RATAPAN 2 - Susula Malalaok Hehelu Palak Ma Hehelu Beuk

Manetualain huku Yerusalem

¹ Manetualain ho'i nakeketuk nai nasa-melun dale. Ana fe makiu-makahatuk-ka poti-na Sion. Israel matua-mademan fo dedemak lalai-a, Ana tapan leo daebafak-ka neu so. Nai faik Manetualain namanasa, Ana ta taoafik neu Uman manai Sion-na boe.

² Ana tao nakalulutuk basa mook manai nusak Yehuda, ta no dale susuek fa. Nai nasa-melun-na dalek, Ana honan losa ndefa heni basa kota musu manamasulu-mahapa nusak ndia. Nusak ndia no basa mauli-malangan-nala, Ana tao natu'das, nalosa ala da'di nakadadaek.

³ Nai nasa-melun fo manapila lo'a-lo'an-na dalek, Ana helu la'di Israel be'i-balakain, Lelek musu nook-ka sapu-na ita, Ana hia fe tutulu-fafalik. Sama leo ha'i pila lo'a-lo'a fo tao nalutu basa hata lala'en-na, leondiak boe, Manetualain manakoasa nasa-melun neu ita basa-basa-tala.

⁴ Ana hela kokoun-na, sama leo musu fo Ana te'ek kokou isin-na nasale leo ita mai. Ana taonisa la'iesak basa hataholi fo ita sue-laik-kala, Nasapula nasa-melun sama leo ha'i-a, leo kota Yerusalem ia dalek neu.

⁵ Manetualain da'di sama leo musu; Ana fepa Israel losa ndefa henin. Ana tao nakalulutuk kota musu-la boema uma manek-ka, ma Ana fe soe-a namaba'u nai laun Yehuda dalek.

⁶ Ana tao nakalulutuk Uman-na ma Anan-nala mamana nakabubuan soaneu sene-do'ok neun. Ana tao-na hataholi-a nafandele heni fai Sabat-ta ma fai malole-la. Nanahu Manetualain namanasa nanseli, Ana ta sipok imam ma manek fa.

⁷ Manetualain ta sipok mei tunu-hotun fo malalao-malalafuk-ka fa, Ana la'oela Uman-na; Ana po'ilotak musu-a tao natu'u papala nanadaman-nala. Nai mamanak fo makahulun-na ita sene-do'ok ma tao feta, musu-a eki nanahu lamahoko-setelee.

⁸ Manetualain naketu basa nae Sion papala nanadaman-nala muse tao nandefa henis. Papala nanadamak-kala ma uma puni madema-la besak ia, basa-basas da'di ai-batu madodouk.

⁹ Dae-a nakadofu ketu lelesuinan-nala, la'di la'iesak ai betubalan-nala; manek-ka no manapaleta-la lai mamana tu'u-tapak. Ta lanoli hataholi-a, Manetualain hoholo-lalanen so'on, nabi-la ta sipo ninitak neme Manetualain mai so'on.

¹⁰ Lasi nggolok manai kota, langatuuk denge-denge nai dae lain; ala nggali afu leo langan-nala lain neu, ma ala pake lafa kalong fo da'di ta'du-tana susa. Anafe'oanak-kala boeo, lakatele langan-nala losa dae lain.

¹¹ Au matang-nga peta, nanahu ta hahae kikiik-ka fa, au samaneng-nga doi-doso nanseli. Au daleng-nga nakalulutuk mete leoina tutu'dan-na; mete ni'iana-la boema ni'iana manasu'uk-kala sapala'o nai kota enon-nala.

¹² Ala sota no kikiik-ka loke inan nana'ak ma nininuk. Ala bala leu enok-kala lain, sama leo hataholi makahinak-ka, boema mates lai inan-nala ifan lain.

¹³ Ou Yerusalem, kota Sion fo susuek, o tutu'dam-ma ba'u tasi maloaina. Hata fo au bisa afa'dan soaneu da'di kokoe-nanasik? Nana, beita la'iesa fo hapu hataholi doi-doso sama leo o fa. Tete'ek-ka, ta hapu hataholi bisa tao matalolole o ha'da-tataom fa.

¹⁴ Hata fo nabi-la landuku-lalosak-kana neu o, ka'da ke'di-ndiuk ma pepekok mesa-mesan. Beita la'iesa fo ala buka o sala-singom fa, nalosa hu kande ndia de, o ta tukatei-saledale fa. Nasafalin-na, ka'da ala tui-benga fe emi dede'a-kokola pepekok mamina-makeek.

¹⁵ Basa hataholi manala'ok tunga ndia, hakinonoli o, nanahu nakalulutuk basa o lala'en-na so. Lakakale langa ma lafa'da lae, “Ade, ndia ta nde kota mana'ahiik nanseli, kota fo daebafak-ka namatutua-namadedeman do?”

¹⁶ Basa o musum-mala mete o mata-panam no nakamuu-nakadauk, ala hika ma latitii nisi o. Lafa'da lae, “Ami tao mamopo-mamate kota ndia so! Mate'en-na, faik fo ami mahani talu-talu moon-na, ana losa boe!”

¹⁷ Manetualain nakalala'ok basa Ana fe nasanene'dak fo makahulun-na Ana tutu'un ma Ana fe nasanene'dak neu ita so. Ana tao nakalulutuk ita ta no dale kasian fa, Ana fe musu-a sesengik. Ana tao-nalas lamahoko-setelee, lita ita tutu'dan-na.

¹⁸ Hai papaka nanadamak Yerusalem-mala lemin, maloo bou-bou neu Manetualain! Fe o luuoem-ma tu'da sama leo lee-a ana faa lele'do-le'odaen. Kii makandoo fo boso hahae losa o aom-ma sota-mangu!

¹⁹ O fo'a do'e-do'e le'odae katemak esa soaneu nggasi fo mafa'da o dalem-ma oe-isin neu Manetualain. Moke leon, fo ela dalen-na tu'da kasian neu o ana kamala'am-mala ma manasapala'ok manai basa eno heheok-kala.

²⁰ Manetualain, mete ma taoafik leon neu sila fo O fepa-li'uk sila-la! Ade O tao hai nggelok leondiak so do beik? Ina na'a seluk ana bongi susuen-na, imam ma nabi-la nanatao nisak nai O Uma malalao-malalafum dale.

²¹ Lasi-mulik mate lalefule'ak nai enok lain, ta'eanak-anafe'oanak-kala mate loo tafaina. Nai faik fo O mamanasa, O do'dos ta no dale kasian fa.

²² O ka'i musu fo ami bii-mamata'uk-kala soaneu tao feta-dote dale susue-lalai tak-ka nai ami boboa-kaisum. Ala taolisa la'iesak sila fo ami makabobois ma sue-lais. Nai O fai nasa-melum-ma, ta hapu hataholi esa boen bisa nalai fa.