PENGKHOTBAH 7 - Susula Malalaok Hehelu Palak Ma Hehelu Beuk

Dudu'a-aafik la'eneu so'dak-ka

¹ Na'de kaboomenik-ka, malole lena neme mina kabeliina mai; Ma fai mamatek-ka, malole lena neme fai bobongik-ka mai.

² Malole lenak teu leo uma mamates teu neme teu leo uma feta teu. Nana ita muse tafandele tataas esa tae mamates sa nahani hataholi-a esa-esak.

³ Dale he'dik-ka malole lena neme hihikak-ka mai. Leomae mata-panak susa, sa'di dalek-ka loak.

⁴ Hataholi nggoak-ka, usi nahele namahoko-seteleek-ka. Hataholi dodole matane-a, dudu'a-dodoo mamates-sa tataas esa.

⁵ Malole lenak hapu kaka'ik neme hataholi dale malole neme nanakoa-nanakiok neme hataholi fo ta nalelak makandondook fa.

⁶ Hataholi nggoak-ka, hihika-na sosoa-ndandaan ta, sama leo ha'i na'a nggauk-ka fo nasapopoto.

⁷ Metema hataholi dodole matane ke'di-ndiu soona, nakeketun ndia nggoak. Metema hataholi sipo doi sosolo dalek soona, nalutu dodolen-na.

⁸ Malole lenak dede'ak esa mate'en-na, neme dede'ak ndia manakoasan-na mai; malole lenak boso haelai mamanasa, neme namatutua dalek-ka nanseli.

⁹ Boso haelai mamanasa; ka'da hataholi nggoak kande nape'da dalek.

¹⁰ Boso matane mae, “Tao le'e de, lelek makahulun-na malole lena neme lelek besak ia mai?”. Ka'da hataholi panganaa nde natane leondiak.

¹¹ Hataholi maso'dak-ka muse nanuu manatee tenok; manatee-tenok-ka beli-na sama no pusaka;

¹² boeo sama no doik fo manafe nee-nee lino-lino ka. Baite malelak la'eneu manatee-tenok-ka! See nanuun soona, neukose naso'da.

¹³ Taoafik neu Manetualain tatao-nono'in. Nana see kande ta hapu tao namandoo hata fo Manetualain tao napeko-pakin?

¹⁴ Da'di, mamahoko leona, metema o hapu nanalak. Tehu metema soe-a tuni-na o soona, boso mafandele henin mae Manetualain nde fe dede'a ka duak sila-la. Ita ta bubuluk hata fo ana da'di fa.

¹⁵ Au so'dang-nga sosoa-ndandaan ta, tehu nai au fai maso'dang ndia dalek, au itak-ka nde ia: Nasi'a hataholi malole-a mopo-mate, leomae hataholi ndia ana tunga agama no malole. Nasi'a hataholi manatao tatao-nono'i mangalauk-ka teun-na manalu, leomae ana tao sala-singok nakandoo.

¹⁶ Boso malole manseli, ma boso da'di manatee-tenok manseli boe. Sosoa-ndandaan hata do'do aom?

¹⁷ Boeo boso da'di hataholi mangalauk manseli, do panganaa manseli. Sosoak hata, mate te beita losa fain-na fa?

¹⁸ Madook aom-ma neme dede'a ka duak sila-la mai. Metema ita bii neu Manetualain soona, tao leo bee-o ita hapu buna-boa malole.

¹⁹ Manatee-tenok-ka tao-na hataholi fo nanuu manatee-tenok-ka aon-na boetai makadelek neme manakoasa 10 nai kota esa.

²⁰ Nai daebafak ia, ta hapu hataholi matetu-mandaak fa; ta hapu hataholi manatao malole tataas esa fa, ma beita nasala-nasingo nita fa.

²¹ Boso nau namanene hataholi dede'a-kokola anin-nala, see bubuluk, malalau-maoono esa bei soo-supa o.

²² O mame'da mae o soo-supa hai hataholi fe'ek so boe.

²³ Au fola basa sila-la nenik au manatee-tenong-nga. Tehu au boetai sanga manatee tenok ndia, ana boetai dook-ka neme au mai.

²⁴ See hapu natongo no maso'dak ia sosoa-ndandaan? Deman-na seli soaneu hapu talelak-kana!

²⁵ Tehu au anoli te'e-te'e fo sanga malelak-ka, fo ela au hapu manatee-tenok-ka, ma natataak soaneu natatanek lala'en-na. Au so'ba bubuluk sala-singok ndia tatao-nono'i nggoak, ma tatao-nono'i manalauk-ka nde been-na napalanik.

²⁶ Au hapun nae inak-ka makahe'duk lena neme mamates-sa mai. Inak-ka susue tou-ta'en-na, sama leo dala ma hihiik fo naheheleaon ho'u musun-na. Lima hoholun-na sama leo lange fo ana henge nahelen. Tehu hataholi manatao tunga Manetualain hihii-nanaun-na, nala hihi'ik-ka deak, tehu tao leo bee-o, hihi'ik-ka nala hataholi masala-masingok-ka.

²⁷ Mete, manadudu'a-dodook-ka kokolan-na nae, au atongo o basa sila-la nai lelek ngganik esa basa fo ngganik esa, au u sanga natataak.

²⁸ Au boeo bei sanga natataak fe'ek-kala, tehu buna-boan ta. Nai hataholi lifun esa dalek, au hapu touk esa fo au fen ha'da-holomata. Tehu nai hataholi sila dalek, ta hapu inak fo au fen ha'da-holomata fa.

²⁹ Ka'da au hapuk-ka nde ia: Manetualain tao-na ita ta lenak ma ta kulang fa, te biasa. Tehu ita nde tao pula-pali ma dopelele'u ita aoinan-na.