RATAPAN 4 - Susula Malalaok Hehelu Palak Ma Hehelu Beuk

Yerusalem doi-doson nai lelek ana tu'da basa

¹ Lilopilas mangadilak-ka kou henin so Manetualain Uman-na batun-nala tonggela nai enok lain.

² Makahulun-na kota Sion-na ta'eana-anafe'oanan-nala sama leo lilopilas kabelik, tehu besak ia, ala taon sama leo uledae mesan.

³ Te busa fui ina nasu'u anan-na, tehu Au anang-ngala ta lalelak susue-lalaik, sama leo manupui onta nai mook-ka.

⁴ Ni'iana beuana-la ta nananasu'uk fa, nalosa mates no maa ma'dak-ka. Ni'iana-la loke la'a, tehu ta hapu hataholi fe fas.

⁵ Sila fo biasa la'a-linu nana'a mala'da-mala'da, ma laso'da nai hahapu-dadaik-ka dalek, besak ia, ala la'ek fo leu sanga nana'a-nininuk nai kadafu madodouk-kala, ma ala mate no la'as-sa nai enok-kala lain.

⁶ Au anang-ngala nanahuku basak so belan-na lena heni laun Sodom fo ka'da nai hatematak esa mesak-kana nakalulutuk neme Manetualain liman-na mai, te ta nenik hataholi daebafak-ka nakeketun-na fa.

⁷ Makahulun-na ami mauli-malangam-mala neuisik sama leo abas fo fula balisi. Sila makadelek ma balakaik so'da-la'dak ma ta lamahe'di fa.

⁸ Tehu besak ia, mata-panan-nala nggeok lena heni ha'inunuk-ka nggeon-na lalenga-latono nai enok-kala lain, de hataholi ta hapu nalelak-kasa fa. Loun-nala kukulu nai duin-nala, sama leo ai tuu meto-metok-ka.

⁹ Ala doi-doso de ala mate faa-faa, hu kande ta lanuu nana'ak faa anak boen; fo manamatek manai natee-natatik-ka dalek bei naua-nanale lena neme manamatek hu kande la'a-ndoes-sa.

¹⁰ Soe ndia ba'un-na seli, de ana tuni la'e Au anang-ngala nalosa ina-ina fo dale mangana'uk ala nasu anan-nala fo la'a.

¹¹ Manetualain nasa-melun fo'a, de Ana hotu heni kota Sion-na, losa ta hapu sesee-bobolon fa.

¹² Nai mane-manek-kala ma laun daebafak-ka dalek, esa boeo ta namahele nae musu nook-ka bisa masok tunga kota Yerusalem-ma lelesuinan-nala.

¹³ Tehu dede'ak ndia da'di so nanahu imam-imam ma nabi-la sala-singon. Ala taolisa hataholi sala tak-ka so.

¹⁴ Sama leo hataholi pokek-ka naleu-nalaak nai enok-kala lain, kota Yerusalem-ma mauli-malangan-nala leondiak. Bua papaken-nala langgenggeo nanahu daak-ka nalosa ta hapu hataholi nau koila'e fas.

¹⁵ Hataholi-la lafa'da lae, “La'o meme ia mai! Emi manggenggeok, de boso mafaloe ami!” Boema ala la'o, de laleu-lalaak leme leoina esa leo leoina esa leu, tehu ta hapu hataholi esa boen, fes loak fo leo lahele fa.

¹⁶ Manetualain ta taoafik neu anan-nala so'on; Ndia nde tao tapasasalas-sala, ma Ana tao-na hataholi ta fe ha'da-holomata neu imam-mala so'on; basa mauli-malangan-nala, dale susue-lalai tak-kala.

¹⁷ Ami matam-ma so'ta no memetek-ka mahani tutulu-fafalik fo ana ta losa fa. Ami mamahena leoina esa tutulu-fafalin, fo tunga ndoon-na ana ta hapu fe hata esa boen.

¹⁸ Ami ta hapu kalua leo enok lain meu fa, nana metema ami kalua soona, musu nook-ka maku ami tataas esa. Ami so'dam-ma sanga deka nate'e, nanahu ami faim-ma dai so.

¹⁹ Manausi ami-la, lalaik lai-lai nanseli lai lena heni manupui kaka'ka. Ala usi ami nai letek-ka ma lapadei-la ami nai moo solokaek-ka.

²⁰ Ala ho'u-la manek fo Manetualain helek-ka, hataholi fo ami mamahenan da'dileo manafe maso'dak, ma manamasulu-mahapa soaneu musu nook-ka.

²¹ Hai leoina Edom-ma Us, bole hika leon, mamahoko-setelee leon, bei dai emi bei bisa! Neukose soe-a ana mai neu emi boe ma hu kande mamafuk-ka, de neukose o o'du makaholak seluk o aoinam-ma.

²² Sion nakalala'ok huhukun-na, soaneu sala-singok fo ana taok-ka so; besak ia, neukose Manetualain ta po'Ilotak ami ma neukose ta no seluk ami leo mamana tu'u-tapak dalek neu so'on. Tehu o, hai Edom, neukose Manetualain huku o. O sala-singom neukose nanabukak.