi lilineka mahele neun.

²³ Soona, neukose Manetualain usiheni basa leoina sila-la, neme emi matam-ma mai, ma neukose emi leo leoina sila-la nusan-na; fo nde leoina fo ba'ulena emi, ma balakain-nala lena heni emi ndia.

²⁴ Emi la'ok okofefeo basa dae-la, neukose emi hapu la'iesak dae sila-la. Emi daem-ma, natabaa neme moo solokaek-ka, fo nai kona, losa letelepak Libanon-na, fo nai kii, ma neme Lee Efrat-ta, fo nai dulu, losa Tasi Tala'dak, fo nai muli.

²⁵ Neukose, emi Manetualaim-ma, taon-na basa hataholi manai nusak ndia lala'en-na, ala bii-lamata'u neu emi, sama leo Ana helu basak-ka, nalosa ta hapu hataholi esa boen, napalani kena-ka'i emi fa.

²⁶ Nai faik ia, emi bole hele dede'ak dua, fo nde baba'e-papalak do soo-supak.

²⁷ Neukose emi hapu baba'e-papalak, metema emi tunga, emi Manetualaim-ma paletan fo faik ia, au anduku-alosak-kana neu emi.

²⁸ Tehu neukose, emi nanasoo-supak, metema emi ta tunga emi Manetualaim-ma paletan-nala fa, tehu emi lepos masafali fo, emi sene-do'ok neu lamatua daebafak fe'ek, fo beita la'iesa boen, emi sene-do'ok neu fas.

²⁹ Emi Manetualaim-ma, no basa emi masok leo nusak fo, neukose emi leo nai dalek ndia neu soona, emi muse kokolak baba'e-papalak ndia, neme Letek Gerizim-ma poin-na mai, ma emi muse kokolak soo-supak ndia, neme Letek Ebal-la poin-na mai. (

³⁰ Letek ka duak sila-la, lai Lee Yarden-na, boboan muli, fo nai okofoo manaleo muli neu-a, dean-na, fo nai hataholi Kanaan-nala daen-na. Hataholi Kanaan sila-la, ala leo nai Bafak Yarden-na, nasasalematak no Gilgal, fo deka no ai sosongok manai More.)

³¹ Ta dook-ka so'on te, emi lena Lee Yarden-na, fo emi mangatuu-ma dae fo, emi Manetualaim-ma fen leo emi neu ndia. Emi loso-ma dae ndia, fo emi leo nai ndia soona,

³² emi muse tunga basa hoholo-lalanek fo, faik ia au anduku-alosak-kana neu emi.”