ULANGAN 1 - Susula Malalaok Hehelu Palak Ma Hehelu Beuk

Makasososan-na

¹ Susulak ia isin-na dede'a-kokolak fo Musa nanduku-nalosak-kana neu leoina Israel-la, nai lelek lai moo solokaek-ka, nai Bafak Yarden-na. Bafak ndia, nai Lee Yarden-na boboan dulu, deka no kota Suf-fa, fo nai kota Paran-na no kota Tofel, Laban, Hazerot ma Di-Zahab-ta, tala'da. (

² Ala la'ok leme Letek Sinai-a losa Kades-Barnea, faik 11 dalen-na, de ala la'di tunga dae letelepak Edom-ma.)

³ Nai hataholi Yahudi-la bula ka 11-na, fain esa nai teuk haahulu dalen, fo nai lelek leoina ndia la'oela Masir boema, Musa nanduku-nalosak basa hata fo Manetualain paletan soaneus.

⁴ Dede'ak ndia da'di ndek Musa sengi basa Sihon, fo hataholi Amori-la manen-na, ana paleta nai kota Hesybon-na, ma Og, fo mane Basan-na, fo ana paleta nai kota Asytarot-ta, ma Edrei.

⁵ Da'di, nai Yarden boboan dulu, fo nai dae Moab-pa, soaneu ka la'i makasososan-na, Musa nafa'da mangalele'do Manetualain hoholo-lalanen ma paletan-nala. Musa nafa'da nae,

⁶ “Nai lelek ita teme Letek Sinai-a, ita Manetualain-na nafa'da nae, ‘Emi leo nai letek ia doon-na seli so.

⁷ Besak ia, ofeheni emi lalaa ofum-mala leona, fo meu leo hataholi Amori-la dae letelepan-na, ma nai basa dae manai titia-tatain-nala, fo nde Bafak Yarden-na, dae mapupukuk-kala, ma dae matetuk-kala, dae manai kona ma Tasi Tala'dak-ka su'un kona. Meu leona, fo mangatuu-ma, dae Kanaan-na, ma Letelepak Libanon-na losa Leeina Efrat-ta.

⁸ Au, fo Manetualain helu basa, Au fe dae ndia neu emi bei-ba'i kaim Abraham, Isak ma Yakob no basa sila tititi-nonosin-nala. Da'di, meu fo mangatuu-ma, dae ndia leona.’ ”

Musa so'u manakee-manafula

⁹ Musa nafa'da leoina ndia nae, “Lelek ita teme Letek Sinai-a, au afa'da emi ae, Lulu'a-lelepak soaneu nauli-nalanga emi-a, belan-na seli ba'eneu au. Au mesang-nga soona, au ta abe'i fan, nana

¹⁰ emi Manetualaim-ma, Ana taon-na emi boetai mamade'uk-ka, nalosa emi dede'um-ma, de'u nduuk manai lalai-a.

¹¹ Ela leo been-na, emi bei-ba'i kai Manetualain-na, popo-tama nakandaoo emi dede'um-ma, fo losa didikuk la'i lifun esa, ma Ana tao-na emi da'di leoina fo tetu-temak, sama leo hala hehelun-na!

¹² Tehu hapu nai bee, au mesang-nga bisa lu'a-lepa emi toto'a-tataam, emi lulu'a-lelepam ma emi dede'am-mala?

¹³ Hu ndia de, hele neme leo esan-na, touk de'ubee fo manatee-tenok, nanuu ha'da-paliin malole, ma ana mete nalelak, beek kande malole, ma beek kande mangalauk, fo ela au so'us da'di emi mauli-malangam.

¹⁴ Boema emi sipok au hala nonokeng ndia no malole.

¹⁵ Hu ndia de, nai mauli-malangan fo emi helek sila-la dalek, au hele hataholi de'ubee manatee-tenok, ma ha'da-paliin malole, fo au so'us da'di emi mauli-malangam. Sila de'ubee, da'di mauli-malangan neu hataholi lifun esa, ma nggelok lauli-lalanga hataholi natun esa, nggelok lauli-lalana hataholi 50, ma nggelok lauli-lalanga hataholi 10. Au so'u mauli-malangan fe'ek boe, fo ala ito-ato emi leom-ma.

¹⁶ Nai lelek ndia, au fe sila bela-ba'uk-ka nde ia: Taoafik neu nale'a-napilik fo manada'dik manai emi leoinam-ma dalek. Maketu-mala'di tunga ndoos ma matetuk, nau la'e hataholi fo emi leoina esa, do la'e hataholi nusa dea fo manaleo lai emi nusam dale boe.

¹⁷ Emi naketu-nala'dim, boso namabela seselik; emi muse maketu-mala'di hataholi nenik naketu-nala'dik matak esa, fo boso bibinga-baba'e, see hataholi ndia. Boso bii-mamata'u neu su'di see boen, nana emi ho'i naketu-nala'dik ndia neme Manetualain mai. Metema, emi ta maketu-mala'di-mala dede'ak esa fa soona, menin leo au mai, fo ela au aketu-ala'din.

¹⁸ Nai lelek ndia boe, au fe emi natutu'duk, la'eneu dede'a fe'ek lala'en fo emi muse maketu-mala'din.”

Manamakuk fo nananadenuk neme Kades-Barnea

¹⁹ “Boema, nandaa no ita Manetualain paletan-na, de ita la'oela Letek Sinai-a, boema ita la'ok tunga moo solokaek maloina, ma henuk no bibii-namata'uk-ka, ita teu leo hataholi Amori-la dae letelepan-na teu. Nai lelek ita losa Kades-Barnea boema,

^20-21 au afa'da ae, Besak ia, emi losa nai hataholi Amori-la dae letelepan-na so, dae fo ita Manetualain, ma ita bei-ba'i kain Manetualain-na fen neu ita. Mete mitak dae ndia natabaa nde emi matam eli. Meu leona, fo mangatuu-man, sama leo Manetualain paletan-na. Dalem-mala boso naba'e, do bii-mamata'u.

²² Tehu emi mai leo au mai, de emi mafa'da mae, ‘Malolelenak, ata tadenu hataholi de'ubee lakahuluk leme ita mai, fo ala palisak besa-besa loo nusak ndia, fo ela lafa'da ita, muse tunga enok bee, ma ita sanga teu leo kota-la, leo beek.’

²³ Au sipok emi hala nonokem ndia, hu ndia de, au hele-a hataholi sanahulu dua, fo leo esan-na, au hele hataholi esa.

²⁴ Ala masok dae letelepak ndia, dodoon-na losa leo Bafak Eskol-la neu, boema ala la'ok okofefeon.

²⁵ Basa boema, ala fali ma'is, de leni fe ita ai boak manai naa-la, ma lafa'da, lae nusak fo neukose ita Manetualain fen neu ita ndia, maoe-maisik nanseli.

²⁶ Tehu, emi lena-la'ban emi Manetualaim-ma paletan-na, de emi ta nau masok nusak ndia fa.

²⁷ Emi makamuu-muu mae leo ia, ‘Manetualain nape'da dale nasak no ita. Boema, noo ita kalua teme Masir mai, fo Ana fe ita leo hataholi Amori-la liman dale neu, fo ela ala taolisa ita.

²⁸ Da'di, sosoak hata, ita teu leo naa teu? Ita tadenu hataholi manaleu leo naa leu-a, ala tao-la ita bii-tamata'u, nenik sila hala nafafa'dan-na, lae leoina ndia, balakain-na ma aon-nala makadelek lena heni ita, ma lae ala leo nai kota-kota fo papala nanadaman-nala dedeman-na losa lalai. Lita hataholi ao matua ma ei madema-la lai naa boe!’

²⁹ Tehu, au afa'da ae, Boso bii hataholi sila-la.

³⁰ Emi Manetualaim-ma, neukose nauli-nalanga emi, fo natee-nata'ti soaneu emi, sama leo emi mita matam neme Masir so,

³¹ ma neme moo solokaek-ka. Emi mita, tao leo beek de, emi Manetualaim-ma no emi no so'dak, ma Ana ko'o emi sama leo amak esa ko'o anan-na, su'di enok ndia nanalun-na, losa mamanak ia.

³² Tehu, leomae au afa'da basa emi ae leondia so boe, emi beita nau mamahele neu emi Manetualain,

³³ fo Ana la'ok nai emi uluk, soaneu Ana sanga fe emi mamana oofuk. Ana da'di manamatu'du enok ba'eneu emi, nai fai le'odaen-na, nai dii ha'ik dale, ma nai fai lele'don-na, nai dii ko'as dale.”

Manetualain huku Israel

³⁴ “Manetualain namanene emi haladoim-ma, boema namanasa. Boema Ana soo nae,

³⁵ ‘Ta hapu hataholi esa boen, neme bobongik mangalauk ia mai, neukose ana masok leo nusak fo maoe-maisik, fo Au helu basan neu emi be-ba'i kaim-mala so.

³⁶ Ka'da Kaleb, fo Yefune anan-na, nde neukose ana masok nusak ndia, nanahu ana lilineka nahele neu Au. Au fe nusak fo nanala'ok okofefeo basan ndia neu Kaleb no tititi-nonosin-nala.’

³⁷ Emi boeo, taom-ma Manetualain namanasa au, de nafa'da nae, ‘Musa, o boeo, neukose ta masok nusak ndia fa.

³⁸ Tehu, matetea-mahehele o manatulu-manafalim Yosua, fo Nun anan ndia, dalen-na. Te neukose, ndia nde nauli-nalanga Israel, fo ala loso-la nusak ndia.’

³⁹ Boema Manetualain nafa'da ita basa-basa-tala nae, ‘Emi anam fo bei anak-kala nanseli, de ala beita mete lalelak, beek-ka nde malole ma beek-ka nde mangalauk-ka, ni'iana fo tunga emi nafa'dam-ma mae, neukose emi musum-mala loso lalas-sa, neukose Au fe dae ndia neu emi anam sila dei, ma neukose, emi anam sila nde langatuu-la dae ndia.

⁴⁰ Tehu emi soona, fali me'um-ma leo moo solokaek-ka meu, fo tunga enok manaleo Namo Akaba neu.’

⁴¹ Boema, emi mataa mae, ‘Musa, ami masala-masingo basa neu Manetualain so. Tehu besak ia, ami nau meu matee-mata'ti, sama leo Manetualain fo ita Manetualain-na paletan-na.’ Boema, emi esa-esak maheheleaon soaneu natee-natatik-ka, boema emi mafa'da, mae mu'dak la'iesak-kana, soaneu sapu-na dae letelepak ndia.

⁴² Tehu Manetualain nafa'da au nae, ‘O boso po'ilotak-kasa leu latee-lata'ti, nana neukose Au ta o fas, mahani te, neukose sila musun-na, sengis.’

⁴³ Au anduku-alosak hata fo Manetualain nafa'dan ndia neu emi, tehu emi ta taoafik neu fan. Emi lena-la'ban Manetualain paletan-na, nenik koao-ndaeaok emi meu leo dae letelepak ndia meu.

⁴⁴ Boema, hataholi Amori fo manaleo nai dae letelepak ndia, ala kalua mai, de ala la'ban emi. Sila dede'un-na makadotok nanseli, sama leo fani bubua matuaina esa. Ala usi emi losa Horma, boema ala sengi emi neme dae letelepak Edom-ma.

⁴⁵ Basa boema, emi fali ma'im-ma, de emi maloo bou-bou neu Manetualain fo moke tutulu-fafalik, tehu Ana ta nau namanene, do taoafik neu emi fa.”

Nai moo solokaek-ka teu-teuk

⁴⁶ “Basa ndia boema, ita leo doon-na seli neme Kades.