RATAPAN 5 - Susula Malalaok Hehelu Palak Ma Hehelu Beuk

Hule-haladoi dokodoe dale kasian

¹ Ou Manetualain, mafandendelek hata fo ana da'di neu ami. Makanae ami, ma mete ami matasi'da-matasaem-ma.

² Ami pusakam-mala tu'da leo hataholi fe'ek liman dale neu, hataholi nusa dea-la leo-la ami umam-mala.

³ Musu taonisa ami amam; besak ia, ami inam inafalu, ma ami anamaa.

⁴ Ami muse asa oe nininuk ma ai ha'i.

⁵ Lakaseti ami maue-male'di belak sama leo bana-manu, ami sota-mangu, tehu ala ta fe fai hahaeaok fa.

⁶ Ami da'di hataholi mananokek nai Masir, ami moke nana'ak nai Asyur.

⁷ Ami bei-ba'i kaim-mala lasala-lasingo, besak ia, taak-kasa so; tehu ami muse doi-doso, nanahu sila sala-singon-nala.

⁸ Hataholi fo nangatutuun-na ta lenak neme ata mai fa, ana paleta ami; ta hapu manakoasa soi-po'i ami neme hataholi sila mai fa.

⁹ Kanisak-kala tonggela nai kota deak; ami mase'o ami samane ma, nai lelek ami sanga nana'ak.

¹⁰ Ami doi-doso no la'a-ndoes-sa, nalosa ami loum-ma pila lo'a-lo'a sama leo ha'ikaak-ka.

¹¹ Ala sungu loo inak manai Sion-nala, ala tao lalutu anafe'oanak manai nggolo-nggolok Yehuda, na'den-nala.

¹² Ala ho'u-la ami mauli-malangam-mala de ala lonas, ala ta koa-kio ami toulasim-mala so'on.

¹³ Lakaseti ami ta'eanam-mala, fo ala tao ue-le'dis nai mamana po'de gandum-ma, lelepa ai-a, nakanete-na ami ni'iana touanam-mala losa ala sapala'o.

¹⁴ Lasik-kala ta lakabubua seluk nai kota lelesuinan-nala so'on, sasanu liik-kala ta namanenek nai muli-soluk-kala dalek so'on.

¹⁵ Ami mopo ami ua-nale malolem-ma so; fofoti-lolongek nasafali da'di manafaluk so.

¹⁶ Ami dale namatutuam-ma taak-kana so, ami hapu soe hu kande ami masala-masingo so.

^17-18 Lete Sion-na nee-nee lino-lino ma nanala'oelak; busa fuik-kala tonggela nai naa. Hu ndia de, ami dalem-ma nakalulutuk, ami kii losa ami mata memetem-ma da'di keluha'buk.

¹⁹ Tehu O, ou Manetualain, O koasa mahele, O paleta losa dodoon-na.

²⁰ Masa bole O la'oela ami dodoo basa ndia? Ade, fafa'kama O mafandele heni ami nai tepo-lelek manalu ia do?

²¹ Ou Manetualain, moo falik ami leo O mai; neukose ami fali ma'im-ma leo O mai! Tao falik ami ha'da-tataom sama leo makahulun-na.

²² Do fafa'kama O tu'u-tapa heni ami so do? Ade, O nasa-melum too-lanen ta ba'eneu ami so do?