PENGKHOTBAH 5 - Susula Malalaok Hehelu Palak Ma Hehelu Beuk

¹ Dodoo makahuluk besak-ka kokolak, ma boso no lai-laik maheluk moo Manetualain. Manetualain nai nusa so'dak-ka ma o nai daebafak-ka, da'di kila-uku o hala-kokolam.

² Dalek-ka boetai ta tesa-tama fa soona, enok-ka boetai nanasoik soaneu malame'i me'is ta malole fa. Boetai kokolak ba'uk-ka soona, boetai enok-ka nanasoik kokolak dede'a-kokola nggoak.

³ Da'di, metema o maheluk moo Manetualain soona, tao matetun no lai-laik. Ana nape'da dale nasak hataholi manatao namanggonggoa aoinan-na fa. Hu ndia de, tao matetu o hehelu-balataam.

⁴ Malole lenak boso tao hehelu-balataak, neme tao hehelu-balataak, tehu ta nanatao natetuk fa.

⁵ O hala-kokolam boso tao-na o masala-masingo, nalosa no nakasetik, o mafa'da imam fo nalalau-naoono Manetualain, nae o kokolak sala hehelu-balataak-ka. Sosoak hata, o taom-ma Manetualain namanasa o, nalosa Ana tao nakalulutuk o ue-le'din buna-boan?

⁶ Sama-na leo me'is makadotok sila-la sosoa-ndandaan taa, leondiak boe bafa maloa, sosoa-ndandaan ta. Tehu bii neu Manetualain leona.

So'dak ndia manada'di tak

⁷ Boso dodoo doak-kana, metema mita manakoasa-la tuni-ndeni hataholi nuu-taa hata-taak-ka, loso-la hataholi sila haak-ka, ma ala ta fes ndoos ma matetuk fa. Malangan-na nasulu-nahapa hataholi mana'a ngga'di-la esa-esak, ma manapaleta manai lain-na nasulu-nahapa duas.

⁸ Nakalenak manek-ka boeo naso'da neme keketu-kokoluk buna-boan mai.

⁹ Hataholi fo ana tenepeta doik-ka, name'da doin-na beita dai fa, ma hataholi fo namulu hata-heto, name'da nanalak-ka beita dai fa. Basa sila-la, manada'di tak.

¹⁰ Hataholi esa su'i-beten boetai lamaba'uk-ka, boetai ana muse fe hataholi fe'ek ba'uk-ka la'a. Ta hapu nanalak ba'eneu manonuuk-ka fa, ka'da ana bubuluk nae ndia kamasu'ik

¹¹ Hataholi maue-male'di esa fafa'kama nana'an-na ta dai fa, tehu ta bole nae ta, ana bisa sungu namanee. Nasafalin-na, hataholi kamasu'ik esa hata-heton makadotok nanseli, nalosa ana ta bisa sungu fa, nanahu dalen-na ta tesa-tama fa.

¹² Au ita nai daebafak ia, hapu hata esa neni dale he'dik: Hataholi esa pe'da nadodou hata-heto soaneu fai to'a-taak-ka.

¹³ Tehu hata-heto ndia mopon, nanahu susa-soe esa, de ana ta hapu la'oela hata esa boen soaneu anan-nala fa.

¹⁴ Bongi ita no makaholak; leondiak boe, ita la'oela daebafak ia, no ta teni hata esa boen, neme ita sosota-mamangun lala'en-na mai fa.

¹⁵ Te'e-te'e neni dale he'dik nanseli! Ita teu sama leo nai lelek besak ia ita mai. Ita sota-mate usi anin-na, de buna-boan beek?

¹⁶ Nai ita fai maso'dan-na dalek, ita tafangganggao nai makahatuk dale, ita susa, ita dalen-na ta tesa-tama fa, tamanasa ma dale he'dik.

¹⁷ Boema au bubuluk ae, fo malole nanseli ba'eneu ita, nde ta'a-tinu fo tame'da tita ita ue-le'din buna-boan nai ita maso'da keke'uanan fo Manetualain fen neu ita; Ndia nde ita ua-nalen-na.

¹⁸ Metema hataholi esa sipo su'i-betes ma hata-heto neme Manetualain mai, ma fen loak name'da nita su'i-betes ndia soona, muse makasi fo na'a nita ue-le'din buna-boan lala'en-na. Ndia nde been-na Manetualain baba'e-babatin boe.

¹⁹ Manetualain tao nahenu hataholi ndia dalen-na nenik namahoko-seteleek-ka, de ana ta hela-hae no dudu'a-dodoo la'eneu maso'da keke'uanan ia so'on.