PENGKHOTBAH 2 - Susula Malalaok Hehelu Palak Ma Hehelu Beuk

¹ Au aketu basa fo au akatetesak au daleng-nga, soaneu bubuluk tetu-temak ndia leo beek. Te se'kona, ndia boeo manada'di taak.

² Au ame'da ae hihikak-ka nde been-na nggoak ma namahoko-seteleek-ka sosoa-ndandaan ta.

³ Au hihii-nanaung nakatutuluk au, fo au da'di hataholi dodole da'uk, ma au daleng-nga kisak soaneu amahoko-setelee nenik au inu angol ma tao feta dote. Au ae daenga, ndia nde enok malole ba'eneu hataholi daebafak-ka, fo ana bubuluk maso'dan-na keke'uanak nai daebafak ia.

^4-5 Au tao basa ue-le'dis matuaina-la so. Au tao uma-la soaneu au. Au tao osi bunga ma au tao osi, fo au sele angol, ma basa ai maboa mata-matak lala'en-na.

⁶ Au kali lifu, fo oe faa leo bubu'u-palusa neu, ma ana faa leo osi sila-la dalek neu.

⁷ Au atang makadotok, nau au asak-kala, do bongin nai au umang boe. Au bana-manung makadotok nanseli, lena heni su'di see fo ana leo hai neme Yerusalem so.

⁸ Au akabubua ala lilofulak ma lilopilas neme mane-manek manai au nusa paletang-ngala bea-nala mai. Manamakamee touk ma manamakamee inak-kala tao lamahoko au daleng-nga nenik sila nakameen-nala. Au sao makahatung-ngala dede'un-na, nandaa no au dale hihiing-nga.

⁹ Tete'ek-ka, au ba'u lena neme su'di see fo ala leo hai neme Yerusalem so, ma au manatee-tenong-nga boeo, nai uluk nahele.

¹⁰ Basa au dale hihiing lala'en-na, au tao-an dai ma lena. Beita la'iesa fo au akatatakak au daleng-nga soaneu au ame'da ita namahoko-setelee beek ndia boen. Au daleng-nga namatau neu au sosota-mamangung buna-boan lala'en-na, de au ngga'ding-nga nde ndia.

¹¹ Tehu basa boema, au palisak matalolole au ue-le'ding, ma au sosota-mamangung lala'en-na, fo au tao akababasak ue-le'dis sila-la boema, au ame'da itan, basa sila-la sosoa-ndandaan ta. Au sasanga enong ndia, manada'di taak sama leo ka'da usi anin mesak-kana.

¹² Leomae leo beek boe, manek esa ka'da hapu tao hata esa fo manek makahuluk-kala tao hain so. Boema au mulai dodoo ae: sosoa-ndandaan-na beek, da'di dodole da'uk do panganaa, do nggoak?

¹³ Memak, au bubuluk, “Mantee-tenok-ka malole lena neme nggoak-ka mai, sama leo mangale'dok-ka boeo malole lena neme makahatuk-ka mai.

¹⁴ Hataholi dodole da'uk-ka hapu nita enok fo sanga neu; hataholi nggoak-ka sama leo ana la'ok nafangganggama.” Tehu au boeo bubuluk ae ua-nalek fo sama, neukose tuni-na sila basa-basas.

¹⁵ Boema au dodoo ae, “Ua-nalek fo manatuni-na hataholi nggoak-ka, neukose au la'o la'din boe. Da'di, au manatee-tenong lala'en-na, sosoa-ndandaan-na beek?” Boema au ho'i nakeketuk ae manatee-tenok ndia, memak sosoa-ndandaan ta makandondook.

¹⁶ Hataholi nggoak-ka, neukose no lai-laik nananafandele henik, tehu hataholi fo nanuu manatee-tenok-ka boeo, neukose lafandele henin. Neu mate'en-na te, neukose mopo ita basa-basa-tala neme hataholi-a nafandendelen-na mai. Ita basa-basa tala muse mate, nau hataholi dodole maneu do hataholi panganaa boe.

¹⁷ Hu ndia de, so'dak-ka sosoa-ndandaan ta so'on ba'eneu au, fe'ek ta so. Basa-basan manada'di taak; ka'da au usi anin mesa kana.

¹⁸ Au ue-le'ding buna-boan lala'en-na, ma au hahapung-nga neukose sosoa-ndandaan ta ba'eneu au, nana au muse la'oelas neu mananggati au-a.

¹⁹ Ma see bubuluk, ade ndia dodole maneu do nggoak? Tehu leomae leo beek boe, neukose ndia nde nanuu au ue-le'ding buna-boan, fo au hapun nai au fai maso'dang-nga dalek nai daebafak ia, hu kande au sosota-mamangung ma au manatee-tenong-nga. Da'di ndia boeo manada'di taak.

²⁰ Besak ia, au asasale dale, au aue-ale'di losa au puseng-nga titi so.

²¹ Nana hataholi daebafak-ka naue-nale'di losa pusen-na titi no ana pake basa manatee-tenon, malelan lala'en-na, fo ana hapu hata esa. Tehu neu mate'en-na te, neukose ana muse la'oela basa sosota-mamangaun buna-boan lala'en-na neu hataholi fo pusen-na ta titi makandondook soaneu ana hapu basa sila la. Da'di, ndia boeo manada'di taak, bai te tete'ek-ka ta ndoos ma matetuk fa!

²² Nai hataholi daebafak-ka maso'dan-na dalek, ana puse nanggeok-ka no ue-le'dis-sa, ma ana sota-mangu; boema sosota-mamangun ndia buna-boan nde bee, fo ana hapu tao namatua dalen-na?

²³ Su'di beek fo ana taon nai naso'dan-na dalek, ka'da neni doidosok ma dale he'dik ba'eneun. Nai fai le'odaen-na boeo, dalen-na ta tesa-tama fa. Da'di basa sila la mate'en-na manada'di taak.

²⁴ Ba'eneu hataholi daebafak-ka, ta hapu hata esa malolen-na lena neme nana'ak, nininuk mai fa, ma name'da nita ue-le'din buna-boan. Au ame'da ae ndia boeo, Manetualain baba'e-babatin.

²⁵ See kande hapu na'a ma namahoko-setelee ta no Manetualain fa?

²⁶ Manetualain fe manatee-tenok, malelak ma tetu-temak neu hataholi fo tao namahoko dalen-na. Tehu nadenu hataholi masala-masingok-ka naue-nale'di fo sanga nana'a-naninun ma ana pe'da buna-boan fo ana fen neu hataholi fo tao namahoko Manetualain dalen-na. Da'di, basa sila-la manada'di taak, sama leo sanga enok fo usi anin-na.