RATAPAN 3 - Susula Malalaok Hehelu Palak Ma Hehelu Beuk

Huhukuk, tukatei-saledalek, namahehenak

¹ Au nde hataholi fo name'da nita doidosok-ka so, nanahu Manetualain nasa-melun tuni la'e au.

² Ana boetai lele'a-loloso au leo dook-ka neu fo leo mamana makahatuk kiu-kiuina dalek neu.

³ Ana fepa au do'e-do'e, nai fai katemak esa dalen-na, ta no dale kasian fa,

⁴ Ana tao-na au aong-nga nakahina belak, ma la'di au duing-ngala.

⁵ Ana poti au nenik dale he'dik ma hoo-nggu'uk.

⁶ Ana laka au leo nai makahatuk dale sama leo hataholi manamatek manai tepo-lelek makahulun-na.

⁷ Ana pa'a au nenik lange mateaina, nalosa ta hapu enok kaluak ba'eneu au fa.

⁸ Au akadii-akau oke tutulu-fafalik, tehu Manetualain ta nau namanene fa.

⁹ Napanggenggee au enong-nga nenik papala nanadamak.

¹⁰ Nahani sama leo beruang, Ana sapu-na au, sama leo singa.

¹¹ Ana usi au losa au singo heni enok-ka, boema Ana sii-sii au de Ana la'oela au.

¹² Ana hela kokoun-na, de Ana fe kokou isin-na nasale leo au mai.

¹³ Kokou isin-na tola au aong-nga ana tola losa bade'eng-nga.

¹⁴ Nai faik-katemak esa dalek, basa hataholi-la hika au, ma ala tao au da'di buas nakaminak.

¹⁵ Ana fe au ka'da makahe'duk fo da'di au nana'a-nininung.

¹⁶ Ana lolose au mata-panang neu dae-a, Ana to'i au nising-nga neu batu-a, de la'din.

¹⁷ Dook-ka so, au ta ame'da ita tetu-temak-ka fa; au afandeleheni name'da ua-nalek-ka leo beek so.

¹⁸ Au ta anuu na'de nanakoa-nanakiok so'on, au namahehenang neu Manetualain, mopok-kana so.

¹⁹ Au dodoo au leu-lang ma doi-dosong sama leo au u'a laso makahe'duk.

²⁰ Au dodoo dede'ak ndia nakandondoo henin, nalosa ana tuni namabela au daleng-nga.

²¹ Leomae leondiak boe, au namahehenang-nga fo'a falik, lelek au afandele dede'ak-ka nde ia nae:

²² Manetualain susue-lalain manaketu basa tak, neme doon losa dodo-na, beita la'iesa fo basa baba'e-babatin fa,

²³ beuk tataa esa tunga-tunga fafain-na tete'ek-ka, Manetualain manalilinekak nanseli!

²⁴ Manetualain nde been-na, au hata-hetong fo kisak. Hu ndia de, au amahena neun.

Namahehenak ba'eneu Israel

²⁵ Manetualain malole neu hataholi fo namahena neun, ma neu hataholi fo ana sangan.

²⁶ Da'di, malole lenak ata tahani no nee-nee lino-linok losa Manetualain Ana mai fo fe tutulu-fafalik;

²⁷ malole lenak ata tanoli fo ata da'di manamakatatakak nai lelek bei muli-soluk.

²⁸ Nai lelek Manetualain fe doidosok-ka, ela leo been-na tangatuuk mesat-tala no denge-dengek.

²⁹ Nemen-na fo takaloe-takadae aoina-tala, ma ka'da tahani, nanahu fafa'kama bei hapu namahenak.

³⁰ Leomae nanafapak ma nananakadadaek, ela leo been-na, ata sipok basa sila-la.

³¹ Nana, neukose Manetualain ta tipa ita losa dodoon-na fa.

³² Ana fe basa doidosok-ka soona, nanuu dale kasian boe, nanahu Ana sue-lai nahele ita nenik susue-lalain fo too-lanen ta ndia.

³³ Dalen-na ta losa soaneu po'ilotak ita doi-doso ma dale he'di fa.

³⁴ Metema ita samanen-na hapu tutuni mabela bui dale,

³⁵ metema mopo Manetualain fe ita hak-ka,

³⁶ nanahu ala puta-paik ndoos ma matetuk-ka soona, tao leo bee-o Manetualain bubuluk ma Ana taoafik-kana.

³⁷ Metema Manetualain nape'da dale nasak hata esa fa soona, tao leo bee-o, hataholi daebafak-ka ta hapu tao hata-hata soaneu dede'ak ndia fa.

³⁸ Malole ma mangalauk-ka nananakalala'ok tunga ka'da Manetualain paletan-na.

³⁹ Tao le'e de, hataholi-a muse haladoi metema nanahukuk hu kande sala-singon?

^40-41 Malole lenak ita palisak matalolole ita so'dan-na fo fali leo Manetualain nai nusa so'dak-ka Mai fo ata soi heni ita dalen-na, fo hule-haladoi tae,

⁴² “Ou Manetualain, ami masala-masingo ma lena-la'ban O so, de O ta fe do'o do ampon fa.

⁴³ O usi ami ma O taomisa ami, O dale kasiam-ma, nanafunik nai O nasa-melum dale.

⁴⁴ O nasa-melum sama leo ko'as makateina nanseli nalosa ami huhule-haladoim ta hapu tola fan.

⁴⁵ O tao ami da'di sama leo kadafuk nai daebafak-ka lala'en-na mata memeten-na.

⁴⁶ Basa ami musum-mala lakadadaek ma ala hika ami;

⁴⁷ Susa-soe ma nakalulutuk-ka tuni-nala ami, boema ami maso'da nai soe ma bibii-namata'uk-ka dalek.

⁴⁸ Au luuoeng-nga faa, sama leo lee-a nanahu au leoinang-nga nakalulutuk so.

⁴⁹ Neukose au ta hahae kikiik-ka fa,

⁵⁰ losa O, ou Manetualain nai nusa so'dak-ka, taoafik neu ami.

⁵¹ Au daleng-nga he'dis-sa mete ina-inak manai ami kotam-ma ua-nalen.

⁵² Musu usi au sama leo manupui-a, tehu ne'en ta soaneu nakamuu-nakadau au.

⁵³ Ala tapa kalaok au leo oedolu ma'dak dale neu, boema lakadofu ketu au nenik batu.

⁵⁴ Oe kae losa au langang-nga, ae au dodoo ae, ‘Basa au faing-nga so!’

⁵⁵ Ou Manetualain, au aloo bou-bou neu O, neme oedolu madema ndia buin-na mai.

^56-57 Au dokodoe anseli, boso ko'oketu O di'idoom-ma soaneu au nonokeng-nga, fo ela O tulu-fali au. Boema O mamanene au huhule-haladoing, ma O mai deka; O mafa'da mae, ‘Boso bii.’

⁵⁸ O mai masala'e au dede'ang-nga, ou Manetualain, O soi-tefa-ma au so'dang-nga so.

^59-60 O mita tatao-nono'i mangalauk fo ala taon neu au, musu fo nakamuu-nakadau au-a, ana tutu'u eno mangalauk soaneu au. Hu ndia de, ou Manetualain, masala'e au dede'ang-nga.

⁶¹ O, Manetualain, mamanene au nananakadadaek; O bubuluk la'iesak sila dale tutu'un-na.

⁶² Ala kokolak au nai fai katemak esa dalen-na. Soaneu ala tao soe au, ala tutu'u eno manggenggeok.

⁶³ Neme fafaik losa le'odae, ala tao au da'di bua hihikak.

⁶⁴ Ou Manetualain, hukus nandaa no sila tatao-nono'in.

⁶⁵ Soo-supas ma nemen-na fo ala leo nai ketu nama, hehenak-ka dalek.

⁶⁶ Usis fo tao mamopo-mamate basa-basas losa basa la'iesa kasa neme daebafak-ka mai.”